ಭಾರೀ ಮಳೆಗೆ ಕುಸಿದ ಛಾವಣಿ; ಉಸಿರುಗಟ್ಟಿ ಮನೆ ಮಾಲೀಕ ಸಾವು

ವಿಜಯಸಾಕ್ಷಿ ಸುದ್ದಿ, ಮುಂಡರಗಿ

ಪಟ್ಟಣದಲ್ಲಿ ಬುಧವಾರ ರಾತ್ರಿ ಸುರಿದ ಭಾರೀ ಮಳೆಯಿಂದಾಗಿ ಮಣ್ಣಿನ ಮನೆ ಕುಸಿದು ಬಿದ್ದು ಮನೆ ಮಾಲೀಕ ಉಸಿರು ಗಟ್ಟಿ ಸ್ಥಳದಲ್ಲಿಯೇ ಮೃತಪಟ್ಟ ಘಟನೆ ಗುರುವಾರ ಸಂಜೆ ಮುಂಡರಗಿ ಪಟ್ಟಣದಲ್ಲಿ ನಡೆದಿದೆ.

ಇಲ್ಲಿನ ಚಾವಡಿ ಓಣಿ ನಿವಾಸಿ ಮೂಲತಃ ಡೋಣಿ ಗ್ರಾಮದ ಅಶೋಕ ಹಳ್ಳಿಕೇರಿ (62) ಮೃತಪಟ್ಟ ದುರ್ಧೈವಿ. ಬುಧವಾರ ರಾತ್ರಿಯಿಡಿ ಮಳೆ ಸುರಿದ ಪರಿಣಾಮ ಮಣ್ಣಿನ ಮನೆ ಸಂಪೂರ್ಣ ನೆನೆದಿತ್ತು. ಹಳೆ ಮನೆಯಾಗಿದ್ದರಿಂದ‌ ಗುರುವಾರ ಸಂಜೆ ಏಕಾಏಕಿ ಕುಸಿದು ಬಿದ್ದಿದೆ.

ಮನೆ ಮಾಲೀಕ ಅಶೋಕ ಅವರು ಹಿತ್ತಲಬಾಗಿಲನಲ್ಲಿ ಒಳಬರುತ್ತಿದ್ದ ವೇಳೆ ಛಾವಣಿಯ ಸಂಪೂರ್ಣವಾಗಿ ಅವರ ಮೇಲೆಯೇ ಬಿದ್ದಿದೆ.

ಮುಂಬಾಗಿನಲ್ಲಿ ಇದ್ದ ಮನೆ ಮಂದಿ ತಕ್ಷಣವೇ ತುರ್ತು ಸಹಾಯವಾಣಿ ERSS-112 ಕರೆ ಮಾಡಿದ್ದಾರೆ. ಸ್ಥಳಕ್ಕೆ ಬಂದ 112ನ ಎಎಸ್ಐಗಳಾದ ಮಾರುತಿ ಜೋಗದಂಡಕರ್, ಪ್ರಕಾಶ್ ಲಮಾಣಿ ಹಾಗೂ ಸಿಬ್ಬಂದಿ ನಾಗರಾಜ್ ಹೆಬ್ಬಳ್ಳಿ ಅಗ್ನಿಶಾಮಕ ಸಿಬ್ಬಂದಿ ಹಾಗೂ ಜೆಸಿಬಿ ನೆರವಿನಿಂದ ಮಣ್ಣು ತೆಗೆದು, ಅಶೋಕ ಅವರನ್ನು ತಾಲೂಕು ಆಸ್ಪತ್ರೆಗೆ ದಾಖಲಿಸಿದ್ದಾರೆ. ವೈದ್ಯರು ಉಸಿರುಗಟ್ಟಿ ಮೃತಪಟ್ಟಿರುವುದನ್ನು ಖಚಿತಪಡಿಸಿದರು.

ಮುಂಡರಗಿ ಪೊಲೀಸ್ ಠಾಣೆಯ ಎಎಸ್ಐ ಶೇಖರ್ ಕಡಬಿನ‌ ಹಾಗೂ ಸಿಬ್ಬಂದಿ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದರು. ಈ ಕುರಿತು ಮುಂಡರಗಿ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.