ನಟಿ ಭಾವನಾ ರಾಮಣ್ಣ ಮನೆಯಲ್ಲಿ ಸಂತಸ ಮನೆ ಮಾಡಿದೆ. ಕಳೆದ ಕೆಲ ದಿನಗಳ ಹಿಂದೆ ಹೆಣ್ಣು ಮಗುವನ್ನು ಬರಮಾಡಿಕೊಂಡ ನಟಿ ಇದೀಗ ಮಗಳ ಬಗ್ಗೆ ಬರೆದುಕೊಂಡಿದ್ದಾರೆ. ಫೇಸ್‌ ಬುಕ್‌ ಪೇಜ್ ಅಲ್ಲಿ ಒಂದು ಚೆಂದದ ಫೋಟೋ ಹಾಕಿ ಅದರಲ್ಲಿ ಮಗಳ ಗ್ಗೆ ಭಾವನಾತ್ಮಕವಾಗಿ ಬರೆದಿದ್ದಾರೆ.
ದೊಡ್ಡ ಮನೆ, ಪುಟ್ಟ ಕುಟುಂಬ…ನಾನು ಮತ್ತು ನನ್ನ ತಂದೆ, ಬೆಳಗ್ಗೆ ಎದ್ದು ಮನೆಯಂಗಳದಲ್ಲಿ ಕಾಫಿ ಹೀರುತ್ತಾ ಕೂತರೆ, ಅಲ್ಲಿ ಹಕ್ಕಿಗಳದ್ದೇ ನಾದ ನಿನಾದ.. ಕು ಕು ಮೈನಾ, ಕಿಚಿ ಪಿಚಿ ಗುಬ್ಬಚ್ಚಿ, ನಿತ್ಯವೂ ಬರೀ ಹಕ್ಕಿಗಳದ್ದೇ ಕಲರವ. ಹಕ್ಕಿ ಪಿಕ್ಕಿಗಳ ಹಾಡು ಪಾಡು ಕೇಳುತ್ತದ್ದ ಮನೆಯಲ್ಲೀಗ ಹೊಸದೊಂದ ಪುಟ್ಟ ಹಕ್ಕಿಯ ಸರಿಗಮ. ಮನೆಯ ಗೂಡಲ್ಲಿ ಚುಯ್‌ ಚುಯ್‌ ಸದ್ದು ಮಾಡುತ್ತಿರುವ ಈ ಪುಟ್ಟ ಹಕ್ಕಿಗೆ ಏನೆಂದು ಹೆಸರಿಡುವುದು..? ನಮ್ಮನ್ನು ನಯವಾಗಿ ಬಂಧಿಸಿದ ಸುಂದರ ಬಲೆ, ಇದು ಹೊಸ ಪ್ರೀತಿಯ ಅಲೆ.. ವಿನೂತನ ವಿಸ್ಮಯ.. ಎಂದು ಭಾವನಾ ರಾಮಣ್ಣ ಬರೆದುಕೊಂಡಿದ್ದಾರೆ.
ಭಾವನಾ ರಾಮಣ್ಣ ಅವರಿಗೆ ಅವಳಿ ಮಕ್ಕಳು ಜನಿಸಿವೆ. ಆದರೆ ಹುಟ್ಟುವ ಮುನ್ನವೇ ಒಂದು ಮಗು ಮೃತಪಟ್ಟಿದೆ. ಆ ನೋವು ಭಾವನಾ ಅವರಿಗೆ ಇದೆ. ಆದ್ರೆ ಆ ನೋವನ್ನು ನುಂಗಿಕೊಂಡ ಪುಟ್ಟ ಮಗುವಿನ ಆರೈಕೆಯಲ್ಲಿ ಭಾವನ ಖುಷಿ ಕಾಣುತ್ತಿದ್ದಾರೆ.