19.5 C
Gadag
Saturday, December 10, 2022
spot_img
Home Blog

ಮಾರಕಾಸ್ತ್ರ ಬಳಕೆ ತಡೆಗೆ ರೌಡಿ ಸ್ಕ್ವಾಡ್; 6 ಜನರ ಗಡಿಪಾರಿಗೆ ಶಿಪಾರಸು, 12 ಜನರ ವಿರುದ್ಧ ಕೇಸ್-ಎಸ್ಪಿ ಶಿವಪ್ರಕಾಶ್

0

ಹೆಚ್ಚುತ್ತಿರುವ ಚಾಕು ಇರಿತದ ಪ್ರಕರಣ; ತಡೆಗಟ್ಟಲು ಪೊಲೀಸ್ ಇಲಾಖೆ ಸಜ್ಜು- ಎಸ್ಪಿ ಶಿವಪ್ರಕಾಶ್ ದೇವರಾಜು ಮಾಹಿತಿ

ವಿಜಯಸಾಕ್ಷಿ ಸುದ್ದಿ, ಗದಗ

ಚಾಕು ಇರಿತದ ಪ್ರಕರಣಗಳು ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಜಿಲ್ಲೆಯಲ್ಲಿ ಪ್ರತ್ಯೇಕವಾದ ರೌಡಿ ಸ್ಕ್ವಾಡ್ ರಚನೆ ಮಾಡಲಾಗುವುದು. ಅವಳಿ ನಗರದಲ್ಲಿ ಮಾರಕಾಸ್ತ್ರಗಳು ಇಲ್ಲ ಎನ್ನುವುದು ಖಚಿತವಾಗುವ ವರೆಗೂ ಈ ಸ್ಕ್ವಾಡ್ ನಿರಂತರವಾಗಿ ಕೆಲಸ ನಿರ್ವಹಿಸಲಿದೆ. ನೇರವಾಗಿ ನನ್ನ ಮಾರ್ಗದರ್ಶನದಲ್ಲಿಯೇ ಈ ಸ್ಕ್ವಾಡ್ ಕಾರ್ಯ ನಿರ್ವಹಿಸಲಿದೆ. ಅಂದಾಜು ಮೂರರಿಂದ ನಾಲ್ಕು ತಿಂಗಳು ಈ ಸ್ಕ್ವಾಡ್ ಕೆಲಸ ಮಾಡಲಿದೆ ಎಂದು ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಶಿವಪ್ರಕಾಶ್ ದೇವರಾಜು ಹೇಳಿದರು.

ಶುಕ್ರವಾರ ಸಂಜೆ ಪತ್ರಿಕಾಗೋಷ್ಠಿಯಲ್ಲಿ ಈ ಮಾಹಿತಿ ನೀಡಿದ ಅವರು, ಗದಗ ಬೆಟಗೇರಿ ಅವಳಿ ನಗರದಲ್ಲಿ ವಾರದಲ್ಲಿ ಎರಡು ಚಾಕು ಇರಿತ ಪ್ರಕರಣಗಳು ಸಂಭವಿಸಿದ್ದರಿಂದ ಶುಕ್ರವಾರ ದಿಢೀರ್ ತಪಾಸಣೆ ಕೈಗೊಂಡು ಮಾರಕಾಸ್ತ್ರ ಹೊಂದಿರುವ ಸಂಶಯಾಸ್ಪದ ವ್ಯಕ್ತಿಗಳ ವಿರುದ್ಧ ದೂರು ದಾಖಲಿಸಲಾಗಿದೆ ಎಂದರು.

ಅವಳಿ ನಗರದಲ್ಲಿ ಚಾಕು ಇರಿತ ಪ್ರಕರಣಗಳು ಹೆಚ್ಚುತ್ತಿರುವುದರಿಂದ ಎರಡ್ಮೂರು ದಿನಗಳಿಂದ ಶೋಧ ಕಾರ್ಯ ನಡೆಸಲಾಗುತ್ತಿತ್ತು. ಈ ಅವಧಿಯಲ್ಲಿ ಸಂಶಯಾಸ್ಪದ ಒಟ್ಟು 12 ಜನರ ವಿರುದ್ಧ ಸಿಆರ್‌ಪಿಸಿ 110(ಇ) ಮತ್ತು (ಜಿ), 107 ಅಡಿಯಲ್ಲಿ ಪ್ರಕರಣ ದಾಖಲಾಗಿದೆ. ಈ ಪೈಕಿ ಕೆಲವರು ರೌಡಿ ಶೀಟರ್ ಪಟ್ಟಿಯಲ್ಲಿ ಇದ್ದಾರೆ ಎಂದು ತಿಳಿಸಿದರು.

ಸಂಶಯಾಸ್ಪದ ವ್ಯಕ್ತಿಗಳ ಮನೆಗಳ ಶೋಧ ಕಾರ್ಯಾಚರಣೆಯಲ್ಲಿ ಚಾಕು, ಚೂರಿ, ತಲ್ವಾರ್ ಮತ್ತು ಜಿಂಕೆ ಕೊಂಬು ಪತ್ತೆಯಾಗಿದೆ. ವಶಕ್ಕೆ ಪಡೆದ ಮಾರಕಾಸ್ತ್ರಗಳು ಜನರ ಜೀವ ಹಾನಿಗೆ ಬಳಸುವ ಉದ್ದೇಶವಿತ್ತೊ ಅಥವಾ ಬೇರೆ ಉದ್ದೇಶಕ್ಕೆ ಬಳಸುತ್ತಿದ್ದರೊ ಎನ್ನುವ ಬಗ್ಗೆ ಪರಿಶೀಲನೆ ನಡೆಸಲಾಗುತ್ತಿದೆ. ಅದೇ ರೀತಿ ಜಿಂಕೆ ಕೊಂಬನ್ನು ಸಹ ಮಾರಕ ಆಯುಧವಾಗಿ ಬಳಸಲು ಉದ್ದೇಶಿಸಿದ್ದರೆ ಅಥವಾ ಸಾಗಾಟ ಮಾಡುವ ಉದ್ದೇಶವಿತ್ತೊ ಎನ್ನುವ ಬಗ್ಗೆಯೂ ತನಿಖೆ ನಡೆಯುತ್ತಿದೆ ಎಂದು ತಿಳಿಸಿದರು.

ಬಾರ್ ಮೇಲೆ ನಿಗಾ

ಅವಳಿ ನಗರದ ಬಾರ್ ಮತ್ತು ರೆಸ್ಟೋರೆಂಟ್‌ಗಳ ಬಳಿ ಮತ್ತು ರಾತ್ರಿ 9 ರಿಂದ 11 ಗಂಟೆ ವೇಳೆಗೆ ಇಂಥ ಅಹಿತಕರ ಘಟನೆಗಳು ನಡೆಯುತ್ತಿವೆ. ಹೀಗಾಗಿ ಈ ಅವಧಿಯಲ್ಲಿ ಪೊಲೀಸ್ ಗಸ್ತು ಹೆಚ್ಚಿಸಲಾಗುವುದು. ಕೆಲ ಮಾಂಸಾಹಾರಿ ಹೋಟೆಲ್, ಧಾಬಾಗಳಲ್ಲಿಯೂ ಅಕ್ರಮ ಮದ್ಯ ಸೇವನೆ ಮಾಡಿ, ಅಪರಾಧ ಕೃತ್ಯ ನಡೆಸಿದ್ದು ಕಂಡು ಬಂದಿದೆ. ಈ ಬಗ್ಗೆ ಜಿಲ್ಲಾಧಿಕಾರಿಗಳ ಜೊತೆ ಚರ್ಚೆ ನಡೆಸಿ ಕಠಿಣ ಕ್ರಮ ಕೈಗೊಳ್ಳಲಾಗುವುದು ಎಂದು ತಿಳಿಸಿದರು.

6 ಜನರ ಗಡಿಪಾರ

ಅವಳಿ ನಗರದಲ್ಲಿ ಅಪರಾಧ ಪ್ರಕರಣ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಒಟ್ಟು 6 ಜನರನ್ನು ಗಡಿಪಾರು ಮಾಡಲು ಉಪವಿಭಾಗಾಧಿಕಾರಿಗಳಿಗೆ ಪ್ರಸ್ತಾವನೆ ಸಲ್ಲಿಸಲಾಗಿದೆ ಎಂದು ಎಸ್ಪಿ ಶಿವಪ್ರಕಾಶ ದೇವರಾಜು ತಿಳಿಸಿದರು.

ಜನತೆ ಮಾರಕಾಸ್ತ್ರಗಳನ್ನು ಸಾರ್ವಜನಿಕವಾಗಿ ಪ್ರದರ್ಶಿಸುವುದು ಮತ್ತು ಇಟ್ಟುಕೊಳ್ಳುವುದು ಅಪರಾಧ. ಮಾರಕಾಸ್ತ್ರಗಳನ್ನು ಹೊಂದಿರುವುದು ಮತ್ತು ಬಳಕೆ ಮಾಡಿದ ಅಪರಾಧ ಪ್ರಕರಣ ಸಾಬೀತಾದರೆ 3 ರಿಂದ 14 ವರ್ಷದವರೆಗೆ ಜೈಲು ಶಿಕ್ಷೆಯಾಗುವ ಸಾಧ್ಯತೆಯಿದೆ. ಯಾರಾದರೂ ಮಾರಕಾಸ್ತ್ರಗಳನ್ನು ಹೊಂದಿದ್ದರೆ ಸಾರ್ವಜನಿಕರು ಅಂಥವರ ಬಗ್ಗೆ ಪೊಲೀಸ್ ಇಲಾಖೆಗೆ ದೂರು ನೀಡಬೇಕು.

-ಶಿವಪ್ರಕಾಶ್ ದೇವರಾಜು, ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ

`ಬಿಂಕದಕಟ್ಟಿ ಪ್ರಾಣಿ ಸಂಗ್ರಹಾಲಯಕ್ಕೆ ಹೆಜ್ಜೆಯಿಟ್ಟ ಶಿವ-ಗಂಗಾ’

0

ಹೊಸ ಅತಿಥಿಗಳ ಗತ್ತು-ಗೈರತ್ತು ನೋಡಿ ನಿಬ್ಬೆರಗಾದ ಪುಟಾಣಿಗಳು

ವಿಜಯಸಾಕ್ಷಿ ಸುದ್ದಿ, ಗದಗ

ಅವಳಿ ನಗರದಲ್ಲಿ ಗುರುವಾರ ಸಂಭ್ರಮ-ಸಡಗರ ಮನೆಮಾಡಿ, ಎಲ್ಲೆಲ್ಲೂ ಹಬ್ಬದ ವಾತಾವರಣವೇ ಸೃಷ್ಟಿಯಾಗಿತ್ತು. ಸಿಬ್ಬಂದಿಗಳು ರಾಜರ ಸ್ವಾಗತಕ್ಕೆ ಹಸಿರು ಕಾರ್ಪೆಟ್ ಹಾಕಿ, ತಳಿರು- ತೋರಣ, ಹೂವುಗಳಿಂದ ಸಿಂಗಾರ ಮಾಡಿದ್ದರು. ರಂಗೋಲಿ ಚಿತ್ತಾರದ ಮೂಲಕ ಕಾಡಿನ ರಾಜರ ಸ್ವಾಗತಕ್ಕೆ ಭರ್ಜರಿ ತಯಾರಿಯನ್ನೇ ಮಾಡಲಾಗಿತ್ತು. ಘರ್ಜಿಸುವ ಮೂಲಕವೇ ಅವಳಿ ನಗರಕ್ಕೆ ಕಾಲಿಟ್ಟ ರಾಜ-ರಾಣಿಯ ಗತ್ತು-ಗಾಂಭೀರ್ಯ ಜೋರಾಗಿಯೇ ಇತ್ತೆನ್ನಿ. ಪುಟಾಣಿ ಮಕ್ಕಳಂತೂ ದೂರದಿಂದ ಗದುಗಿಗೆ ಬಂದ ಈ ಅಪರೂಪದ ರಾಜ-ರಾಣಿಯರನ್ನು ನೋಡಿ ಕಣ್ತುಂಬಿಕೊಂಡು, ಘರ್ಜನೆ ಕೇಳಿ ಖುಷಿ ಪಟ್ಟರು.

ಅಂದಹಾಗೆ, ಈಗ ಹೇಳುತ್ತಿರುವುದು, ಕಾಡಿನ ರಾಜ-ರಾಣಿಯರ ಬಗ್ಗೆ! ಮಧ್ಯಪ್ರದೇಶದ ಇಂಧೋರ್‌ನ ಕಮಲಾ ನೆಹರೂ ಪ್ರಾಣಿಸಂಗ್ರಹಾಲಯದಿಂದ ಬಿಂಕದಕಟ್ಟಿ ಪ್ರಾಣಿಸಂಗ್ರಹಾಲಯಕ್ಕೆ ಬಂದಿಳಿದ ಎರಡು ಸಿಂಹಗಳು ಪ್ರಾಣಿಪ್ರಿಯರಿಗೆ, ಪ್ರವಾಸಿಗರನ್ನು ಪ್ರಾಣಿಸಂಗ್ರಹಾಲಯದತ್ತ ಆಕರ್ಷಿಸುತ್ತಿವೆ. ಹೀಗಾಗಿ, ಗದಗ-ಬೆಟಗೇರಿಯ ಬಯಲು ಸೀಮೆ ನಾಡಿನ ಜನರಿಗೆ ಈಗ ಸಿಂಹಗಳನ್ನೂ ನೋಡುವ ಭಾಗ್ಯ ಸಿಕ್ಕಂತಾಗಿದೆ.

ಮೂರುವರೆ ವರ್ಷದ ಗಂಡು ಸಿಂಹ ಶಿವ, ಎರಡೂವರೆ ವರ್ಷದ ಹೆಣ್ಣು ಸಿಂಹ ಗಂಗಾ ಗದಗ ಝೂ ಪ್ರವೇಶಿಸಿದ್ದಾರೆ. ಉತ್ತರ ಕರ್ನಾಟಕ ಭಾಗದ ಜನರಿಗೆ ಹುಲಿ, ಸಿಂಹಗಳೂ ಸೇರಿ ಕಾಡು ಪ್ರಾಣಿಗಳನ್ನು ನೋಡುವ ಭಾಗ್ಯ ಕಡಿಮೆಯೇ. ಈಗ ಎರಡು ಹೊಸ ಸಿಂಹಗಳ ಆಗಮನದಿಂದ ಈ ಭಾಗದ ಜನರು ಹೊಸಬರ ದರ್ಶನವನ್ನೂ ಮಾಡುವಂತಾಗಿದೆ.

ಬಿಂಕದಕಟ್ಟಿಗೆ ಆಗಮಿಸಿದ ಸಿಂಹಗಳು ಏಶಿಯಾಟಿಕ್ ತಳಿ ಸಿಂಹಗಳಾಗಿದ್ದು, ಗದಗ ಕಪಿಲ್ ಹಾಗೂ ಕಸ್ತೂರಿ ಹೆಸರಿನ ಎರಡು ತೋಳಗಳನ್ನು ಕೊಟ್ಟು, ಈ ಎರಡು ಸಿಂಹಗಳನ್ನು ವಿನಿಮಯ ಮಾಡಿ ತರಲಾಗಿದೆ. ಮೃಗಾಲಯದಲ್ಲಿ ಈಗಾಗಲೇ ವಯಸ್ಸಾದ ಅರ್ಜು, ಧರ್ಮ ಎಂಬ ಎರಡು ಸಿಂಹಗಳಿದ್ದು, ಇವುಗಳಿಗೆ ಸಾಥ್ ನೀಡಲು ಮತ್ತೆರಡು ಸಿಂಹಗಳು ಆಗಮಿಸಿವೆ. ಸಿಂಹಗಳನ್ನು ಗುಹೆಯಿಂದ ಹೊರಬಿಡುವ ಮೂಲಕ ಗದಗ ಶಾಸಕ ಎಚ್.ಕೆ. ಪಾಟೀಲ್ ಸಾರ್ವಜನಿಕ ವೀಕ್ಷಣೆಗೆ ನಿಶಾನೆ ತೋರಿಸಿದರು.

ಗದಗನ ಬಿಂಕದಕಟ್ಟ ಪ್ರಾಣಿ ಸಂಗ್ರಹಾಲಯ ರಜತ ಮಹೋತ್ಸವ ಆಚರಣೆಗೆ ಸಜ್ಜಾಗಿದೆ. ಮೈಸೂರು ಮೃಗಾಲಯದ ನಂತರ ದೊಡ್ಡದಾಗಿ ಬೆಳೆದ ಪ್ರಾಣಿಸಂಗ್ರಹಾಲಯ ಇದಾಗಿದೆ. ಹಲವಾರು ಪಕ್ಷಿ, ಪ್ರಾಣಿಗಳೂ ಸೇರಿ, ಇದೀಗ ಕಾಡಿನ ರಾಜ ಸಿಂಹವನ್ನೂ ನೋಡುವ ಭಾಗ್ಯ ಸಿಕ್ಕಂತಾಗಿದೆ.

ಮೊದಲ ದಿನವೇ ಹೊಸ ಸಿಂಹಗಳ ನೋಡಲು ನೂರಾರು ಶಾಲಾ ಮಕ್ಕಳು ಆಗಮಿಸಿದ್ದರು. ಸಿಂಹಗಳು ನೋಡಿ ಸಂತಸಪಟ್ಟರು.

ಬಿಂಕದಕಟ್ಟಿ ಮೃಗಾಲಯ ತನ್ನ ರಜತಮಹೋತ್ಸವ ಆಚರಿಸಲು ಸಿದ್ಧವಾಗುತ್ತಿದೆ. ಕರ್ನಾಟಕದಲ್ಲಿ ಮೈಸೂರು ಝೂ ನಂತರ ದೊಡ್ಡ ಪ್ರಮಾಣದಲ್ಲಿ ಪ್ರಾರಂಭವಾದ ಈ ಸ್ಥಳ ವಿಧವಿಧವಾದ ಪ್ರಾಣಿ-ಪಕ್ಷಿಗಳೊಂದಿಗೆ ಈಗ, ಕಾಡಿನ ರಾಜ ಸಿಂಹವೂ ಬಂದು ಸೇರಿದೆ. ಇಬ್ಬರನ್ನೂ ಅದ್ಧೂರಿಯಾಗಿ ಸ್ವಾಗತಿಸಿದ್ದೇವೆ. ರಾಜ್ಯದಲ್ಲಿಯೇ ಪ್ರಸಿದ್ಧ ಮೃಗಾಲಯವನ್ನಾಗಿ ಅಭಿವೃದ್ಧಿಪಡಿಸಲು ನಾವು ಉತ್ಸುಕರಾಗಿದ್ದೇವೆ. ಅರಣ್ಯ ಸಚಿವರಾಗಿದ್ದ ಉಮೇಶ ಕತ್ತಿಯವರೊಂದಿಗೆ ಈ ಮೃಗಾಲಯದ ಅಭಿವೃದ್ಧಿಯ ಬಗ್ಗೆ ಚರ್ಚಿಸಿದ್ದೆವು.

-ಎಚ್ ಕೆ.ಪಾಟೀಲ್, ಶಾಸಕರು

ಸಿಂಹಗಳಿಗೆ ನೀರು ಕುಡಿಸಿ, ಆಹಾರ ನೀಡುತ್ತ ಇಂಧೋರ್‌ನಿಂದ ಗದಗ ತಲುಪಲು ನಮಗೆ ಒಂದು ಇಡೀ ದಿನವೇ ಬೇಕಾಯಿತು. ಮೊದಲು 20-25 ದಿನಗಳ ಕಾಲ ಎರಡು ಸಿಂಹಗಳನ್ನು ಕ್ವಾರಂಟೈನಲ್ಲಿ ಇಡಲಾಗುತ್ತದೆ. ಇಲ್ಲಿನ ವಾತಾವರಣ, ಆಹಾರ ಪದ್ಧತಿಗಳಿಗೆ ಹೊಂದಿಕೊಳ್ಳಬೇಕು. ಅವುಗಳಿಗೂ ಇಲ್ಲಿನ ವಾತಾವರಣಕ್ಕೆ ಹೊಂಡಿಕೊಳ್ಳುತ್ತೇವೆಂಬ ವಿಶ್ವಾಸ ಮೂಡಬೇಕಿದೆ. ಹೀಗಾಗಿ 25 ದಿನಗಳ ನಂತರ ಸಾರ್ವಜನಿಕರ ವೀಕ್ಷಣೆಗೆ ಅವಕಾಶ ಕಲ್ಪಿಸಲಾಗುತ್ತದೆ.

-ಡಾ. ಪ್ರಕಾಶ್ ಜಟ್ಟೆಣ್ಣವರ್. ವೈದ್ಯರು

ಪ್ರಾಣಿಗಳನ್ನು ದತ್ತು ಪಡೆದುಕೊಳ್ಳುವ ಯೋಜನೆಯೊಂದನ್ನು ಸರ್ಕಾರ ಪ್ರಾರಂಭಿಸಿದೆ. ಈ ಯೋಜನೆಯಡಿ ಯಾವುದಾದರೊಂದು ಪ್ರಾಣಿಯನ್ನು ದತ್ತು ಪಡೆದುಕೊಳ್ಳಬಹುದಾಗಿದೆ. ಈಗಾಗಲೇ ಪ್ರಾಣಿಪ್ರಿಯರು ಹುಲಿ, ಕರಡಿ ಇತ್ಯಾದಿ ಪ್ರಾಣಿಗಳನ್ನು ದತ್ತು ಪಡೆದಿದ್ದಾರೆ. ಈಗ ಹೊಸದಾಗಿ ಆಗಮಿಸಿರುವ ಸಿಂಹಗಳನ್ನು ಯಾರಾದರೂ ದತ್ತು ಪಡೆಯಲು ಆಸಕ್ತರಿದ್ದರೆ ಇಲಾಖೆಯನ್ನು ಸಂಪರ್ಕಿಸಬಹುದಾಗಿದೆ.

-ದೀಪಿಕಾ ವಾಜಪೇಯಿ, ಡಿಎಫ್ಓ, ಗದಗ

ಗದಗನಲ್ಲಿ ಚಾಕು ಇರಿತ ಪ್ರಕರಣದ ಹಿನ್ನೆಲೆ; ಬೆಳ್ಳಂಬೆಳಗ್ಗೆ ಪೊಲೀಸರ ಕಾರ್ಯಾಚರಣೆ, ಚಾಕು, ಕಂದ್ಲಿ ಜಪ್ತಿ

ಡಿವೈಎಸ್ಪಿ ನೇತೃತ್ವದಲ್ಲಿ ನೂರಾರು ಪೊಲೀಸರ

ವಿಜಯಸಾಕ್ಷಿ ಸುದ್ದಿ, ಗದಗ

ಕಳೆದ ಹಲವು ದಿನಗಳಿಂದ ಅವಳಿ ನಗರದಲ್ಲಿ ಹೆಚ್ಚುತ್ತಿರುವ ಪುಂಡ ಪೋಕರಿಗಳ ಹಾವಳಿ ತಡೆಗಟ್ಟಲು ಪೊಲೀಸರು ಬೆಳ್ಳಂಬೆಳಿಗ್ಗೆ ಕಾರ್ಯಾಚರಣೆಗೆ ಇಳಿದಿದ್ದಾರೆ.

ಒಂದೇ ವಾರದಲ್ಲಿ ಚಾಕು ಇರಿತದ ಎರಡು ಪ್ರಕರಣಗಳು ನಡೆದ ಬೆನ್ನಲ್ಲೇ ಅಲರ್ಟ್ ಆಗಿರುವ ಪೊಲೀಸರು, ಡಿವೈಎಸ್ಪಿ ಶಿವಾನಂದ ಪವಾಡಶೆಟ್ಟರ್ ನೇತೃತ್ವದಲ್ಲಿವ ಹಲವು ಪ್ರದೇಶಗಳಲ್ಲಿ ಮನೆ ಮೆನೆಗಳ ಸರ್ಚಿಂಗ್ ನಡೆಸಿದರು.

ಗದಗ ಶಹರ ಹಾಗೂ ಬೆಟಗೇರಿ ಠಾಣೆಯ ನೂರಾರು ಪೊಲೀಸರು, ಕಮ್ಮಾರ ಸಾಲ ಹಾಗೂ ರಂಗನವಾಡಿ ಗಲ್ಲಿಯ ಅನುಮಾನಾಸ್ಪದ ಮನೆಗಳಲ್ಲಿ ಶೋಧ ನಡೆಸಿದ್ದು, ಕೆಲ ಮನೆಗಳಲ್ಲಿ ಚಾಕು, ಕಂದ್ಲಿಗಳು ಹಾಗೂ ರಾಡ್ ಪತ್ತೆಯಾಗಿವೆ ಎನ್ನಲಾಗಿದೆ.

ಇಬ್ಬರು ಸಿಪಿಐ, ಪಿಎಸ್ಐ ಸೇರಿದಂತೆ ಹಲವು ಅಧಿಕಾರಿಗಳು ಈ ಕಾರ್ಯಾಚರಣೆಯಲ್ಲಿ ಇದ್ದರು.

ಗ್ರಾಮ ಪಂಚಾಯತಿಯಲ್ಲಿ ಪಿಡಿಒ, ಕಾರ್ಯದರ್ಶಿಗಳಿಲ್ಲ, ಸದಸ್ಯರ ಗೋಳು ಕೇಳೋರಿಲ್ಲ!!

0

ಸೋಮನಕಟ್ಟಿ ಗ್ರಾಪಂಗೆ ಮುತ್ತಿಗೆ ಹಾಕಿ ಪ್ರತಿಭಟಿಸಿದ ಗ್ರಾಮಸ್ಥರು

ವಿಜಯಸಾಕ್ಷಿ ಸುದ್ದಿ, ರೋಣ

ತಾಲೂಕಿನ ಹುಲ್ಲೂರ ಗ್ರಾಪಂಗೆ ಒಳಪಡುವ ಸೋಮನಕಟ್ಟಿ ಗ್ರಾಮಕ್ಕೆ ಕಳೆದ ತಿಂಗಳಿನಿಂದ ಕುಡಿಯುವ ನೀರು ಪೂರೈಕೆಯಾಗದಿರುವುದನ್ನು ಖಂಡಿಸಿ ಗ್ರಾಮಸ್ಥರು ಗುರುವಾರ ಗ್ರಾಪಂಗೆ ಮುತ್ತಿಗೆ ಹಾಕುವ ಮೂಲಕ ಪ್ರತಿಭಟನೆಯನ್ನು ನಡೆಸಿದರು.

ಗ್ರಾಮಕ್ಕೆ ಒಂದು ತಿಂಗಳಿನಿಂದ ಕುಡಿಯುವ ನೀರು ಪೂರೈಕೆಯಾಗುತ್ತಿಲ್ಲ. ಅಲ್ಲದೆ ದನ ಕರುಗಳನ್ನು ಬಿಡುವ ನೀರಿನ ಕೆರೆಯಿಂದ ಕುಡಿಯಲು ನೀರು ತರುವ ಸ್ಥಿತಿ ಗ್ರಾಮದಲ್ಲಿ ನಿರ್ಮಾಣವಾಗಿದೆ. ಈ ವಿಷಯವನ್ನು ಗ್ರಾಪಂನವರಿಗೆ ತಿಳಿಸಿದರೂ ಸಹ ಸಮಸ್ಯೆ ಬಗೆಹರಿಸುತ್ತಿಲ್ಲ. ಹೀಗಾದರೆ ಗ್ರಾಮದಲ್ಲಿನ ನಾಗರಿಕರನ್ನು ಕಾಪಾಡುವರ‍್ಯಾರು ಎಂದು ಪ್ರಶ್ನಿಸುವ ಮೂಲಕ ಗ್ರಾಪಂ ಆಡಳಿತ ವ್ಯವಸ್ಥೆ ವಿರುದ್ಧ ಧಿಕ್ಕಾರ ಕೂಗಿದರು.

ಈ ಸಂದರ್ಭದಲ್ಲಿ ಪ್ರತಿಭಟನಾ ನಿರತರ ಜೊತೆಗೆ ಸದಸ್ಯರು ಚರ್ಚಿಸಲು ಬರುತ್ತಿದ್ದಂತೆ ಮೊದಲು ಕುಡಿಯಲು ನೀರು ಕೊಡಿ, ಆಮೇಲೆ ನಮ್ಮ ಜೊತೆ ಚರ್ಚೆಗೆ ಬನ್ನಿ ಎಂದು ಪಟ್ಟು ಹಿಡಿಯುವ ಜೊತೆಗೆ ಸೋಮನಕಟ್ಟಿ ಗ್ರಾಮದ ಸದಸ್ಯರು ಸಹ ಸ್ಥಳಕ್ಕೆ ಬರಬೇಕು ಎಂದು ಆಗ್ರಹ ಮಾಡಿದರು. ಆಗ ಉಪಾಧ್ಯಕ್ಷ ಬಸವರಾಜ ಬ್ಯಾಳಿಯವರು ದೂರವಾಣಿ ಮೂಲಕ ಗ್ರಾಮದ ಗ್ರಾಪಂ ಸದಸ್ಯರನ್ನು ಸಂಪರ್ಕಿಸಿ ಪ್ರತಿಭಟನಾ ನಿರತ ಸ್ಥಳಕ್ಕೆ ಬರುವಂತೆ ಸೂಚಿಸಿದರು.

ಗ್ರಾಪಂ ಅಧ್ಯಕ್ಷೆ ನಂದಾ ಬರಡ್ಡಿಯವರ ಸಂಧಾನ ಸಹ ವಿಫಲಗೊಂಡಿತು. ನಂತರ ಅಧ್ಯಕ್ಷ, ಉಪಾಧ್ಯಕ್ಷ ಹಾಗೂ ಸದಸ್ಯರ ಸಭೆ ನಡೆಸುವ ಮೂಲಕ ಪ್ರತಿಭಟನಾ ನಿರತರ ಮನವೊಲಿಕೆಗೆ ನಿರ್ಧಾರ ಮಾಡಿದ ಘಟನೆ ಸಹ ನಡೆಯಿತು.

ಸಭೆಯ ನಂತರ ಉಪಾಧ್ಯಕ್ಷ ಬಸವರಾಜ ಬ್ಯಾಳಿ, ಸದಸ್ಯ ಅಶೋಕ ಗಟ್ಟಿ ಹಾಗೂ ಸೋಮನಕಟ್ಟಿ ಗ್ರಾಮದ ಸದಸ್ಯರು ಪ್ರತಿಭಟನಾ ನಿರತರನ್ನು ಉದ್ದೇಶಿಸಿ ೨೪ ಗಂಟೆಯಲ್ಲಿ ಸಮಸ್ಯೆಯನ್ನು ಬಗೆಹರಿಸಿ ಕುಡಿಯುವ ನೀರು ಪೂರೈಕೆ ಮಾಡಲು ಅಗತ್ಯ ಕ್ರಮ ತೆಗೆದುಕೊಳ್ಳಲಾಗುವುದು ಎಂದು ಭರವಸೆ ನೀಡಿದರು.

ಇದಕ್ಕೆ ಒಪ್ಪಿದ ಪ್ರತಿಭಟನಾ ನಿರತರು ನಿಮ್ಮ ಮಾತಿಗೆ ಬೆಲೆ ಕೊಟ್ಟು ಪ್ರತಿಭಟನೆಯನ್ನು ವಾಪಸ್ಸು ಪಡೆಯುತ್ತಿದ್ದು, ನೀವು ಕೊಟ್ಟ ಮಾತನ್ನು ಉಳಿಸಿಕೊಳ್ಳಿ, ತಪ್ಪಿದರೆ ಪ್ರತಿಭಟನೆ ಅನಿವಾರ್ಯವಾಗಲಿದೆ ಎಂದರು.

ಸುನಂದ ಬಡಿಗೇರ, ಸುಜಾತ ಶೆಟ್ಟರ, ಶರಣವ್ವ ಭಜಂತ್ರಿ, ರಾಜವ್ವ ಕೌಜಗೇರಿ, ಹನಮವ್ವ ಕುರಿ, ಬಸವ್ವ ಮೆಣಸಗಿ, ಚಂದ್ರಿಕಾ ಮಡ್ಡಿ ಸೇರಿದಂತೆ ಸ್ವಾಭಿಮಾನಿ ಕರ್ನಾಟಕ ರಕ್ಷಣಾ ವೇದಿಕೆಯ ಪದಾಧಿಕಾರಿಗಳು ಉಪಸ್ಥಿತರಿದ್ದರು.

ಸಾರ್ವಜನಿಕರ ಸಮಸ್ಯೆಗಳನ್ನು ಆಲಿಸಲು ಗ್ರಾಪಂ ಸದಸ್ಯರುಗಳಿದ್ದಾರೆ. ಆದರೆ ಸದಸ್ಯರ ಸಮಸ್ಯೆಗಳನ್ನು ಆಲಿಸಲು ಗ್ರಾಪಂನಲ್ಲಿ ಯಾವ ಅಧಿಕಾರಿಗಳಿದ್ದಾರೆ? ಪಿಡಿಒ ಇಲ್ಲ, ಇದ್ದ ಕಾರ್ಯದರ್ಶಿಯನ್ನು ತಾಪಂ ಇಒರವರು ತಮ್ಮ ಕಚೇರಿಗೆ ತೆಗೆದುಕೊಂಡಿದ್ದು, ನಾವು ಯಾರ ಬಳಿ ಸಮಸ್ಯೆಗಳ ನಿವಾರಣೆಗೆ ಮನವಿ ಮಾಡೋಣ? ಒಂದು ರೀತಿಯಲ್ಲಿ ಗ್ರಾಪಂ ಎನ್ನುವುದು ಕೊಂಗವಾಡದಂತೆ ಆಗಿಬಿಟ್ಟಿದೆ ಎಂದು ಸದಸ್ಯರು ಮಾಧ್ಯಮದವರ ಮುಂದೆ ಅಳಲು ತೊಡಿಕೊಂಡರು.

ಶಹರ ಪೊಲೀಸರ ಕಾರ್ಯಚರಣೆ; ರಾಬರಿಗೆ ಸಂಚು ರೂಪಿಸಿದ್ದ ಇಬ್ಬರು ಸೇರಿ ನಾಲ್ವರು ರೌಡಿ ಶೀಟರ್ಸ್ ಬಂಧನ

ವಿಜಯಸಾಕ್ಷಿ ಸುದ್ದಿ, ಗದಗ

ರಾಬರಿ ಮಾಡಲು ಸಂಚು ರೂಪಿಸಿದ್ದ ಆರೋಪದಲ್ಲಿ ಇಬ್ಬರು ರೌಡಿ ಶೀಟರ್ಸ್ ಸೇರಿದಂತೆ ನಾಲ್ವರನ್ನು ಶಹರ ಪೊಲೀಸರು ಕಾರ್ಯಚರಣೆ ನಡೆಸಿ ಬಂಧಿಸಿದ್ದಾರೆ.

ಗದಗ ಶಹರದ ವೀರಶೈವ ಲೈಬ್ರರಿ ಹತ್ತಿರ ತೆಗ್ಗಿನಲಾಟದ ಉಮೇಶ್ ಅಲಿಯಾಸ್ ಕುಮಡಿ ತಂದೆ ಬಸವರಾಜ್ ಕವಲೂರ ಹಾಗೂ ಕಮ್ಮಾರ ಓಣಿಯ ವಿನೋದ್ ಅಲಿಯಾಸ್ ಡುಮ್ಮ ವಿನ್ಯಾ ತಂದೆ ಕೃಷ್ಣಾ ಚವ್ಹಾಣ ಎಂಬುವರನ್ನು ಬಂಧಿಸಿ ಅವರಿಂದ ಚೈನ್ ಹಾಗೂ ಪಂಚ್ ವಶಪಡಿಸಿಕೊಳ್ಳಲಾಗಿದೆ ಎಂದು ಇನ್ಸ್‌ಪೆಕ್ಟರ್ ಜಯಂತ ಗೌಳಿ ಮಾಹಿತಿ ನೀಡಿದ್ದಾರೆ.

ಈ ಕುರಿತು 393 r/w 34 IPC ಕಲಂ ಅಡಿ ಪ್ರಕರಣ ದಾಖಲಾಗಿದೆ ಎಂದು ಪೊಲೀಸ್ ಮೂಲಗಳು ತಿಳಿಸಿವೆ.

ಮುಂಜಾಗ್ರತಾ ಕ್ರಮವಾಗಿ 110 ಕಲಂ ಅಡಿಯಲ್ಲಿ ವಸಂತ ಪರಶುರಾಮ ಅರಕೇರಿ ಹಾಗೂ ಮಂಜುನಾಥ್ ಮಹೇಶ್ ವಾಲ್ಮೀಕಿ ಎಂಬುವರನ್ನು ಕೂಡ ಬಂಧಿಸಲಾಗಿದೆ.

ಶಹರ ಠಾಣೆಯ ಇನ್ಸ್‌ಪೆಕ್ಟರ್ ಜಯಂತ ಗೌಳಿ, ಪಿಎಸ್ಐ ರೇಣುಕಾ ಮುಂಡೆವಾಡಗಿ ಹಾಗೂ ಸಿಬ್ಬಂದಿ ಕಾರ್ಯಚರಣೆ ನಡೆಸಿದ್ದರು.

ದ್ವಿಚಕ್ರ ವಾಹನ ಮುಗುಚಿ ಗ್ರಾಮ ಪಂಚಾಯತಿ ಕಾರ್ಯದರ್ಶಿ ಸಾವು

ಶಿವಪ್ಪ ಮೃತಪಟ್ಟ ಗ್ರಾಮ ಪಂಚಾಯತಿ ಕಾರ್ಯದರ್ಶಿ

ವಿಜಯಸಾಕ್ಷಿ ಸುದ್ದಿ, ರೋಣ

ರೋಣದಿಂದ ಬೈಕ್ ನಲ್ಲಿ ಅಬ್ಬಿಗೇರಿ ಮಾರ್ಗವಾಗಿ ಕೋಟುಮಚಗಿ ಗ್ರಾಮಕ್ಕೆ ತೆರಳುತ್ತಿದ್ದ ಗ್ರಾಮ ಪಂಚಾಯತಿ ಕಾರ್ಯದರ್ಶಿಯೊಬ್ಬರು ನಿಯಂತ್ರಣ ಕಳೆದುಕೊಂಡು ಬೈಕ್ ಸ್ಕಿಡ್ ಆದ ಪರಿಣಾಮವಾಗಿ ಮೃತಪಟ್ಟ ಘಟನೆ ಜರುಗಿದೆ.

ರೋಣ ತಾಲೂಕಿನ ಕೌಜಗೇರಿ ಗ್ರಾಮ ಪಂಚಾಯತಿ ಕಾರ್ಯದರ್ಶಿ ಶಿವಪ್ಪ ವೀರಪ್ಪ ಗಂಗಪ್ಪನವರ (48) ಎಂಬುವರೇ ಬೈಕ್ ಸ್ಕಿಡ್ ಆದ ಪರಿಣಾಮ ಹುಬ್ಬು ಹಾಗೂ ಕಣ್ಣಿನ ಕೆಳಭಾಗದಲ್ಲಿ ಗಾಯವಾಗಿದೆ. ಅದೇ ಮಾರ್ಗದಲ್ಲಿ ಹೋಗುತ್ತಿದ್ದ ಕೋಟುಮಚಗಿ ಗ್ರಾಮದ ಜನ ಗಮನಿಸಿ ರೋಣ ಸರಕಾರಿ ಆಸ್ಪತ್ರೆಗೆ ಕರೆದುಕೊಂಡು ಹೋಗುತ್ತಿದ್ದಾಗ ಮಾರ್ಗಮಧ್ಯದಲ್ಲಿ ಶಿವಪ್ಪ ಮೃತಪಟ್ಟಿದ್ದಾರೆ.

ಈ ಕುರಿತು ರೋಣ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಪ್ರೀತಿಗಾಗಿ ಪ್ರಾಣ ಕೊಡ್ತೀನಿ ಅಂದ; ತಾನೇ ತಂದ ಚಾಕುವಿನಿಂದ ಗಾಯಗೊಂಡು ಆಸ್ಪತ್ರೆ ಸೇರಿದ!

ಚಾಕು ಇರಿತ ಪ್ರಕರಣದ ಅಸಲಿ ಕಹಾನಿ.

ವಿಜಯಸಾಕ್ಷಿ ಸುದ್ದಿ, ಗದಗ

ತಾನು ಪ್ರೀತಿ ಮಾಡುತ್ತಿದ್ದ ಹುಡುಗಿಯ ನಿಶ್ಚಿತಾರ್ಥ ಆಗಿದ್ದಕ್ಕೆ ಆಕ್ರೋಶಗೊಂಡ ಯುವಕನೊಬ್ಬ ಯುವತಿಯ ಮನೆಗೆ ನುಗ್ಗಿ ಮನೆ ಮಂದಿಗೆ ಜೀವ ಬೆದರಿಕೆ ಹಾಕಿ, ತಾನೇ ತಂದಿದ್ದ ಚಾಕುವಿನಿಂದ ಹೆದರಿಸಲು ಹೋಗಿ ಗಾಯಗೊಂಡು ಆಸ್ಪತ್ರೆಗೆ ದಾಖಲಾದ ಘಟನೆ ಗದಗ ನಗರದಲ್ಲಿ ನಿನ್ನೆ ರಾತ್ರಿ ನಡೆದಿದೆ.

ಹುಡ್ಕೋ ಕಾಲೋನಿಯ ನೀಲಮ್ಮತಾಯಿ ಮಠದ ಹತ್ತಿರದ ಮನೆಯೊಂದಕ್ಕೆ ನುಗ್ಗಿದ ಆರೋಪಿ ಕಮ್ಮಾರ ಓಣಿಯ ಅಭಿಷೇಕ ಅಲಿಯಾಸ್ ಅಭಿ ಹನಮಂತಪ್ಪ ನಾಯ್ಕರ್ ಎಂಬಾತ ತಾನು ಪ್ರೀತಿ ಮಾಡುತ್ತಿದ್ದ ಹುಡುಗಿಯ ಮನೆಗೆ ನುಗ್ಗಿ ಮನೆಯಲ್ಲಿದ್ದ ಸಾಮಾನುಗಳನ್ನು ಒದ್ದು ಅವಾಚ್ಯವಾಗಿ ಬೈದಾಡುತ್ತಿದ್ದಾಗ ಮನೆಯಲ್ಲಿ ಇದ್ದ ಜನರು ಯಾಕೆ ಬೈಯಿತೀದಿ ಅಂದಾಗ ಮನೆಯಿಂದ ಹೊರಗೆ ಹೋದವನೇ ಜೋರಾಗಿ ನಿಮ್ಮ ಹುಡುಗಿಯನ್ನು ನಾನು ಪ್ರೀತಿ ಮಾಡ್ತೀನಿ, ಬೇರೆದವರ ಜೊತೆಗೆ ನಿಶ್ಚಿತಾರ್ಥ ಮಾಡೀರಿ ಅಂತ ಅವಾಚ್ಯವಾಗಿ ಬೈದಾಡುತ್ತಾ ಇದ್ದಾಗ ಹುಡುಗಿಯ ತಾಯಿ ಯಾಕೆ ಬೈದಾಡ್ತೀ ಅಂತ ಕೇಳಿದಾಗ ಅವರ ಮೇಲೆ ಹಲ್ಲೆ ಮಾಡಿ, ಅವಮಾನ ಮಾಡಿದ್ದಾನೆ.

ಜಗಳ ಬಿಡಿಸಲು ಹೋದ ಪ್ರಮೋದ್ ಹಾಗೂ ವಿನೋದ್ ಸಹೋದರರ ಮೇಲೆ ಆರೋಪಿ ಅಭಿಷೇಕ ತಾನು ತಂದಿದ್ದ ಚಾಕು ಬೀಸಿದಾಗ ತನ್ನ ಎಡಗೈಗೆ ಗಾಯ ಮಾಡಿಕೊಂಡಿದ್ದಾನೆ.

ಆಗ ವಿನೋದ್ ಹಾಗೂ ಪ್ರಮೋದ್ ಜೊತೆಗೆ ಜಗಳಕ್ಕೆ ಇಳಿದಿದ್ದಾನೆ. ಈ ಸಂದರ್ಭದಲ್ಲಿ ಅಭಿಷೇಕ ತನ್ನ ಎದೆ ಭಾಗಕ್ಕೆ ಹಾಗೂ ರಟ್ಟೆಗೆ ಗಾಯಮಾಡಿಕೊಂಡಿದ್ದಾನೆ. ನಿಮ್ಮ ‌ಹುಡುಗಿಯನ್ನು ಯಾವುದೇ ಕಾರಣಕ್ಕೂ ನನ್ನ ಬಿಟ್ಟು ಬೇರೆದವರಿಗೆ ಮದುವೆ ಮಾಡಿಕೊಡಬೇಡಿ, ಒಂದು ವೇಳೆ ನೀವು ಬೇರೆದವರಿಗೆ ಮದುವೆ ಮಾಡಿಕೊಟ್ರೆ ನಿಮ್ಮನ್ನು ಜೀವ ಸಹಿತ ಬಿಡಂಗಿಲ್ಲ ಅಂತ ಬೆದರಿಕೆ ಹಾಕಿದ್ದಾನೆ.

ಈ ಕುರಿತು ಶಹರ ಪೊಲೀಸ್ ಠಾಣೆಯಲ್ಲಿ 148/2022 ಅಭಿಷೇಕ ನಾಯ್ಕರ್ ಮೇಲೆ ವಿವಿಧ ಕಲಂಗಳ ಅಡಿಯಲ್ಲಿ ಪ್ರಕರಣ ದಾಖಲಾಗಿದೆ.

ತುರ್ತು ಸಂದರ್ಭದಲ್ಲಿ ಜೀವ ರಕ್ಷಿಸಿದ ERSS-112 ತಂಡ; ಎರಡು ತಿಂಗಳಲ್ಲಿ ನಾಲ್ವರ ರಕ್ಷಣೆ

0

ಸಾರ್ವಜನಿಕರು, ಪೊಲೀಸ್ ಇಲಾಖೆಯ ಹಿರಿಯ ಅಧಿಕಾರಿಗಳ ಪ್ರಶಂಸೆ

ವಿಜಯಸಾಕ್ಷಿ ಸುದ್ದಿ, ಗದಗ

ಸರಕಾರವು ಹೊಸದಾಗಿ ಜಾರಿಗೆ ತಂದಿರುವ ERSS-112 ಯೋಜನೆಯ ಘಟಕದಲ್ಲಿ ಕರ್ತವ್ಯ ನಿರ್ವಹಿಸುತ್ತಿರುವ ಅಧಿಕಾರಿ/ಸಿಬ್ಬಂದಿಗಳು ಸಾರ್ವಜನಿಕರಿಂದ ಸ್ವೀಕೃತವಾಗುವ ತುರ್ತು ಕರೆಗಳಿಗೆ ಶೀಘ್ರವಾಗಿ ಸ್ಪಂದಿಸಿ, ಘಟನಾ ಸ್ಥಳಕ್ಕೆ ತೆರಳಿ, ರಕ್ಷಣಾ ಕಾರ್ಯವನ್ನು ಉತ್ತಮವಾಗಿ ನಿರ್ವಹಿಸುತ್ತಿದ್ದು ಹಿರಿಯ ಅಧಿಕಾರಿಗಳು ಹಾಗೂ ಸಾರ್ವಜನಿಕರು ಪ್ರಶಂಸೆ ವ್ಯಕ್ತಪಡಿಸಿದ್ದಾರೆ.

ನ.22ರಂದು ಗದಗ ಗ್ರಾಮೀಣ ಪೊಲೀಸ್ ಠಾಣಾ ವ್ಯಾಪ್ತಿಯ ಗಂಗಿಮಡಿಯಿಂದ ಓರ್ವ ಮಹಿಳೆ ತನ್ನ ಸಹೋದರ ಆತ್ಮಹತ್ಯೆ ಮಾಡಿಕೊಳ್ಳಲು ರೈಲ್ವೆ ಹಳಿಯ ಬಳಿ ಬಂದಿದ್ದಾನೆ ಎಂದು ವಿಡಿಯೋ ಕರೆಯ ಮೂಲಕ ತಿಳಿಸಿರುವ ಬಗ್ಗೆ 112 ಸಹಾಯವಾಣಿಗೆ ಕರೆ ಬಂದ ಹಿನ್ನೆಲೆಯಲ್ಲಿ, ಕರ್ತವ್ಯದಲ್ಲಿದ್ದ ಪಿ.ಎಚ್. ಮುಂಡರಗಿ, ಎಎಸ್‌ಐ ಬಿ.ಎಂ. ಕುರ್ತಕೋಟಿ, ಎಲ್.ಎಚ್. ತಿರುಮಲೆ, ಚಾಲಕ ಎನ್.ಎಫ್. ಹೆಬ್ಬಳ್ಳಿ ತಕ್ಷಣವೇ ಗಂಗಿಮಡಿ ರೈಲ್ವೆ ಹಳಿಯ ಬಳಿ ತಲುಪಿದಾಗ, ಸದರಿ ವ್ಯಕ್ತಿ ಆತ್ಮಹತ್ಯೆಯ ಉದ್ದೇಶದಿಂದ ರೈಲ್ವೆ ಹಳಿಯ ಮೇಲೆ ಮಲಗಿದ್ದು, ಸಿಬ್ಬಂದಿಗಳು ಆ ವ್ಯಕ್ತಿಗೆ ತಿಳುವಳಿಕೆ ಹೇಳಿ, ಮನವೊಲಿಸಿ ರಕ್ಷಿಸಿದ್ದರು.

ಅಂತೆಯೇ, ಅಕ್ಟೋಬರ್ 1ರ ಮಧ್ಯರಾತ್ರಿಯ ಸಮಯದಲ್ಲಿ ವಿಪರೀತ ಮಳೆಯಿಂದ ಲಕ್ಷ್ಮೇಶ್ವರ ಪೊಲೀಸ್ ಠಾಣಾ ವ್ಯಾಪ್ತಿಯ ದೊಡ್ಡೂರು ರಸ್ತೆಯ ಹಳ್ಳ ತುಂಬಿ ಹರಿಯುತ್ತಿದ್ದಾಗ, ವಾಹನವೊಂದರಲ್ಲಿದ್ದ ೩ ಜನರು ಹಳ್ಳ ದಾಟುತ್ತಿರುವಾಗ ಹಳ್ಳದಲ್ಲಿಯೇ ಸಿಲುಕಿಕೊಂಡಿದ್ದರು.

ಈ ವಿಷಯವಾಗಿ ಸಹಾಯವಾಣಿಗೆ ತುರ್ತು ಕರೆ ಬಂದಾಗ, ಕರ್ತವ್ಯದಲ್ಲಿದ್ದ ಎಎಸ್‌ಐ ಎಂ.ಎಸ್. ದೇಸಾಯಿ, ಎನ್.ಬಿ. ಪಾಟೀಲ, ಎಎಸ್‌ಐ ಐ.ಕೆ. ತಾವರಗೇರ್, ಎನ್.ಎಂ. ಕೊಟಗಿ, ಚಾಲಕ ಬಿ.ವಿ. ಖಾನಾಪುರ ತಕ್ಷಣ ಸ್ಪಂದಿಸಿ, ಅಪಾಯದಲ್ಲಿದ್ದವರನ್ನು ರಕ್ಷಿಸಿ, ಸುರಕ್ಷಿತ ಜಾಗಕ್ಕೆ ತಲುಪಿಸಿದ್ದರು.

ರಕ್ಷಣಾ ಕಾರ್ಯದಲ್ಲಿ ತುರ್ತು ಸ್ಪಂದನೆ ನೀಡಿ ಸಂಭವಿಸಲಿದ್ದ ಅಪಾಯದಿಂದ ಜೀವಗಳನ್ನು ರಕ್ಷಿಸಿದ ಸಿಬ್ಬಂದಿಗಳ ಈ ಕಾರ್ಯವನ್ನು ಜಿಲ್ಲಾ ಪೊಲೀಸ್ ಇಲಾಖೆಯ ವತಿಯಿಂದ ಪೊಲೀಸ್ ಅಧೀಕ್ಷಕರು, ಹಾಗೂ ಸಾರ್ವಜನಿಕರು ಶ್ಲಾಘಿಸಿದ್ದಾರೆ.

ಹರ್ಲಾಪೂರ ಗ್ರಾಮ ಪಂಚಾಯತಿ ಮತ್ತೆ ಕಾಂಗ್ರೆಸ್ ಮಡಿಲಿಗೆ

ವಿಜಯೋತ್ಸವ ಆಚರಿಸಿದ ಕಾರ್ಯಕರ್ತರು

ವಿಜಯಸಾಕ್ಷಿ ಸುದ್ದಿ, ಗದಗ

ತಾಲೂಕಿನ ಹರ್ಲಾಪೂರ ಗ್ರಾಮ ಪಂಚಾಯತಿಯ ಅಧ್ಯಕ್ಷೆ ಸ್ಥಾನಕ್ಕೆ ನಡೆದ ಚುನಾವಣೆಯಲ್ಲಿ ಕಾಂಗ್ರೆಸ್ ಪಕ್ಷದ ಬೆಂಬಲಿತ ಅಭ್ಯರ್ಥಿ ಸುಮಂಗಲಾ ಕೊಟ್ರಪ್ಪ ಚಟ್ರಿ ಆಯ್ಕೆಯಾಗಿದ್ದಾರೆ.

ಸೋಮುನಗೌಡ ಕೆಂಚನಗೌಡ್ರ ಇವರು ಅಧ್ಯಕ್ಷ ಸ್ಥಾನಕ್ಕೆ ರಾಜಿನಾಮೆ ನೀಡಿದ್ದರು. ಆ ಕಾರಣಕ್ಕಾಗಿ ನೆಡೆದ ಚುನಾವಣೆಯಲ್ಲಿ ಕಾಂಗ್ರೆಸ್ ಪಕ್ಷದ ಬೆಂಬಲಿತ ಅಭ್ಯರ್ಥಿ ಸುಮಂಗಲಾ ಕೊಟ್ರಪ್ಪ ಚಟ್ರಿ ನಾಮಪತ್ರ ಸಲ್ಲಿಸಿದ್ದರು. ಪ್ರತಿಸ್ಪರ್ಧಿಯಾಗಿ ಬಿಜೆಪಿ ಬೆಂಬಲಿತ ಅಭ್ಯರ್ಥಿ ಸಿದ್ದು ಯಳವಾಡ ನಾಮಪತ್ರ ಸಲ್ಲಿಸಿದ್ದರು.

ಹರ್ಲಾಪೂರ ಗ್ರಾಮ ಪಂಚಾಯತಿ ಒಟ್ಟು 12 ಸ್ಥಾನವನ್ನು ಹೊಂದಿದ್ದು, ಅದರಲ್ಲಿ ಸುಮಂಗಲಾ ಚಟ್ರಿ 7 ಮತಗಳನ್ನು ಪಡೆದು ಜಯಭೇರಿ ಬಾರಿಸಿದರು. ಆ ಮೂಲಕ ಗ್ರಾಮ ಪಂಚಾಯತಿ ಕಾಂಗ್ರೆಸ್ ಪಾಲಾಯಿತು. ಇದರಿಂದಾಗಿ ಕಾರ್ಯಕರ್ತರು ಕಾಂಗ್ರೆಸ್ ಪಕ್ಷದ ಬಾವುಟ ಹಾರಿಸುವ ಮೂಲಕ ವಿಜಯೋತ್ಸವ ಆಚರಿಸಿದರು.

ಈ ಸಂದರ್ಭದಲ್ಲಿ ಗ್ರಾಮ ಪಂಚಾಯಿತಿ ಸದಸ್ಯರಾದ ಕೃಷ್ಣಗೌಡ ಪಾಟೀಲ್, ಶಿವಾನಂದ ಪಟ್ಟೆದ, ಅಡಿವೆಪ್ಪ ಗೌಡಪ್ಪನವರ, ವೀಣಾ ಕಾತರಕಿ, ನಿರ್ಮಲಾ ಕೊತಪ್ಪನವರ ಸೇರಿದಂತೆ ಕಾಂಗ್ರೆಸ್ ಪಕ್ಷದ ಮುಖಂಡರು ಪಾಲ್ಗೊಂಡಿದ್ದರು.

ಚುನಾವಣಾ ಅಧಿಕಾರಿಯಾಗಿ ತಾಲ್ಲೂಕು ಪಂಚಾಯಿತಿ ಕಾರ್ಯನಿರ್ವಾಹಕ ಅಧಿಕಾರಿಗಳು ಕಾರ್ಯನಿರ್ವಹಿಸಿದರು. ಪಂಚಾಯತಿ ಪಿಡಿಒ ಈ ಸಂದರ್ಭದಲ್ಲಿ ಇದ್ದರು.

ಹೃದಯಾಘಾತದಿಂದ ಎಎಸ್ಐ ನಿಂಗೋಜಿ ನಿಧನ

0

ಬುಧವಾರ ಮಧ್ಯಾಹ್ನ ಹೊಂಬಳದಲ್ಲಿ ಅಂತ್ಯಕ್ರಿಯೆ

ವಿಜಯಸಾಕ್ಷಿ ಸುದ್ದಿ, ಲಕ್ಷ್ಮೇಶ್ವರ/ ಗಜೇಂದ್ರಗಡ

ERSS ನಲ್ಲಿ ಕರ್ತವ್ಯ ನಿರ್ವಹಿಸುತ್ತಿದ್ದ ಎಎಸ್ಐ ರಾಮಣ್ಣ ಎಸ್. ನಿಂಗೋಜಿ ಮಂಗಳವಾರ ಸಂಜೆ (58) ನಿಧನರಾದರು.

ಕಳೆದ ಭಾನುವಾರ ಸಂಜೆ ಕರ್ತವ್ಯ ಮುಗಿಸಿ ಮನೆಗೆ ಬಂದಿದ್ದ ಅವರಿಗೆ ಹೃದಯಾಘಾತ ಆಗಿತ್ತು. ತಕ್ಷಣವೇ ಚಿಕಿತ್ಸೆಗಾಗಿ ಧಾರವಾಡದ ಖಾಸಗಿ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಆದರೆ ಚಿಕಿತ್ಸೆ ಫಲಿಸದೆ ಮಂಗಳವಾರ ಸಂಜೆ ನಿಧನರಾದರು.

ಮೂರು ವರ್ಷಗಳ ಕಾಲ ಲಕ್ಷ್ಮೇಶ್ವರ ಠಾಣೆಯಲ್ಲಿ ಕರ್ತವ್ಯ ನಿರ್ವಹಿಸಿದ್ದ ಅವರು, ಇತ್ತೀಚಿಗೆ ಗಜೇಂದ್ರಗಡ ಠಾಣೆಗೆ ವರ್ಗಾವಣೆ ಹೊಂದಿದ್ದರು. ನಂತರ ಅವರಿಗೆ ಈಆರ್ ಎಸ್‌ ಎಸ್ ವಾಹನಕ್ಕೆ ನಿಯೋಜಿಸಲಾಗಿತ್ತು.

ಕರ್ತವ್ಯ ನಿಷ್ಠೆಗೆ ಹೆಸರಾಗಿದ್ದ ನಿಂಗೋಜಿ ಅವರ ನಿಧನಕ್ಕೆ ಸಹೋದ್ಯೋಗಿಗಳು ತೀವ್ರ ಸಂತಾಪ ವ್ಯಕ್ತಪಡಿಸಿದ್ದಾರೆ.

ಬುಧವಾರ ಗದಗ ತಾಲೂಕಿನ ಹೊಂಬಳ ಗ್ರಾಮದಲ್ಲಿ ನಿಂಗೋಜಿ ಅವರ ಅಂತ್ಯಕ್ರಿಯೆ ನಡೆಯಲಿದೆ. ಮೃತರಿಗೆ ಓರ್ವ ಪುತ್ರ, ಪುತ್ರಿ ಸೇರಿದಂತೆ ಅಪಾರ ಬಳಗವಿದೆ.

error: Content is protected !!