ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಅಭಿನಯದ ಬಹುನಿರೀಕ್ಷಿತ ‘ದಿ ಡೆವಿಲ್’ ಸಿನಿಮಾ ಇಂದು ರಾಜ್ಯಾದ್ಯಂತ ಭರ್ಜರಿಯಾಗಿ ತೆರೆಕಂಡಿದೆ. 300ಕ್ಕೂ ಹೆಚ್ಚು ಚಿತ್ರಮಂದಿರಗಳಲ್ಲಿ ಏಕಕಾಲಕ್ಕೆ ರಿಲೀಸ್ ಆಗಿರುವ ಈ ಸಿನಿಮಾ, ಬಿಡುಗಡೆ ದಿನವೇ ಸಂಭ್ರಮದ ಸಡಗರ ಸೃಷ್ಟಿಸಿದ್ದು ಅಭಿಮಾನಿಗಳ ಹೃತ್ಪೂರ್ವಕ ಉತ್ಸಾಹಕ್ಕೆ ಸಾಕ್ಷಿಯಾಗಿದೆ.
ಮಿಲನಾ ಪ್ರಕಾಶ್ ನಿರ್ದೇಶನದ ಚಿತ್ರದಲ್ಲಿ ದರ್ಶನ್ ಜೊತೆಗೆ ರಚನಾ ರೈ, ಶರ್ಮಿಳಾ ಮಾಂಡ್ರೆ, ಅಚ್ಯುತ್ ಕುಮಾರ್ ಮತ್ತು ಗಿಲ್ಲಿ ನಟರೂ ಪ್ರಮುಖ ಪಾತ್ರಗಳಲ್ಲಿ ಮಿಂಚಿದ್ದಾರೆ. ಕಾಂತರಾಜ್ ಶಕ್ತಿಯುತ ಡೈಲಾಗ್ಗಳನ್ನು ಬರೆದರೆ, ಅಜನೀಶ್ ಲೋಕನಾಥ್ ತಮ್ಮ ಸಂಭ್ರಮಭರಿತ ಸಂಗೀತದಿಂದ ಚಿತ್ರಕ್ಕೆ ಮತ್ತೊಂದು ಮೆರಗು ನೀಡಿದ್ದಾರೆ.
ರಿಲೀಸ್ ದಿನ ಬೆಳಗ್ಗೆಯೇ ಬೆಂಗಳೂರಿನ ನರ್ತಕಿ ಚಿತ್ರಮಂದಿರದಲ್ಲಿ ಹಬ್ಬದ ಊಟವೇ ಸೃಷ್ಟಿಯಾಯಿತು. ಅಭಿಮಾನಿಗಳು ಪಟಾಕಿ ಸಿಡಿಸಿ, ಡಿಜೆ ಸಾಂಗ್ಗಳಿಗೆ ಕುಣಿದು, ದರ್ಶನ್ ಡೈಲಾಗ್ಗಳನ್ನು ಕೂಗಿ ಸಂಭ್ರಮಿಸಿದರು. ಬೆಳಗ್ಗೆ 6.30ಕ್ಕೆ ಮೊದಲ ಶೋ ಪ್ರಾರಂಭವಾಗುತ್ತಿದ್ದಂತೆಯೇ ನರ್ತಕಿ ಮುಂಭಾಗ ಭಾರಿ ಜನಸ್ತೋಮ ಹರಿದುಬಂತು. ದರ್ಶನ್ ಅಭಿಮಾನಿಗಳಿಗಾಗಿ 72 ಅಡಿ ಎತ್ತರದ ಕಟೌಟ್ ನಿಲ್ಲಿಸಲಾಗಿದ್ದು, ಅದು ಅಲ್ಲೇ ಒಂದು ಕುಂಭಮೇಳದ ವಾತಾವರಣವನ್ನುಂಟು ಮಾಡಿತು.
ರಾಜ್ಯದೆಲ್ಲೆಡೆ ನಡೆಯುತ್ತಿರುವ ಈ ಸಂಭ್ರಮ ‘ದಿ ಡೆವಿಲ್’ ಈಗಾಗಲೇ ದೊಡ್ಡ ಯಶಸ್ಸಿನ ಶುಭಸೂಚನೆ ನೀಡುತ್ತಿದೆ.
ದರ್ಶನ್ ಚಿತ್ರ ನೋಡಲು ಗೈರಾದ ಹಿನ್ನೆಲೆಯಲ್ಲಿ ಅವರ ಪತ್ನಿ ವಿಜಯಲಕ್ಷ್ಮಿ ಅಭಿಮಾನಿಗಳ ಜೊತೆ ಫಸ್ಟ್ ಡೇ ಫಸ್ಟ್ ಶೋ ನೋಡಲು ನರ್ತಕಿ ಚಿತ್ರಮಂದಿರಕ್ಕೆ ಆಗಮಿಸಿದರು. ಅವರ ಜೊತೆ ಮಗ ವಿನೀಶ್ ಕೂಡ ಇದ್ದರು. ತಂದೆಯ ಸಿನಿಮಾಗೆ ಬೆಂಬಲವಾಗಿ ವಿನೀಶ್ ಕೂಡ ಥಿಯೇಟರ್ ಒಳಗೆ ಮೊಬೈಲ್ ನಲ್ಲಿ ಸ್ಕ್ರೀನ್ ರೆಕಾರ್ಡ್ ಮಾಡುತ್ತಿರುವ ದೃಶ್ಯಗಳು ವೈರಲ್ ಆಗಿವೆ.
