ಬಹುತೇಕ ಮನೆಗಳಲ್ಲಿ ಜಾಗ ಎಷ್ಟೇ ಇದ್ದರೂ ಸಾಲದೆ, ಖಾಲಿ ಜಾಗ ಕಂಡರೆ ಅಲ್ಲಿ ವಸ್ತುಗಳನ್ನು ಇಡುವ ಅಭ್ಯಾಸವಿರುತ್ತದೆ. ಅದರಲ್ಲೂ ಫ್ರಿಡ್ಜ್ ಮೇಲ್ಭಾಗವನ್ನು ಹಲವರು ಹೆಚ್ಚುವರಿ ಸ್ಟೋರೇಜ್ ಆಗಿ ಬಳಸುತ್ತಾರೆ. ಬಾಕ್ಸ್ಗಳು, ಔಷಧಿಗಳು, ಡೆಕೊರೇಟಿವ್ ವಸ್ತುಗಳು, ನೀರಿನ ಬಾಟಲಿ ಹೀಗೆ ಅನೇಕ ವಸ್ತುಗಳು ಫ್ರಿಡ್ಜ್ ಮೇಲೆ ಕಾಣಿಸುತ್ತವೆ.
ಆದರೆ ಕೆಲವೊಂದು ವಸ್ತುಗಳನ್ನು ಫ್ರಿಡ್ಜ್ ಮೇಲೆ ಇಡುವುದು ತಪ್ಪು ಮಾತ್ರವಲ್ಲ, ಅಪಾಯಕ್ಕೂ ಕಾರಣವಾಗಬಹುದು. ಇದರಿಂದ ರೆಫ್ರಿಜರೇಟರ್ನ ಕಾರ್ಯಕ್ಷಮತೆಯ ಮೇಲೂ ಕೆಟ್ಟ ಪರಿಣಾಮ ಬೀರುತ್ತದೆ. ಹಾಗಾದರೆ ಯಾವ ವಸ್ತುಗಳನ್ನು ಫ್ರಿಡ್ಜ್ ಮೇಲೆ ಇಡಬಾರದು ಎಂಬುದನ್ನು ತಿಳಿಯೋಣ.
ಫ್ರಿಡ್ಜ್ ಮೇಲೆ ಇಡಬಾರದ ವಸ್ತುಗಳು:
ಔಷಧಿಗಳು:
ಕೆಲವರು ಔಷಧಿಗಳನ್ನು ಫ್ರಿಡ್ಜ್ ಮೇಲೆ ಇಡುವ ಅಭ್ಯಾಸ ಹೊಂದಿರುತ್ತಾರೆ. ಆದರೆ ಫ್ರಿಡ್ಜ್ನ ಮೇಲ್ಭಾಗ ಹಾಗೂ ಹಿಂಭಾಗ ಹೆಚ್ಚು ಬಿಸಿಯಾಗಿರುವುದರಿಂದ, ಈ ಶಾಖ ಔಷಧಿಗಳ ಗುಣಮಟ್ಟಕ್ಕೆ ಹಾನಿ ಮಾಡಬಹುದು. ಆದ್ದರಿಂದ ಔಷಧಿಗಳನ್ನು ಸದಾ ಒಣ ಹಾಗೂ ತಂಪಾದ ಸ್ಥಳದಲ್ಲಿ ಇಡುವುದು ಉತ್ತಮ.
ನೀರಿನ ಕ್ಯಾನ್ಗಳು ಅಥವಾ ಬಾಟಲಿಗಳು:
ಜಾಗ ಉಳಿಸುವ ಉದ್ದೇಶದಿಂದ ಫ್ರಿಡ್ಜ್ ಮೇಲೆ ನೀರಿನ ಕ್ಯಾನ್ ಅಥವಾ ಬಾಟಲಿ ಇಡುವುದು ಸರಿಯಲ್ಲ. ಇದರಿಂದ ಫ್ರಿಡ್ಜ್ ಮೇಲೆ ಹೆಚ್ಚುವರಿ ಒತ್ತಡ ಬಿದ್ದು ಸಮತೋಲನ ಹಾಳಾಗಬಹುದು. ಅಲ್ಲದೆ ನೀರು ಚೆಲ್ಲಿದರೆ ಶಾರ್ಟ್ ಸರ್ಕ್ಯೂಟ್ ಆಗುವ ಅಪಾಯವೂ ಇದೆ.
ಎಲೆಕ್ಟ್ರಾನಿಕ್ ಉಪಕರಣಗಳು:
ಟೋಸ್ಟರ್, ಮೈಕ್ರೋವೇವ್, ಓವನ್ ಅಥವಾ ಇತರ ಸಣ್ಣ ಎಲೆಕ್ಟ್ರಾನಿಕ್ ವಸ್ತುಗಳನ್ನು ಫ್ರಿಡ್ಜ್ ಮೇಲೆ ಇಡುವುದು ಅಪಾಯಕಾರಿ. ಫ್ರಿಡ್ಜ್ನಿಂದ ಹೊರಬರುವ ಶಾಖ ಮತ್ತು ಕಂಪನಗಳು ಈ ಉಪಕರಣಗಳಿಗೆ ಹಾನಿ ಉಂಟುಮಾಡಬಹುದು.
ಅಕ್ವೇರಿಯಂ:
ಫ್ರಿಡ್ಜ್ ಮೇಲೆ ಮೀನಿನ ಅಕ್ವೇರಿಯಂ ಇಡುವುದು ಸೂಕ್ತವಲ್ಲ. ಫ್ರಿಡ್ಜ್ನಿಂದ ಬರುವ ಶಾಖ ಮತ್ತು ಕಂಪನಗಳಿಂದ ನೀರಿನ ತಾಪಮಾನ ಬದಲಾಗಬಹುದು. ಇದು ಮೀನುಗಳಿಗೆ ಹಾನಿಕಾರಕವಾಗಬಹುದು.
ಕಾಗದ, ಪತ್ರಿಕೆಗಳು ಹಾಗೂ ಪ್ಲಾಸ್ಟಿಕ್ ಚೀಲಗಳು:
ಫ್ರಿಡ್ಜ್ನ ಹಿಂಭಾಗದಿಂದ ಬಿಸಿಯಾದ ಗಾಳಿ ಹೊರಬರುತ್ತದೆ. ಮೇಲ್ಭಾಗದಲ್ಲಿ ಕಾಗದ ಅಥವಾ ಪ್ಲಾಸ್ಟಿಕ್ ಇಟ್ಟರೆ ಶಾಖ ಸೆರೆಯಾಗುತ್ತದೆ. ಇದರಿಂದ ಫ್ರಿಡ್ಜ್ ಹೆಚ್ಚು ಬಿಸಿಯಾಗುವ ಹಾಗೂ ಬೆಂಕಿ ಅಪಾಯ ಉಂಟಾಗುವ ಸಾಧ್ಯತೆ ಇದೆ.
ಬೆಂಕಿ ಹೊತ್ತಿಕೊಳ್ಳುವ ವಸ್ತುಗಳು:
ಬೆಂಕಿಕಡ್ಡಿ, ಲೈಟರ್, ಸ್ಪ್ರೇ ಕ್ಯಾನ್ಗಳಂತಹ ವಸ್ತುಗಳನ್ನು ಫ್ರಿಡ್ಜ್ ಮೇಲೆ ಇಡುವುದು ಅತ್ಯಂತ ಅಪಾಯಕಾರಿ. ಬಿಸಿಯಿಂದ ಅವು ಬೆಂಕಿ ಹಿಡಿಯುವ ಸಾಧ್ಯತೆ ಇದೆ.
ಪ್ಲಾಸ್ಟಿಕ್ ಅಥವಾ ಬಟ್ಟೆಯ ಕವರ್ಗಳು:
ಧೂಳು ತಪ್ಪಿಸಲು ಕೆಲವರು ಫ್ರಿಡ್ಜ್ ಮೇಲೆ ಪ್ಲಾಸ್ಟಿಕ್ ಅಥವಾ ಬಟ್ಟೆಯ ಹೊದಿಕೆ ಹಾಕುತ್ತಾರೆ. ಆದರೆ ಇದರಿಂದ ಶಾಖ ಹೊರ ಹೋಗಲು ಅವಕಾಶ ಸಿಗದೆ ಫ್ರಿಡ್ಜ್ ಹೆಚ್ಚು ಬಿಸಿಯಾಗುತ್ತದೆ ಮತ್ತು ಹಾನಿಯಾಗುವ ಸಾಧ್ಯತೆ ಹೆಚ್ಚುತ್ತದೆ.
ಪ್ಲಾಂಟ್ಗಳು ಮತ್ತು ಅಲಂಕಾರಿಕ ವಸ್ತುಗಳು:
ಫ್ರಿಡ್ಜ್ ಮೇಲೆ ಭಾರವಾದ ಪ್ಲಾಂಟ್ಗಳು ಅಥವಾ ಡೆಕೊರೇಟಿವ್ ವಸ್ತುಗಳನ್ನು ಇಡುವುದರಿಂದ ಫ್ರಿಡ್ಜ್ಗೆ ಹೆಚ್ಚುವರಿ ಒತ್ತಡ ಬೀಳುತ್ತದೆ. ಇದರಿಂದ ಸಾಧನ ಹಾನಿಯಾಗುವ ಸಾಧ್ಯತೆ ಇರುತ್ತದೆ.
ಸೂಚನೆ: ಫ್ರಿಡ್ಜ್ ಸರಿಯಾಗಿ ಕಾರ್ಯನಿರ್ವಹಿಸಲು ಅದರ ಮೇಲ್ಭಾಗವನ್ನು ಸಾಧ್ಯವಾದಷ್ಟು ಖಾಲಿಯಾಗಿಡುವುದು ಸುರಕ್ಷಿತ ಮತ್ತು ಉತ್ತಮ ಅಭ್ಯಾಸ.
