ಮೊಬೈಲ್ ಫೋನ್ ಇಂದು ಬಹುತೇಕ ಎಲ್ಲರ ಜೀವನದ ಅವಿಭಾಜ್ಯ ಭಾಗವಾಗಿದೆ.
ಕರೆ, ಮೆಸೇಜ್ ಸೇರಿದಂತೆ ಹಲವು ಕೆಲಸಗಳಿಗೆ ಮೊಬೈಲ್ ಅಗತ್ಯವಾಗಿದ್ದು, ಕೆಲವರು ಸುಲಭವಾಗಿ ಬಳಸಲು ಶರ್ಟ್‌ನ ಎಡಭಾಗದ ಜೇಬಿನಲ್ಲಿ ಫೋನ್ ಇಟ್ಟುಕೊಳ್ಳುತ್ತಾರೆ. ಆದರೆ ಹೃದಯದ ಸಮೀಪ ಮೊಬೈಲ್ ಇಟ್ಟುಕೊಳ್ಳುವುದರಿಂದ ಹೃದಯದ ಬಡಿತದ ಮೇಲೆ ಪರಿಣಾಮ ಬೀರುತ್ತದೆಯೇ ಎಂಬ ಅನುಮಾನ ಹಲವರಲ್ಲಿದೆ.
ಈ ಬಗ್ಗೆ ಹೃದ್ರೋಗ ತಜ್ಞರು ಸ್ಪಷ್ಟನೆ ನೀಡಿದ್ದು, ಸಾಮಾನ್ಯವಾಗಿ ಮೊಬೈಲ್ ಬಳಸುವುದರಿಂದ ಆರೋಗ್ಯವಂತ ವ್ಯಕ್ತಿಗಳಲ್ಲಿ ಹೃದಯದ ಬಡಿತದ ಲಯ ಅಸಹಜವಾಗುತ್ತದೆ ಎಂಬುದಕ್ಕೆ ವೈಜ್ಞಾನಿಕ ಪುರಾವೆಗಳಿಲ್ಲ ಎಂದು ತಿಳಿಸಿದ್ದಾರೆ.
ಮೊಬೈಲ್ ಫೋನ್‌ಗಳು ನೆಟ್‌ವರ್ಕ್ ಸಂಪರ್ಕಕ್ಕಾಗಿ ರೇಡಿಯೊಫ್ರೀಕ್ವೆನ್ಸಿ ತರಂಗಗಳನ್ನು ಬಳಸುತ್ತವೆ. ಇವು ಅಯಾನೀಕರಿಸದ ವಿಕಿರಣಕ್ಕೆ ಸೇರಿದ್ದು, ಎಕ್ಸ್‌ರೇಯಂತಹ ಅಯಾನೀಕರಿಸುವ ವಿಕಿರಣದಂತೆ ಡಿಎನ್‌ಎಗೆ ನೇರ ಹಾನಿ ಮಾಡುವಷ್ಟು ಶಕ್ತಿ ಹೊಂದಿಲ್ಲ ಎಂದು ತಜ್ಞರು ವಿವರಿಸಿದ್ದಾರೆ.
ದೆಹಲಿ ಧರ್ಮಶಿಲಾ ನಾರಾಯಣ ಸೂಪರ್‌ಸ್ಪೆಷಾಲಿಟಿ ಆಸ್ಪತ್ರೆಯ ಹೃದ್ರೋಗ ವಿಭಾಗದ ಮುಖ್ಯಸ್ಥ ಡಾ. ಸಮೀರ್ ಕುಬ್ಬಾ ಅವರ ಪ್ರಕಾರ, ಎಡ ಜೇಬಿನಲ್ಲಿ ಮೊಬೈಲ್ ಇಟ್ಟುಕೊಂಡಿದ್ದರಿಂದಲೇ ಹೃದಯದ ಬಡಿತದಲ್ಲಿ ಏರುಪೇರಾಗುತ್ತದೆ ಎಂದು ಹೇಳಲು ಸಾಧ್ಯವಿಲ್ಲ.
ಇನ್ನು ಮೊಬೈಲ್ ಜೇಬಿನಲ್ಲಿದ್ದಾಗ ಕಂಪಿಸಿದರೆ ಎದೆಯ ಭಾಗದಲ್ಲಿ ಅದರ ಕಂಪನವನ್ನು ನೇರವಾಗಿ ಅನುಭವಿಸಬಹುದು. ಹೃದಯದ ಬಡಿತದ ಬಗ್ಗೆ ಹೆಚ್ಚು ಗಮನ ಹರಿಸುವವರಿಗೆ ಈ ಕಂಪನವೇ ಹೃದಯದ ಬಡಿತ ಬದಲಾಗಿದೆ ಎಂಬ ಭಾವನೆ ಮೂಡಿಸಬಹುದು. ಆದರೆ ಮೊಬೈಲ್ ಕಂಪನವನ್ನು ಅನುಭವಿಸುವುದು ಹೃದಯದ ಲಯ ಅಸಹಜವಾಗಿದೆ ಎಂದರ್ಥವಲ್ಲ.
ಆದರೆ ಪೇಸ್‌ಮೇಕರ್ ಅಥವಾ ಐಸಿಡಿ (ಇಂಪ್ಲಾಂಟೆಡ್ ಕಾರ್ಡಿಯೋವೆರ್ಟರ್ ಡಿಫಿಬ್ರಿಲೇಟರ್) ಅಳವಡಿಸಿಕೊಂಡಿರುವವರು ಹೆಚ್ಚಿನ ಮುನ್ನೆಚ್ಚರಿಕೆ ವಹಿಸಬೇಕು. ಕೆಲವು ಮೊಬೈಲ್‌ಗಳು ಮತ್ತು ಎಲೆಕ್ಟ್ರಾನಿಕ್ ಸಾಧನಗಳಲ್ಲಿರುವ ಆಯಸ್ಕಾಂತಗಳು ಇಂತಹ ಹೃದಯ ಸಾಧನಗಳಿಗೆ ತುಂಬಾ ಹತ್ತಿರದಲ್ಲಿದ್ದರೆ ತಾತ್ಕಾಲಿಕವಾಗಿ ಅವುಗಳ ಕಾರ್ಯಕ್ಕೆ ಅಡ್ಡಿಯಾಗುವ ಸಾಧ್ಯತೆ ಇದೆ.
ಹೀಗಾಗಿ ಪೇಸ್‌ಮೇಕರ್ ಅಥವಾ ಐಸಿಡಿ ಹೊಂದಿರುವವರು ತಮ್ಮ ಸಾಧನ ತಯಾರಕರು ಸೂಚಿಸಿರುವ ಸುರಕ್ಷಿತ ಅಂತರ ಹಾಗೂ ಮೊಬೈಲ್ ಇಡುವ ವಿಧಾನವನ್ನು ಕಡ್ಡಾಯವಾಗಿ ಪಾಲಿಸಬೇಕು.
Join WhatsApp
