ವಿಜಯಸಾಕ್ಷಿ ಸುದ್ದಿ, ಗದಗ;
ತಾಲ್ಲೂಕಿನ ಬಿಂಕದಕಟ್ಟಿ ಬಳಿಯ ಸಾಲುಮರದ ತಿಮ್ಮಕ್ಕ ಉದ್ಯಾನವನದಲ್ಲಿ ಸುಮಾರು 32 ಲಕ್ಷ ರೂ. ವೆಚ್ಚದಲ್ಲಿ 370 ಮೀ. ಉದ್ದದವರೆಗೆ ನಿರ್ಮಿಸಲಾಗಿರುವ ಹೊಸ ಸಾಹಸ ಕ್ರೀಡೆ ಜಿಪ್ಲೈನ್ ದರದಲ್ಲಿ ಭಾರೀ ಏರಿಕೆಯಾಗಿದ್ದು, ಜನರು ಜಿಪ್ಲೈನ್ನತ್ತ ಸುಳಿಯಲು ಹಿಂದೇಟು ಹಾಕುತ್ತಿದ್ದಾರೆ.
ಕಪ್ಪತಗುಡ್ಡದ ಸೆರಗಿನಂಚಿನಲ್ಲಿರುವ ಸಾಲುಮರದ ತಿಮ್ಮಕ್ಕ ಉದ್ಯಾನವನದಲ್ಲಿ ಜಿಪ್ಲೈನ್ ಕ್ರೀಡೆ ನಾಲ್ಕು ತಿಂಗಳ ಹಿಂದಷ್ಟೇ ಪ್ರಾರಂಭವಾಗಿತ್ತು. ಇದು ಜನರನ್ನು ಆಕರ್ಷಿತರನ್ನಾಗಿಸಿತ್ತು. ಇದರಿಂದ ಲಾಕ್ಡೌನ್ ವೇಳೆ ಆದಾಯವಿಲ್ಲದೆ ಸೊರಗಿದ್ದ ಉದ್ಯಾನವನಕ್ಕೆ ಹೆಚ್ಚು ಆದಾಯ ತಂದು ಕೊಡುವ ಮೂಲಕ ತುಸು ಚೇತರಿಕೆ ನೀಡಿತ್ತು. ಅಲ್ಲದೆ, ಅಲ್ಲಿನ ಸಿಬ್ಬಂದಿ ಸಂಬಳ ಸೇರಿ ಉದ್ಯಾನವನದ ಹಲವು ಖರ್ಚುಗಳನ್ನು ನಿಭಾಯಿಸಲು ಸಹಕಾರಿಯಾಗಿತ್ತು. ಕಡಿಮೆ ದರದಲ್ಲಿ ಜನರಿಗೆ ಮಜಾ ನೀಡುತ್ತಿದ್ದ ಜಿಪ್ಲೈನ್ ಸಾಹಸ ಕ್ರೀಡೆ ಇದೀಗ ಬಲು ದುಬಾರಿಯಾಗಿದೆ.
ಕೆಲ ದಿನಗಳಿಂದಾಚೆಗೆ ಒಬ್ಬರಿಗೆ 100 ರೂ. ನಿಗದಿ ಮಾಡಿತ್ತು. ಇದರಿಂದ ದಿನವೊಂದಕ್ಕೆ 50ಕ್ಕೂ ಹೆಚ್ಚು ಜನ ಕ್ರೀಡಾಸಕ್ತರು ಜಿಪ್ಲೈನ್ ಸಾಹಸ ಕ್ರೀಡೆಯ ಮಜಾ ತೆಗೆದುಕೊಳ್ಳಲು ಬರುತ್ತಿದ್ದರು. ಆದರೆ, ಅ.1ರಿಂದ ಅರಣ್ಯ ಇಲಾಖೆ ಒಬ್ಬರಿಗೆ 300 ರೂ. ದರ ನಿಗದಿ ಪಡಿಸಿದೆ. ಇದರಿಂದ ಜಿಪ್ಲೈನ್ ಕಡೆ ಬರುವವರ ಸಂಖ್ಯೆ ಕಡಿಮೆಯಾಗುತ್ತಿದೆ.
ನಿರ್ವಹಣೆಗಾಗಿ ದರ ಏರಿಕೆ ಅನಿವಾರ್ಯ
ರಾಜ್ಯದಲ್ಲಿಯೇ ಅತೀ ಉದ್ದವಾಗಿರುವ ಸಾಹಸ ಕ್ರೀಡೆಯ ಜಿಪ್ಲೈನ್ ತಂತಿ ಗದಗನ ಸಾಲುಮರದ ತಿಮ್ಮಕ್ಕ ಉದ್ಯಾನವನದಲ್ಲಿ ನಿರ್ಮಿಸಲಾಗಿದ್ದು, ಇಲ್ಲಿಗೆ ರಾಜ್ಯದ ಮೂಲೆ ಮೂಲೆಗಳಿಂದ ಜನರು ಆಗಮಿಸುತ್ತಿದ್ದಾರೆ. ಜಿಪ್ಲೈನ್ ನೋಡಿಕೊಳ್ಳಲು ನಿತ್ಯ 10 ಜನರು ಕೆಲಸ ಮಾಡುತ್ತಿದ್ದು, ಅವರಿಗೆ ಜಿಪ್ಲೈನ್ದಿಂದ ಬರುವ ಆದಾಯದಿಂದಲೇ ಪ್ರತಿ ತಿಂಗಳು ಸಂಬಳ ನೀಡಲಾಗುತ್ತಿದೆ. ಅಲ್ಲದೇ, ಅರಣ್ಯ ಇಲಾಖೆಗೆ ಜಿಪ್ಲೈನ್ ನಿರ್ವಹಣೆ ಕಷ್ಟ ಸಾಧ್ಯವಾಗುತ್ತಿರುವುದರಿಂದ ದರ ಪರಿಷ್ಕರಣೆ ಮಾಡಲಾಗಿದೆ. ಸದ್ಯ ಒಬ್ಬರಿಗೆ 100 ರೂ. ಇದ್ದಿದ್ದನ್ನು 300 ರೂ.ಗೆ ಏರಿಸಲಾಗಿದೆ. ದರ ಏರಿಕೆಯಿಂದ ಜನರ ಬರುವಿಕೆ ಕಡಿಮೆ ಆಗಿದ್ದರೂ, ಸಾಹಸ ಕ್ರೀಡೆಗಳಲ್ಲಿ ಆಸಕ್ತಿ ಇರುವವರು ಬರುತ್ತಿದ್ದಾರೆ ಎಂದು ಅರಣ್ಯ ಇಲಾಖೆಯ ಸಿಬ್ಬಂದಿ ಅಮೀನ್ ತಿಳಿಸಿದರು.
