ಗದಗ: ಗದಗ ಜಿಲ್ಲೆಯ ಲಕ್ಕುಂಡಿ ಗ್ರಾಮದಲ್ಲಿ ಕೋಟೆ ವೀರಭದ್ರೇಶ್ವರ ದೇವಸ್ಥಾನ ಆವರಣದಲ್ಲಿ ನಡೆಯುತ್ತಿರುವ 7ನೇ ದಿನದ ಉತ್ಖನನ ವೇಳೆ ಅಪರೂಪದ ತಾಮ್ರ ರೂಪದ ಲೋಹ ಪತ್ತೆಯಾಗಿದೆ.
ಕುತೂಹಲ ಮೂಡಿಸಿರುವ ಈ ಲೋಹವನ್ನು ಉತ್ಖನನ ಮೇಲ್ವಿಚಾರಕರು ಪರಿಶೀಲನೆ ನಡೆಸಿದರು. ಸ್ಥಳೀಯ ಸಿಬ್ಬಂದಿ ಲೋಹವನ್ನು ಪ್ಲಾಸ್ಟಿಕ್ ಚಿಕ್ಕ ಪ್ಯಾಕೆಟ್ನಲ್ಲಿ ಸುರಕ್ಷಿತವಾಗಿ ಸಂರಕ್ಷಿಸಿದ್ದಾರೆ. ಈ ಉತ್ಖನನ ಕಾರ್ಯವು ನೈಜ ಲಕ್ಕುಂಡಿ ಸ್ಥಳದ ಪತ್ತೆಯನ್ನು ಪಡೆಯಲು ಮುಂದುವರೆದಿದ್ದು, ಹುದುಗಿ ಹೋಗಿದ್ದ ಐತಿಹಾಸಿಕ ಸ್ಥಳಗಳನ್ನು ಸ್ಮರಣೆ ಮಾಡಲು ಅವಕಾಶ ನೀಡಲಿದೆ ಎಂದು ಪುರಾತತ್ವ ಇಲಾಖೆಯ ಅಧಿಕಾರಿಗಳು ತಿಳಿಸಿದ್ದಾರೆ.
ಉತ್ಖನನ ವೇಳೆ ಪುರಾತನ ಕಾಲದ ಮೆಟಲ್ ವಸ್ತುಗಳು, ಶಿಲೆ ಮತ್ತು ಇತರ ಐತಿಹಾಸಿಕ ವಸ್ತುಗಳ ಪತ್ತೆ ಕೂಡ ಸಂಭವಿಸಿದೆ.
ಸುಮಾರು 35 ಕಾರ್ಮಿಕರಿಂದ ಮುಂಜಾನೆ 8 ಗಂಟೆಯಿಂದ ಸಂಜೆ 5 ಗಂಟೆಯವರೆಗೆ ಸೂಕ್ಷ್ಮವಾಗಿ ನಡೆಸಲಾಗುತ್ತಿರುವ ಉತ್ಖನನ ಕಾರ್ಯವನ್ನು ಪುರಾತತ್ವ ಇಲಾಖೆ ಮತ್ತು ಲಕ್ಕುಂಡಿ ಅಭಿವೃದ್ಧಿ ಪ್ರಾಧಿಕಾರದ ಹಿರಿಯ ಅಧಿಕಾರಿಗಳ ನೇತೃತ್ವದಲ್ಲಿ ನಡೆಸಲಾಗುತ್ತಿದೆ.
ಹಳೆಯ ರಾಜಮಹಾರಾಜರ ಕಾಲದ ವೈಭವವನ್ನು, ಚಿನ್ನ, ವಜ್ರ, ಹವಳ, ಮುತ್ತು ಸೇರಿದಂತೆ ಪ್ರಾಚೀನ ಕಾಲದ ಐತಿಹಾಸಿಕ ವಸ್ತುಗಳ ಪತ್ತೆ ಮಾಡಲು ಶ್ರದ್ಧೆಯಿಂದ ಕಾರ್ಯಾಚರಣೆ ನಡೆಯುತ್ತಿದೆ. ಜನರಲ್ಲಿ ಈ ಉತ್ಖನನದಲ್ಲಿ ಏನು ಪತ್ತೆಯಾಗಲಿದೆ ಎಂಬ ಕುತೂಹಲ ಹೆಚ್ಚಾಗಿದ್ದು, ಮುಂದಿನ ದಿನಗಳಲ್ಲಿ ಹೆಚ್ಚಿನ ಪುರಾತನ ವಸ್ತು ಪತ್ತೆಯಾಗುವ ಸಾಧ್ಯತೆ ಇದೆ ಎಂದು ವರದಿಯಾಗಿದೆ.
