ಬೆಂಜ್ ಕಾರು ಡಿಕ್ಕಿ ಹೊಡೆದು ಸಂಧ್ಯಾ ಸಾವು ಕೇಸ್: ತನಿಖೆಯಲ್ಲಿ ಮತ್ತಷ್ಟು ಸ್ಪೋಟಕ ಮಾಹಿತಿ ಬಯಲು!

ಬೆಂಗಳೂರು:- ಬೆಂಜ್ ಕಾರು ಡಿಕ್ಕಿ ಹೊಡೆದು ಸಂಧ್ಯಾ ಸಾವು ಕೇಸ್ ಗೆ ಸಂಬಂಧಿಸಿದಂತೆ ತನಿಖೆಯಲ್ಲಿ ಮತ್ತಷ್ಟು ರೋಚಕ ಸಂಗತಿಗಳು ಬಯಲಾಗಿದೆ.

ಬಂಧಿತನಾಗಿರುವ ಬೆಂಜ್ ಕಾರ್ ಚಾಲಕ ಧನುಷ್ ಕಾರಿನಲ್ಲೇ ಕೂತು ಮದ್ಯಪಾನ ಮಾಡಿರೋದು ವಿಚಾರಣೆಯಲ್ಲಿ ತಿಳಿದು ಬಂದಿದೆ.

ಅಷ್ಟಲ್ಲದೇ ಆರೋಪಿ ಮದ್ಯ ಖರೀದಿ ಮಾಡಿದ್ದೆಲ್ಲಿ, ಕುಡಿದಿದ್ದೆಷ್ಟು ಎಂಬ ವಿಚಾರಗಳು ಕೂಡ ತನಿಖೆಯಲ್ಲಿ ಗೊತ್ತಾಗಿದ್ದು, ಆರೋಪಿ ವಿರುದ್ಧ ಸಾಕಷ್ಟು ಸಾಕ್ಷ್ಯಗಳನ್ನು ಕಲೆಹಾಕಲಾಗುತ್ತಿದೆ.

ಬೆನ್ಜ್ ಕಾರನ್ನು ವೇಗವಾಗಿ ಚಲಾಯಿಸಿಕೊಂಡು ಬಂದು ಸಂಧ್ಯಾ ಪ್ರಾಣ ತೆಗೆದಿದ್ದ ಧನುಷ್, ಮದ್ಯಪಾನ ಮಾಡಿರುವುದು ಆ ವೇಳೆಯೇ ಖಚಿತಪಟ್ಟಿತ್ತು. ಹೀಗಾಗಿ ಪೊಲೀಸರು ಆತನನ್ನು ಬಂಧಿಸಿ ಪ್ರಕರಣ ಕೂಡ ದಾಖಲಿಸಿದ್ದರು. ತನಿಖೆ ವೇಳೆ, ಆತ ನಾಯಂಡಹಳ್ಳಿ ಬಳಿ ಎಣ್ಣೆ ಖರೀದಿ ಮಾಡಿರುವುದು ಗೊತ್ತಾಗಿದೆ. ಸ್ನೇಹಿತನ ಜೊತೆ ಸೇರಿ ಎಣ್ಣೆ ಖರೀದಿಸಿ ಕಾರಿನಲ್ಲೇ ಎಣ್ಣೆ ಹೊಡೆದಿರುವ ಶಂಕೆ ಕೂಡ ಇದೆ.

ಕಾರಲ್ಲೇ ಮದ್ಯಪಾನ ಮಾಡಿದ ಬಳಿಕ, ಮೈಸೂರು ಬೆಂಗಳೂರು ರಸ್ತೆಯಲ್ಲಿ ಅತಿವೇಗದಲ್ಲಿ ಕಾರು ಚಲಾಯಿಸಿದ್ದು, ಕೆಂಗೇರಿ ಬಸ್ ನಿಲ್ದಾಣದ ಬಳಿ ಬಂದಾಗ ಹಂಪ್​ ಅನ್ನೂ ಎಗರಿಸಿ ಸಂಧ್ಯಾಗೆ ಡಿಕ್ಕಿ ಹೊಡೆದಿದ್ದಾನೆ. ಇದಕ್ಕೆಲ್ಲ ಪೊಲೀಸರು ಸಾಕಷ್ಟು ಸಾಕ್ಷ್ಯ ಸಂಗ್ರಹಿಸಿದ್ದಾರೆ.