ಬೆಂಗಳೂರು:- ಎಣ್ಣೆ ಏಟಲ್ಲಿ ಮಾರಣಾಂತಿಕ ಹಲ್ಲೆ ನಡೆಸಿದವನ ವಿರುದ್ದ ಗಾಯಾಳು ದೂರು ಕೊಡುತ್ತಿದ್ದಂತೆ ಆರೋಪಿ ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡ ಘಟನೆ ನಗರದ ಮೈಸೂರು ರಸ್ತೆಯ ಕಸ್ತೂರಿ ಬಾ ನಗರದಲ್ಲಿ ಜರುಗಿದೆ.
ದಿವ್ಯ ತೇಜ್ ಮೃತ ಆರೋಪಿ. ರಿಷಿ ತೇಜ್ ಹಲ್ಲೆಗೊಳಗಾದ ವ್ಯಕ್ತಿ. ಘಟನೆ ನಡೆದ ದಿನ ರಿಷಿ ಕಡೆಯಿಂದ ದಿವ್ಯ ಬಿಯರ್ ಬಾಟಲಿಗಳನ್ನು ತರಿಸಿದ್ದ. ಬಳಿಕ ತಡರಾತ್ರಿವರೆಗೆ ಇಬ್ಬರು ಸೇರಿಕೊಂಡು ಕಂಠಪೂರ್ತಿ ಕುಡಿದಿದ್ದರು. ಈ ವೇಳೆ ಕುಡಿದ ನಶೆಯಲ್ಲಿದ್ದ ದಿವ್ಯ ಏಕಾಏಕಿ ಬಿಯರ್ ಬಾಟಲಿಯಿಂದ ರಿಷಿ ಮೇಲೆ ಮಾರಣಾಂತಿಕ ಹಲ್ಲೆ ನಡೆಸಿದ್ದ. ನಂತರ ರಕ್ತದ ಮಡುವಿನಲ್ಲಿ ಬಿದ್ದಿದ್ದ ರಿಷಿಗೆ ದಿವ್ಯ ಹೊಸ ಬಟ್ಟೆ ತಂದುಕೊಟ್ಟಿದ್ದ. ಬಳಿಕ ರಿಷಿ ಹೊಸ ಬಟ್ಟೆ ಧರಿಸಿಕೊಂಡು ದೂರು ನೀಡಲು ಪೊಲೀಸ್ ಠಾಣೆಗೆ ತೆರಳಿದ್ದ.
ದೂರು ದಾಖಲಾಗುತ್ತಿದ್ದಂತೆ ಹೆದರಿಕೊಂಡ ದಿವ್ಯ ಹಲ್ಲೆ ನಡೆದ ಮನೆಗೆ ಮರಳಿ ನೇಣು ಬಿಗಿದುಕೊಂಡು ಆತ್ಮಹತ್ಯೆಗೆ ಶರಣಾಗಿದ್ದಾನೆ. ರಿಷಿ ನೀಡಿದ್ದ ದೂರಿನ ಆಧಾರದ ಮೇಲೆ ಪೊಲೀಸರು ಮನೆ ಪರಿಶೀಲನೆಗೆ ಬಂದಾಗ ಆತ್ಮಹತ್ಯೆ ಮಾಡಿಕೊಂಡಿರುವುದಾಗಿ ತಿಳಿದು ಬಂದಿದೆ. ಸಧ್ಯ ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು, ತನಿಖೆ ಕೈಗೊಂಡಿದ್ದಾರೆ.