ಬೆಂಗಳೂರು ಮೆಟ್ರೋ ಪ್ರಯಾಣಿಕರಿಗೆ ಗುಡ್‌ನ್ಯೂಸ್; ಪಿಂಕ್ ಲೈನ್‌ಗೆ ರೈಲ್ವೆ ಮಂಡಳಿ ಅನುಮೋದನೆ

ಬೆಂಗಳೂರು: ಬೆಂಗಳೂರಿನ ಮೆಟ್ರೋ ಪ್ರಯಾಣಿಕರಿಗೆ ಮಹತ್ವದ ಸುದ್ದಿ ಹೊರಬಿದ್ದಿದೆ.

ಬಿಎಂಆರ್‌ಸಿಎಲ್‌ನ ಎಲಿವೇಟೆಡ್ ಪಿಂಕ್ ಲೈನ್‌ನಲ್ಲಿ ಹೊಸ ಬಿಇಎಂಎಲ್ ರೈಲುಗಳ ಸಂಚಾರಕ್ಕೆ ರೈಲ್ವೆ ಮಂಡಳಿಯಿಂದ ತಾತ್ಕಾಲಿಕ ಅನುಮೋದನೆ ದೊರೆತಿದೆ. ಇದರಿಂದ ಬಹುನಿರೀಕ್ಷಿತ ಪಿಂಕ್ ಲೈನ್ ಮಾರ್ಗವು ಕೆಲವೇ ವಾರಗಳಲ್ಲಿ ಪ್ರಯಾಣಿಕರ ಸೇವೆಗೆ ಮುಕ್ತವಾಗುವ ನಿರೀಕ್ಷೆ ಹೆಚ್ಚಾಗಿದೆ.

ಸುಮಾರು 7.5 ಕಿ.ಮೀ ಉದ್ದದ ಕಾಳೇನ ಅಗ್ರಹಾರದಿಂದ ತಾವರೆಕೆರೆವರೆಗಿನ ಮಾರ್ಗವನ್ನು ಕಾರ್ಯಾರಂಭಗೊಳಿಸಲು ಈ ಅನುಮೋದನೆ ಪ್ರಮುಖ ಹಂತವಾಗಿದೆ. ರೈಲ್ವೆ ಮಂಡಳಿಯು ಬಿಎಂಆರ್‌ಸಿಎಲ್‌ಗೆ ಕಳುಹಿಸಿರುವ ಪತ್ರದಲ್ಲಿ ಆರು ಬೋಗಿಗಳ ಬಿಇಎಂಎಲ್ ರೈಲುಗಳ ಸಂಚಾರಕ್ಕೆ ಕೆಲವು ಷರತ್ತುಗಳೊಂದಿಗೆ ಅನುಮತಿ ನೀಡಿದೆ.

ರೈಲುಗಳು ಸಾಮಾನ್ಯ ಪರಿಸ್ಥಿತಿಯಲ್ಲಿ ಗರಿಷ್ಠ 80 ಕಿ.ಮೀ ವೇಗದಲ್ಲಿ ಸಂಚರಿಸಲು ಅನುಮತಿ ನೀಡಲಾಗಿದೆ. ರೈಲಿನ ಸೆಕೆಂಡರಿ ಏರ್ ಸ್ಪ್ರಿಂಗ್ ಸಂಪೂರ್ಣವಾಗಿ ತುಂಬಿರುವ ಸಂದರ್ಭದಲ್ಲಿ ಈ ಗರಿಷ್ಠ ವೇಗ ಅನ್ವಯವಾಗಲಿದೆ. ಆದರೆ ಏರ್ ಸಸ್ಪೆನ್ಷನ್ ವ್ಯವಸ್ಥೆಯ ಸೆಕೆಂಡರಿ ಹಂತ ಡಿಫ್ಲೇಟ್ ಆಗಿರುವ ಸಂದರ್ಭದಲ್ಲಿ ರೈಲಿನ ವೇಗವನ್ನು ಗರಿಷ್ಠ 49 ಕಿ.ಮೀಗೆ ಸೀಮಿತಗೊಳಿಸಲಾಗಿದೆ.

ಇದೇ ವೇಳೆ, ಪಿಂಕ್ ಲೈನ್‌ನಲ್ಲಿ ರೈಲುಗಳ ಸಂಚಾರವನ್ನು ಆರಂಭಿಕ ಹಂತದಲ್ಲಿ ಗ್ರೇಡ್ ಆಫ್ ಆಟೊಮೇಷನ್ 2 (GoA2)ಕ್ಕೆ ಮಾತ್ರ ರೈಲ್ವೆ ಮಂಡಳಿ ಸೀಮಿತಗೊಳಿಸಿದೆ. GoA2 ವ್ಯವಸ್ಥೆಯು ಅರೆ-ಸ್ವಯಂಚಾಲಿತ ರೈಲು ನಿಯಂತ್ರಣ ವ್ಯವಸ್ಥೆಯಾಗಿದ್ದು, ರೈಲು ಕಾರ್ಯಾಚರಣೆಯಲ್ಲಿ ಚಾಲಕರ ಪಾತ್ರ ಮುಂದುವರಿಯಲಿದೆ.

ರೈಲ್ವೆ ಮಂಡಳಿಯಿಂದ ದೊರೆತ ತಾತ್ಕಾಲಿಕ ಅನುಮೋದನೆಯನ್ನು ಮುಂದಿನ ಸುರಕ್ಷತಾ ಪರಿಶೀಲನೆಗೆ ಅಗತ್ಯವಿರುವ ದಾಖಲೆಗಳ ಭಾಗವಾಗಿ ಬಳಸಿಕೊಳ್ಳಲು ಬಿಎಂಆರ್‌ಸಿಎಲ್ ಮುಂದಾಗಿದೆ. ಈ ಅನುಮೋದನೆಯನ್ನು ಮೆಟ್ರೋ ರೈಲು ಸುರಕ್ಷತಾ ಆಯುಕ್ತರಿಗೆ (CMRS) ಸಲ್ಲಿಸುವ ದಾಖಲೆಗಳೊಂದಿಗೆ ಲಗತ್ತಿಸಲಾಗುವುದು ಎಂದು ಬಿಎಂಆರ್‌ಸಿಎಲ್ ತಿಳಿಸಿದೆ.

ಪಿಂಕ್ ಲೈನ್ ಕಾರ್ಯಾರಂಭವಾದರೆ ಈ ಭಾಗದ ಮೆಟ್ರೋ ಸಂಪರ್ಕ ಮತ್ತಷ್ಟು ಸುಧಾರಿಸುವ ನಿರೀಕ್ಷೆಯಿದೆ. ಮಾರ್ಗದ ಕಾಮಗಾರಿ ಹಾಗೂ ರೈಲುಗಳ ಸಂಚಾರಕ್ಕೆ ಸಂಬಂಧಿಸಿದ ಪ್ರಕ್ರಿಯೆಗಳು ಪೂರ್ಣಗೊಂಡ ಬಳಿಕ ಪ್ರಯಾಣಿಕರ ಸೇವೆ ಆರಂಭವಾಗಲಿದೆ.