ತುಪ್ಪ ತಿಂದರೆ ತೂಕ ಹೆಚ್ಚುತ್ತದೆ, ಅತಿಯಾದ ಕೊಬ್ಬು ತುಂಬುತ್ತೆ ಎಂದೆಲ್ಲ ಹೇಳುವವರೇ ಹೆಚ್ಚು. ಆದರೆ ಸತ್ಯ ಸಂಗತಿ ಬೇರೆಯೇ ಇದೆ. ತುಪ್ಪ ತಿನ್ನುವುದರಿಂದ ಕೊಬ್ಬು ಬೆಳೆಯುವುದೇ ಇಲ್ಲ! ಓಹಿಯೋದ ಕ್ಲೇವ್ಲ್ಯಾಂಡ್ ಕ್ಲಿನಿಕ್ ನಡೆಸಿದ ಅಧ್ಯಯನದ ಪ್ರಕಾರ, ತುಪ್ಪದಿಂದ ದೇಹಕ್ಕೆ ಕೆಟ್ಟದಾಗುವುದಿಲ್ಲ ಎಂದು ಹೇಳಲಾಗಿದೆ. ಬೆಣ್ಣೆಯನ್ನು ಕುದಿಸುವುದರಿಂದ ತುಪ್ಪ ಸಿಗುತ್ತದೆ. ಈ ವೇಳೆ ಬೆಣ್ಣೆಯಲ್ಲಿರುವ ನೀರಿನಾಂಶ ಹೋಗುತ್ತದೆ. ಅತ್ಯುತ್ತಮ ಕೊಬ್ಬಿನಾಂಶವುಳ್ಳ ತುಪ್ಪವನ್ನು ಮಾತ್ರವೇ ನಾವು ಬಳಸಲು ಅಥವಾ ಸವಿಯಲು ಸಿಗುತ್ತದೆ.
ಜೀರ್ಣಕ್ರಿಯೆಯನ್ನು ಸುಧಾರಿಸುತ್ತದೆ: ತುಪ್ಪವನ್ನು ಸೇವಿಸುವುದರಿಂದ ಹೊಟ್ಟೆಗೆ ಸಂಬಂಧಿಸಿದ ಸಮಸ್ಯೆಗಳಿಂದ ಮುಕ್ತಿ ಸಿಗುತ್ತದೆ. ಏಕೆಂದರೆ ಇದರಲ್ಲಿ ಅಗತ್ಯ ಪೋಷಕಾಂಶಗಳು ಮತ್ತು ಪ್ರೋಬಯಾಟಿಕ್ಗಳಿವೆ. ಅವು ಹೊಟ್ಟೆಯಲ್ಲಿ ಆರೋಗ್ಯಕರ ಬ್ಯಾಕ್ಟೀರಿಯಾವನ್ನು ಉತ್ತೇಜಿಸುತ್ತವೆ. ಅಲ್ಲದೆ ತುಪ್ಪವು, ಆರೋಗ್ಯಕರ ಯಕೃತ್ತು, ಸಮತೋಲಿತ ಹಾರ್ಮೋನುಗಳು, ವಿಟಮಿನ್ ಎ ಮತ್ತು ಇ ಯ ಮೂಲವಾಗಿದೆ.
ರೋಗ ನಿರೋಧಕ ಶಕ್ತಿಯನ್ನು ಬಲಪಡಿಸುತ್ತದೆ: ತುಪ್ಪದಲ್ಲಿ ಬ್ಯೂಟ್ರಿಕ್ ಆಮ್ಲ ಸಮೃದ್ಧವಾಗಿದೆ. ಇದು ರೋಗಗಳ ವಿರುದ್ಧ ಹೋರಾಡಲು ಸಹಾಯ ಮಾಡುತ್ತದೆ.
ಉತ್ತಮ ಕೊಲೆಸ್ಟ್ರಾಲ್ ಅನ್ನು ಹೆಚ್ಚಿಸುತ್ತದೆ: ತುಪ್ಪವು ಆರೋಗ್ಯಕರ ಕೊಬ್ಬನ್ನು ಹೊಂದಿರುತ್ತದೆ. ಇದು ದೇಹದಲ್ಲಿ ಉತ್ತಮ ಕೊಲೆಸ್ಟ್ರಾಲ್ ಅನ್ನು ಹೆಚ್ಚಿಸುತ್ತದೆ. ತುಪ್ಪವು ಇತರ ರೀತಿಯ ಕೊಬ್ಬುಗಳಂತೆ ಹೃದ್ರೋಗಕ್ಕೆ ಕಾರಣವಾಗುವುದಿಲ್ಲ. ಇದರಲ್ಲಿರುವ ಉತ್ಕರ್ಷಣ ನಿರೋಧಕಗಳು ಉರಿಯೂತ ನಿವಾರಕಗಳಾಗಿ ಕಾರ್ಯ ನಿರ್ವಹಿಸುತ್ತದೆ.
ಚರ್ಮವನ್ನು ಹೈಡ್ರೇಟ್ ಆಗಿರಿಸುತ್ತದೆ: ತುಪ್ಪವು ಚರ್ಮಕ್ಕೆ ತುಂಬಾ ಒಳ್ಳೆಯದು. ಏಕೆಂದರೆ ಇದು ಚರ್ಮವನ್ನು ಹೈಡ್ರೇಟ್ ಆಗಿರಿಸುತ್ತದೆ. ತುಪ್ಪದಲ್ಲಿರುವ ಪೋಷಕಾಂಶಗಳು ಚರ್ಮವನ್ನು ಬಿಗಿಯಾಗಿರಿಸುತ್ತವೆ. ಇದರಿಂದ ವಯಸ್ಸಾದ ಗುರುತುಗಳು ಕಾಣುವುದು ಕಡಿಮೆಯಾಗುತ್ತದೆ.
ಕೂದಲಿಗೆ ಒಳ್ಳೆಯದು: ಏಕೆಂದರೆ ತುಪ್ಪದಲ್ಲಿ ವಿಟಮಿನ್ ಇ ಇದೆ, ಇದು ಕೂದಲಿಗೆ ಉತ್ತಮವಾಗಿದೆ. ಇದು ಕೂದಲನ್ನು ಒಳಗಿನಿಂದ ಬಲಪಡಿಸುತ್ತದೆ. ಪೌಷ್ಠಿಕಾಂಶವನ್ನು ಒದಗಿಸುತ್ತದೆ. ಇದನ್ನು ಪ್ರತಿದಿನ ಸೇವನೆ ಮಾಡುವುದರಿಂದ ಕೂದಲು ಸೊಂಪಾಗಿ ಬೆಳೆಯುತ್ತದೆ ಎಂದು ತಜ್ಞರು ಹೇಳುತ್ತಾರೆ.
