ಬೆಳ್ಳನೆ ಪಳಪಳನೆ ಹೊಳೆಯುತ್ತಿದ್ದ ಹಲ್ಲುಗಳು ನೋಡ ನೋಡುತ್ತಿದ್ದಂತೆ ಹಳದಿ ಬಣ್ಣಕ್ಕೆ ತಿರುಗಿ ನಮಗೂ ಬೇಜಾರು ಮಾಡಿ ಇತರರಿಗೂ ಬೇಸರವನ್ನು ತಂದಿಡುತ್ತವೆ. ಇದಕ್ಕೆ ಮುಖ್ಯ ಕಾರಣವೆಂದರೆ ನಮ್ಮ ಹಲ್ಲುಗಳ ಮೇಲಿರುವ ” ಎನಾಮೆಲ್ ” ಎಂಬ ಒಂದು ಬಿಳಿ ಪದರ.
ಸಾಮಾನ್ಯವಾಗಿ ನಾವು ಯಾವ ವಸ್ತುವಿಗಾದರೂ ಬಣ್ಣ ಹಚ್ಚಿದರೆ ಅದು ದಿನಕಳೆದಂತೆ ಹೇಗೆ ಮಾಸುತ್ತದೋ ಅದೇ ರೀತಿ ನಿಸರ್ಗದತ್ತವಾಗಿ ನಮ್ಮ ಹಲ್ಲುಗಳು ಹುಟ್ಟುವಾಗ ಈ ಎನಾಮೆಲ್ ಎಂಬ ಬಿಳಿ ಬಣ್ಣದ ಪದರವನ್ನು ಹೊದ್ದುಕೊಂಡು ನಮ್ಮ ಬಾಯೊಳಗೆ ಮೂಡಿ ಬಂದಿರುತ್ತವೆ.
ನಮ್ಮ ಹಲ್ಲುಗಳ ಉಪಯೋಗ ದಿನದಿಂದ ದಿನಕ್ಕೆ ಜಾಸ್ತಿಯಾದಂತೆ ಈ ಪದರ ಇಲ್ಲವಾಗುತ್ತದೆ. ಆಗ ಇದರ ಕೆಳಗೆ ಇರುವ ಹಳದಿ ಬಣ್ಣದ ಪದರ ಗೋಚರಿಸುತ್ತದೆ. ಅದರಲ್ಲೂ ಕೆಲ ವಯಸ್ಸಾದ ಮಂದಿಗಂತೂ ಸಂಪೂರ್ಣವಾಗಿ ಎನಾಮೆಲ್ ಅಂಶ ಹಾಳಾಗಿ ಕಾಡು ಹಳದಿ ಬಣ್ಣಕ್ಕೆ ಹಲ್ಲುಗಳು ಮಾರ್ಪಾಡಾಗಿರುತ್ತವೆ. ನಮ್ಮ ಹಲ್ಲುಗಳನ್ನು ಮತ್ತೆ ವಾಪಾಸ್ ಬಿಳಿಬಣ್ಣಕ್ಕೆ ತಿರುಗಿಸಬೇಕಾದರೆ ನಾವು ಕೆಲ ಮನೆಮದ್ದು ತಿಳಿಸಿಕೊಟ್ಟಿದ್ದೇವೆ. ಅದನ್ನು ಟ್ರೈ ಮಾಡಿ
ಪ್ರತಿದಿನ ಬ್ರಷ್: ಕೆಲವರಿಗೆ ಹಲ್ಲುಜ್ಜದೆ ಟೀ ಬಿಸ್ಕತ್ ತಿನ್ನುವ ಅಭ್ಯಾಸವಿರುತ್ತದೆ. ಈ ಸಂದರ್ಭದಲ್ಲಿ ನಿಮ್ಮ ಹಲ್ಲುಗಳು ಹುಳುಕಾಗಲು ಪ್ರಾರಂಭಿಸುತ್ತೀರಿ. ಆದ್ದರಿಂದ ನೀವು ಎದ್ದ ತಕ್ಷಣ ಯಾವಾಗಲೂ ಬ್ರಷ್ ಮಾಡಬೇಕು. ಇದರೊಂದಿಗೆ ನಿಮ್ಮ ಹಲ್ಲುಗಳು ಹಳದಿ ಬಣ್ಣಕ್ಕೆ ತಿರುಗುವುದು ತಪ್ಪುತ್ತದೆ.
ಲವಂಗದ ಪುಡಿ: ಲವಂಗದ ಪುಡಿಯಿಂದ ಹಳದಿ ಹಲ್ಲುಗಳನ್ನು ಬಿಳಿಯಾಗಿಸಬಹುದು. ಇದಕ್ಕಾಗಿ, ನೀವು ಲವಂಗದ ಪುಡಿಯನ್ನು ಆಲಿವ್ ಎಣ್ಣೆಯೊಂದಿಗೆ ಬೆರೆಸಿ ಹಲ್ಲುಗಳನ್ನು ಉಜ್ಜಬೇಕು. ಇದು ಬಾಯಿಯ ದುರ್ವಾಸನೆಯನ್ನೂ ಕಡಿಮೆ ಮಾಡುತ್ತದೆ ಮತ್ತು ಬ್ಯಾಕ್ಟೀರಿಯಾವನ್ನು ಕಡಿಮೆ ಮಾಡುತ್ತದೆ.
ನಿಂಬೆ ರಸ : ನಿಂಬೆ ರಸ ಕೂಡ ನಿಮಗೆ ಸಹಾಯ ಮಾಡಬಹುದು. ನಿಂಬೆ ರಸದಲ್ಲಿ ಸಾಸಿವೆ ಎಣ್ಣೆ ಮತ್ತು ಉಪ್ಪನ್ನು ಬೆರೆಸಿ ಪೇಸ್ಟ್ ತಯಾರಿಸಬೇಕು. ಇದರ ಮೂಲಕ ಹಲ್ಲುಜ್ಜಿದರೆ ಹಳದಿ ಹಲ್ಲುಗಳು ಬಿಳಿಯಾಗಲು ಪ್ರಾರಂಭಿಸುತ್ತವೆ.
ಆಪಲ್ ವಿನೆಗರ್: ಆಪಲ್ ಸೈಡರ್ ವಿನೆಗರ್ ಹಳದಿ ಹಲ್ಲುಗಳನ್ನು ಬಿಳಿಯಾಗಿಸಲು ಸಹ ಸಹಾಯ ಮಾಡುತ್ತದೆ. ಅರ್ಧ ಟೀಚಮಚ ಆಪಲ್ ಸೈಡರ್ ವಿನೆಗರ್ ಅನ್ನು ಒಂದು ಕಪ್ ನೀರಿನಲ್ಲಿ ಬೆರೆಸಬೇಕು. ಇದರಿಂದ ನಿಧಾನವಾಗಿ ಬ್ರಷ್ ಮಾಡಿ. ಹೀಗೆ ಮಾಡುವುದರಿಂದ ನಿಮ್ಮ ಹಲ್ಲುಗಳ ಹಳದಿ ಬಣ್ಣವು ಬೇಗನೆ ನಿವಾರಣೆಯಾಗುತ್ತದೆ.
