ಬೆಂಗಳೂರು: ಕಬ್ಬನ್ ಪಾರ್ಕ್ ಆವರಣದಲ್ಲಿನ ಬಾಲಭವನವು ಈಗಾಗಲೇ ಚಿಣ್ಣರು ಮತ್ತು ಯುವಕರಿಗೆ ಪ್ರಿಯ ತಾಣವಾಗಿದ್ದು, ಈಗ ಅವರಿಗೆ ಮತ್ತೊಂದು ಮನೋರಂಜನಾತ್ಮಕ ಆಕರ್ಷಣೆ ಸಿಗಲಿದೆ.
ಆಧುನಿಕ ಸ್ಕೇಟಿಂಗ್ ಬೋರ್ಡ್ ಪಾರ್ಕ್ ನಿರ್ಮಾಣವು ಶೀಘ್ರದಲ್ಲೇ ಆರಂಭವಾಗಲಿದೆ. ಬಾಲಭವನ ಸೊಸೈಟಿ ಮತ್ತು ಯುವಜನ ಸಬಲೀಕರಣ ಮತ್ತು ಕ್ರೀಡಾ ಇಲಾಖೆಯ ಸಹಯೋಗದಲ್ಲಿ ಸುಮಾರು 1.5 ಕೋಟಿ ರೂಪಾಯಿ ವೆಚ್ಚದಲ್ಲಿ ಈ ಪಾರ್ಕ್ ನಿರ್ಮಿಸಲಾಗುತ್ತಿದೆ. ವಿಶ್ವೇಶ್ವರಯ್ಯ ಮ್ಯೂಸಿಯಂ ಹಿಂಭಾಗದಲ್ಲಿರುವ ಬೋಟಿಂಗ್ ಪ್ರದೇಶದ ಬಳಿ, ಬಾಲಭವನದ ಅರ್ಧ ಎಕರೆ ಜಾಗದಲ್ಲಿ ಈ ಪಾರ್ಕ್ ರೂಪುಗೊಳ್ಳಲಿದೆ.
ಹೈಬ್ರಿಡ್ ವಿನ್ಯಾಸದಲ್ಲಿ ರೂಪುಗೊಂಡಿರುವ ಈ ಸ್ಕೇಟಿಂಗ್ ಬೋರ್ಡ್ ಪಾರ್ಕ್ನಲ್ಲಿ ಒಂದೇ ಸಮಯದಲ್ಲಿ ಸುಮಾರು 40 ಮಂದಿ ಚಿಣ್ಣರು ಮತ್ತು ಯುವಕರು ಸ್ಕೇಟಿಂಗ್ ಸವಾಲು ಅನುಭವಿಸಬಹುದಾಗಿದೆ. ಪಾರ್ಕ್ವನ್ನು ಒಲಿಂಪಿಕ್ ಮಟ್ಟದ ಸೌಲಭ್ಯಗಳೊಂದಿಗೆ ವಿನ್ಯಾಸಗೊಳಿಸಲಾಗಿದ್ದು, ಐದು ವರ್ಷ ಮೇಲ್ಪಟ್ಟ ಮಕ್ಕಳಲ್ಲಿ ಕ್ರೀಡಾ ಪ್ರತಿಭೆಯನ್ನು ಬೆಳೆಸುವುದೇ ಮುಖ್ಯ ಉದ್ದೇಶ. ಜನವರಿಯ ಅಂತ್ಯದೊಳಗೆ ಕಾಮಗಾರಿ ಪ್ರಾರಂಭವಾಗಲಿದ್ದು, ಮೇ ತಿಂಗಳೊಳಗೆ ಸ್ಕೇಟಿಂಗ್ ಬೋರ್ಡ್ ಪಾರ್ಕ್ ಲೋಕಾರ್ಪಣೆ ಸಾಧ್ಯ ಎಂದು ನಿರೀಕ್ಷಿಸಲಾಗಿದೆ. ಈ ಹೊಸ ಕ್ರೀಡಾ ಚಟುವಟಿಕೆ, ಬಾಲಭವನಕ್ಕೆ ಭೇಟಿ ನೀಡುವ ಪೋಷಕರು ಮತ್ತು ಸಾರ್ವಜನಿಕರಲ್ಲಿ ಸಂತೋಷ ಮತ್ತು ಹರ್ಷವನ್ನು ಮೂಡಿಸಿದೆ.
