ಪೊಲೀಸರ ಬೈಕೂ ಬಿಡದ ಚಾಲಾಕಿ ಕಳ್ಳ? ಸಿಸಿಟಿವಿಯಲ್ಲಿ ಸೆರೆಯಾಯ್ತು ಕಳ್ಳತನದ ದೃಶ್ಯ!

ವಿಜಯಸಾಕ್ಷಿ ಸುದ್ದಿ, ಗದಗ

ಮನೆಯ ಕಾಂಪೌಂಡ್ ಒಳಗೇ ನಿಮ್ಮ ಬೈಕ್ ನಿಲ್ಲಿಸುತ್ತೀರಾದರೂ ರಾತ್ರಿಯ ಸಮಯದಲ್ಲಿ ಹ್ಯಾಂಡಲ್ ಬಾರ್ ಲಾಕ್ ಮಾಡದೆಯೇ ನಿಲ್ಲಿಸುತ್ತಿದ್ದೀರಾ? ಅದರಲ್ಲೇನಿದೆ, ನಮ್ಮದೇ ಮನೆಯ ಕಾಂಪೌಂಡ್ ಒಳಗೆ ನಿಲ್ಲಿಸುವಾಗಲೂ ಲಾಕ್ ಮಾಡಬೇಕಾ ಎನ್ನಬೇಡಿ. ಮಾಡಲೇಬೇಕು! ಇಲ್ಲದಿದ್ದರೆ, ಬೆಳಗಾಗುವದರೊಳಗೆ ನಿಮ್ಮ ಬೈಕ್ ಚೋರಿಯಾಗಬಹುದು.

ಇಂಥಹದ್ದೊಂದು ಘಟನೆ ಮಂಗಳವಾರ ಬೆಳಗಿನ ಜಾವ ಹೀಗೆ ನಿಲ್ಲಿಸಿಟ್ಟ ಬೈಕ್ ವೊಂದನ್ನು ಕಳ್ಳನೊಬ್ಬ ಕದ್ದೊಯ್ದಿರುವ ದೃಶ್ಯ ಸಿಸಿಟಿವಿಯಲ್ಲಿ ಸೆರೆಯಾಗಿದೆ.

ಇದನ್ನೂ ಓದಿ ರಕ್ತದ ಮಡುವಿನಲ್ಲಿ ಆರ್ ಟಿ ಓ ಏಜೆಂಟನ ಶವ ಪತ್ತೆ

ಬೆಟಗೇರಿ ಬಡಾವಣೆ ಪೊಲೀಸ್ ಠಾಣಾ ವ್ಯಾಪ್ತಿಯ ಜಿಲ್ಲಾ ಕ್ರೀಡಾಂಗಣದ ಬಳಿಯಿರುವ ಮನೆಯೊಂದರಲ್ಲಿ ಈ ಕಳ್ಳತನ ನಡೆದಿರುವ ಬಗ್ಗೆ ಮಾಹಿತಿ ತಿಳಿದುಬಂದಿದೆ. ಹ್ಯಾಂಡಲ್ ಬಾರ್ ಲಾಕ್ ಮಾಡದ ಬೈಕ್ಗಳನ್ನೇ ಟಾರ್ಗೆಟ್ ಮಾಡಿರುವ ಚಾಲಾಕಿ ಕಳ್ಳ, ಬೆಳಗಿನ ಜಾವ 2.27 ಸಮಯಕ್ಕೆ ಕಾಂಪೌಂಡ್ ಒಳಗೆ ಪ್ರವೇಶಿಸಿ, ಹ್ಯಾಂಡಲ್ ಲಾಕ್ ಮಾಡದೇ ಇರುವ ಬೈಕ್ ಪರಿಶೀಲಿಸಿದ್ದು, 2.40ರೊಳಗಾಗಿ ಬೈಕ್ ನ್ನು ಆಚೆ ತೆಗೆದು ಕಳ್ಳತನ ಮಾಡಿ ತಳ್ಳಿಕೊಂಡು ಹೋಗುತ್ತಿರುವ ದೃಶ್ಯ ಸಿಸಿಟಿವಿಯಲ್ಲಿ ದಾಖಲಾಗಿದೆ.

ಈ ಬೈಕ್ ಪೊಲೀಸರೊಬ್ಬರಿಗೆ ಸೇರಿದೆ ಎಂದು ಮೂಲಗಳು ತಿಳಿಸಿವೆ. ಅಕ್ಕಪಕ್ಕದಲ್ಲೇ ಪೊಲೀಸ್ ಇಲಾಖೆಯ ಸಿಬ್ಬಂದಿ/ಅಧಿಕಾರಿಗಳ ಮನೆಯೂ ಇದೆಯೆಂದು ತಿಳಿದುಬಂದಿದೆ. ಆದರೂ ಚಾಲಾಕಿ ಕಳ್ಳ ಇಂಥದೊಂದು ಪ್ರದೇಶದಲ್ಲಿ ತನ್ನ ಕೈಚಳಕ ತೋರಿ ಇಷ್ಟು ಕಡಿಮೆ ಸಮಯದಲ್ಲಿ ಬೈಕ್ ಕದ್ದೊಯ್ದದ್ದು ಸಿಸಿಟಿವಿ ದೃಶ್ಯ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿದೆ.

ಇನ್ನುಮುಂದೆ ರಾತ್ರಿಯ ಸಮಯದಲ್ಲಿ ಮನೆಯೆದುರಾಗಲಿ, ಕಾಂಪೌಂಡ್ ಒಳಗೇ ಆಗಲಿ, ಬೈಕ್ ನಿಲ್ಲಿಸುವಾಗ ಮರೆಯದೇ ಹ್ಯಾಂಡಲ್ ಲಾಕ್ ಮಾಡಿರುವ ಬಗ್ಗೆ ಪರಿಶೀಲಿಸಿಕೊಳ್ಳುವದು ಅನಿವಾರ್ಯವೂ ಆಗಿದೆ.