ವಾಷಿಂಗ್ಟನ್: ಟೆನಿಸ್ ದಿಗ್ಗಜ ಹಾಗೂ 24 ಗ್ರ್ಯಾನ್ ಸ್ಲ್ಯಾಮ್ ಪ್ರಶಸ್ತಿಗಳ ಒಡೆಯ ನೊವಾಕ್ ಜೊಕೊವಿಚ್ ಅವರಿಗೆ ಸಿನ್ಸಿನಾಟಿ ಓಪನ್ನಲ್ಲಿ ಭಾರೀ ಆಘಾತ ಎದುರಾಗಿದೆ. ಅರ್ಜೆಂಟೀನಾದ ಥಿಯಾಗೊ ಟಿರಾಂಟೆ ವಿರುದ್ಧದ ಎರಡನೇ ಸುತ್ತಿನ ಪಂದ್ಯದಲ್ಲಿ ಸೋಲು ಕಂಡ ಜೊಕೊವಿಚ್, ಟೂರ್ನಿಯಿಂದ ಹೊರಬಿದ್ದಿದ್ದಾರೆ.
ಪಂದ್ಯದ ಆರಂಭದಲ್ಲಿ ಜೊಕೊವಿಚ್ ಭರ್ಜರಿ ಆಟ ಪ್ರದರ್ಶಿಸಿದರು. ಮೊದಲ ಸೆಟ್ನಲ್ಲಿ 6-2 ಅಂತರದಲ್ಲಿ ಗೆದ್ದು ಪಂದ್ಯದಲ್ಲಿ ಮುನ್ನಡೆ ಸಾಧಿಸಿದರು. ಆದರೆ, ನಂತರದ ಎರಡು ಸೆಟ್ಗಳಲ್ಲಿ ಟಿರಾಂಟೆ ತಿರುಗೇಟು ನೀಡಿದರು. ಎರಡನೇ ಹಾಗೂ ಮೂರನೇ ಸೆಟ್ಗಳನ್ನು ತಲಾ 6-4 ಅಂತರದಲ್ಲಿ ಗೆದ್ದ ಟಿರಾಂಟೆ, ಪಂದ್ಯವನ್ನು ತಮ್ಮದಾಗಿಸಿಕೊಂಡರು.
ಪಂದ್ಯದ ವೇಳೆ ಜೊಕೊವಿಚ್ ತೀವ್ರ ಸುಸ್ತಿನಿಂದ ಬಳಲಿದಂತೆ ಕಂಡುಬಂದಿದ್ದು, ಕೋರ್ಟ್ನಲ್ಲೇ ಅಸ್ವಸ್ಥರಾದರು. ಬಳಿಕ ವೈದ್ಯರು ಹಾಗೂ ಫಿಸಿಯೋಥೆರಪಿಸ್ಟ್ಗಳು ಅವರಿಗೆ ಚಿಕಿತ್ಸೆ ನೀಡಿದರು. ಈ ನಡುವೆಯೂ ಜೊಕೊವಿಚ್ ಹೋರಾಟ ಮುಂದುವರಿಸಿದರು.
ಎರಡನೇ ಸೆಟ್ನ ಒಂದು ಗೇಮ್ ಬರೋಬ್ಬರಿ 18 ನಿಮಿಷಗಳ ಕಾಲ ನಡೆದಿದ್ದು, ಪಂದ್ಯ ಮತ್ತಷ್ಟು ಕಠಿಣವಾಗುವಂತೆ ಮಾಡಿತು. ಮೂರನೇ ಸೆಟ್ನಲ್ಲಿ ಉಭಯ ಆಟಗಾರರು 4-4ರ ಹಂತದವರೆಗೂ ಸಮಬಲದ ಹೋರಾಟ ನಡೆಸಿದರು. ಆದರೆ ನಿರ್ಣಾಯಕ ಹಂತದಲ್ಲಿ ಟಿರಾಂಟೆ ಬ್ರೇಕ್ ಪಡೆದುಕೊಂಡರು. ಬಳಿಕ ತಮ್ಮ ಸರ್ವ್ ಉಳಿಸಿಕೊಂಡು ಪಂದ್ಯವನ್ನು ಗೆದ್ದು ವೃತ್ತಿಜೀವನದ ಮಹತ್ವದ ಗೆಲುವು ದಾಖಲಿಸಿದರು.
ಪಂದ್ಯ ಒಟ್ಟು 2 ಗಂಟೆ 44 ನಿಮಿಷಗಳ ಕಾಲ ನಡೆಯಿತು. ವಿಶ್ವದ 50ನೇ ಶ್ರೇಯಾಂಕದ ಆಟಗಾರರಾಗಿರುವ ಥಿಯಾಗೊ ಟಿರಾಂಟೆಗೆ ಇದು ನೊವಾಕ್ ಜೊಕೊವಿಚ್ ವಿರುದ್ಧದ ಮೊದಲ ಗೆಲುವಾಗಿದೆ. ಅಲ್ಲದೆ, ಟೆನಿಸ್ ದಿಗ್ಗಜನ ವಿರುದ್ಧದ ಈ ಗೆಲುವು ಟಿರಾಂಟೆ ಅವರ ವೃತ್ತಿಜೀವನದ ಪ್ರಮುಖ ಗೆಲುವುಗಳಲ್ಲೊಂದಾಗಿ ಗುರುತಿಸಿಕೊಂಡಿದೆ.
Join WhatsApp
