ಮಧುಮೇಹಿಗಳಿಗೆ ಹೊಸ ಆಶಾಕಿರಣ; ವಾರಕ್ಕೊಮ್ಮೆ ಮಾತ್ರ ತೆಗೆದುಕೊಳ್ಳುವ ಇನ್ಸುಲಿನ್ ಭಾರತದಲ್ಲಿ ಬಿಡುಗಡೆ

ಆಧುನಿಕ ಜೀವನಶೈಲಿಯಿಂದ ಮಧುಮೇಹ ಇಂದು ಸಾಮಾನ್ಯ ಆರೋಗ್ಯ ಸಮಸ್ಯೆಯಾಗಿ ಪರಿಣಮಿಸಿದೆ.

ಆದರೆ, ನಿರ್ಲಕ್ಷ್ಯ ಮಾಡಿದರೆ ಗಂಭೀರ ಸಮಸ್ಯೆಗಳಿಗೆ ಕಾರಣವಾಗಬಹುದು. ಆಹಾರ ಪದ್ಧತಿ, ವ್ಯಾಯಾಮ, ಔಷಧ ಹಾಗೂ ಸೂಕ್ತ ಚಿಕಿತ್ಸೆಯ ಮೂಲಕ ಮಾತ್ರ ಮಧುಮೇಹವನ್ನು ನಿಯಂತ್ರಣದಲ್ಲಿಡಲು ಸಾಧ್ಯ.

ಮಧುಮೇಹದ ಒಂದು ಹಂತದ ಬಳಿಕ ಅನೇಕರು ಪ್ರತಿದಿನ ಇನ್ಸುಲಿನ್ ಚುಚ್ಚುಮದ್ದು ತೆಗೆದುಕೊಳ್ಳಬೇಕಾಗುತ್ತದೆ. ಇದು ಕೆಲವರಿಗೆ ನೋವು, ತೊಂದರೆ ಹಾಗೂ ಆರ್ಥಿಕ ಹೊರೆಯಾಗುತ್ತದೆ. ಇದೀಗ ಇಂತಹ ರೋಗಿಗಳಿಗೆ ಅನುಕೂಲವಾಗುವಂತೆ ವಾರಕ್ಕೊಮ್ಮೆ ಮಾತ್ರ ತೆಗೆದುಕೊಳ್ಳಬೇಕಾದ ಹೊಸ ಇನ್ಸುಲಿನ್ ಮಾರುಕಟ್ಟೆಗೆ ಬಂದಿದೆ.

ವಿಶ್ವದಲ್ಲೇ ಮೊದಲ ಬಾರಿಗೆ ವಾರಕ್ಕೊಮ್ಮೆ ನೀಡುವ ಬೇಸಲ್ ಇನ್ಸುಲಿನ್ ಅವಿಕ್ಲಿ ಅನ್ನು ಭಾರತದಲ್ಲಿ ಬಿಡುಗಡೆ ಮಾಡಲಾಗಿದೆ. ಡ್ಯಾನಿಶ್ ಔಷಧ ಕಂಪನಿ ನೊವೊ ನಾರ್ಡಿಸ್ಕ್ ಇಂಡಿಯಾ ಈ ಇನ್ಸುಲಿನ್‌ ಅನ್ನು ಪರಿಚಯಿಸಿದೆ.

365 ಇಂಜೆಕ್ಷನ್‌ ಬದಲು ವರ್ಷಕ್ಕೆ ಕೇವಲ 52 ಡೋಸ್:

ಅವಿಕ್ಲಿ ಇನ್ಸುಲಿನ್‌ನ ಪ್ರಮುಖ ವಿಶೇಷತೆ ಎಂದರೆ ಇದನ್ನು ಪ್ರತಿದಿನ ತೆಗೆದುಕೊಳ್ಳಬೇಕಾಗಿಲ್ಲ. ವಾರಕ್ಕೆ ಒಂದು ಬಾರಿ ಮಾತ್ರ ಚುಚ್ಚಿಸಿಕೊಂಡರೆ ಸಾಕು. ಇದರಿಂದ ವರ್ಷಕ್ಕೆ 365 ಬಾರಿ ತೆಗೆದುಕೊಳ್ಳಬೇಕಾಗಿದ್ದ ಇನ್ಸುಲಿನ್ ಡೋಸ್ ಸಂಖ್ಯೆ 52ಕ್ಕೆ ಇಳಿಯಲಿದೆ.

ಭಾರತದಲ್ಲಿ ಮಧುಮೇಹಿಗಳ ಸಂಖ್ಯೆ ಹೆಚ್ಚುತ್ತಿದ್ದು, ಸುಮಾರು 11 ಕೋಟಿ ಜನರು ಸಕ್ಕರೆ ಕಾಯಿಲೆಯಿಂದ ಬಳಲುತ್ತಿದ್ದಾರೆ ಎನ್ನಲಾಗಿದೆ. ನಗರ ಪ್ರದೇಶಗಳಲ್ಲಿ ಮಧುಮೇಹ ಪ್ರಮಾಣ ಹೆಚ್ಚಾಗಿದ್ದು, ಬದಲಾಗುತ್ತಿರುವ ಜೀವನಶೈಲಿ, ಆಹಾರ ಪದ್ಧತಿ ಮತ್ತು ನಗರೀಕರಣ ಪ್ರಮುಖ ಕಾರಣಗಳಾಗಿವೆ.

ಅವಿಕ್ಲಿ ಹೇಗೆ ಕೆಲಸ ಮಾಡುತ್ತದೆ?

ಅವಿಕ್ಲಿ ಇನ್ಸುಲಿನ್ ದೇಹದಲ್ಲಿನ ಇನ್ಸುಲಿನ್ ಗ್ರಾಹಕಗಳಿಗೆ ಸೇರಿಕೊಂಡು ಜೀವಕೋಶಗಳು ಗ್ಲೂಕೋಸ್‌ ಅನ್ನು ಬಳಸಿಕೊಳ್ಳಲು ಸಹಾಯ ಮಾಡುತ್ತದೆ. ಯಕೃತ್ತಿನಲ್ಲಿ ಹೆಚ್ಚುವರಿ ಸಕ್ಕರೆ ಉತ್ಪಾದನೆಯನ್ನು ಕಡಿಮೆ ಮಾಡುತ್ತದೆ.

ಇದರ ವಿಶೇಷತೆ ಎಂದರೆ ಇದು ದೇಹದಲ್ಲಿ ದೀರ್ಘಕಾಲ ಸಕ್ರಿಯವಾಗಿರುತ್ತದೆ. ರಕ್ತದಲ್ಲಿನ ಆಲ್ಬುಮಿನ್ ಎಂಬ ಪ್ರೋಟೀನ್‌ಗೆ ಬಲವಾಗಿ ಬಂಧಿಸುವುದರಿಂದ ಇದರ ಪರಿಣಾಮ ಸುಮಾರು ಒಂದು ವಾರದವರೆಗೆ ಮುಂದುವರಿಯುತ್ತದೆ.

ಯಾರಿಗೆ ಹೆಚ್ಚು ಪ್ರಯೋಜನ?

• ಪ್ರತಿದಿನ ಇನ್ಸುಲಿನ್ ತೆಗೆದುಕೊಳ್ಳುತ್ತಿರುವ ಟೈಪ್-2 ಮಧುಮೇಹಿಗಳಿಗೆ ಹೆಚ್ಚು ಅನುಕೂಲ.
• ಟೈಪ್-1 ಮತ್ತು ಟೈಪ್-2 ಮಧುಮೇಹ ಹೊಂದಿರುವ ವಯಸ್ಕರ ಚಿಕಿತ್ಸೆಗೆ ಬಳಸಬಹುದು.
• ದಿನನಿತ್ಯದ ಇಂಜೆಕ್ಷನ್ ತೊಂದರೆ ಕಡಿಮೆಯಾಗುತ್ತದೆ.

ಅಡ್ಡಪರಿಣಾಮಗಳಿವೆಯೇ?

ಹೊಸ ಔಷಧಿಗಳಂತೆ ಅವಿಕ್ಲಿಗೂ ಕೆಲವು ಅಡ್ಡಪರಿಣಾಮಗಳ ಸಾಧ್ಯತೆ ಇದೆ.

• ರಕ್ತದಲ್ಲಿನ ಸಕ್ಕರೆ ಪ್ರಮಾಣ ಕಡಿಮೆಯಾಗುವುದು (ಹೈಪೊಗ್ಲಿಸಿಮಿಯಾ)
• ಇಂಜೆಕ್ಷನ್ ನೀಡಿದ ಜಾಗದಲ್ಲಿ ಸ್ವಲ್ಪ ಊತ ಅಥವಾ ಅಸ್ವಸ್ಥತೆ

ವೈದ್ಯರ ಸಲಹೆ ಮತ್ತು ಮೇಲ್ವಿಚಾರಣೆಯಲ್ಲಿ ಇದನ್ನು ಬಳಸಬೇಕು.

ಮಕ್ಕಳು, ಗರ್ಭಿಣಿಯರು ಹಾಗೂ ಗರ್ಭಧಾರಣೆಗೆ ಯೋಜನೆ ಮಾಡುತ್ತಿರುವವರು ಈ ಇನ್ಸುಲಿನ್ ಬಳಸುವ ಮೊದಲು ವೈದ್ಯರ ಸಲಹೆ ಪಡೆಯಬೇಕು ಎಂದು ತಜ್ಞರು ಸೂಚಿಸಿದ್ದಾರೆ.

ಆದರೆ ಹೊಸ ಇನ್ಸುಲಿನ್ ಬಂದಿದೆ ಎಂದು ಆಹಾರ ನಿಯಮ, ವ್ಯಾಯಾಮ ಮತ್ತು ಆರೋಗ್ಯಕರ ಜೀವನಶೈಲಿಯನ್ನು ನಿರ್ಲಕ್ಷಿಸಬಾರದು. ಮಧುಮೇಹ ನಿಯಂತ್ರಣಕ್ಕೆ ನಿಯಮಿತ ತಪಾಸಣೆ ಹಾಗೂ ವೈದ್ಯರ ಸಲಹೆ ಮುಖ್ಯವಾಗಿದೆ.