ಸಂಗೀತ ಲೋಕದಲ್ಲಿ ದೊಡ್ಡ ಕಾನೂನು ತಿರುವು ಕಂಡಿದೆ. ಇಳಯರಾಜಾ ಅವರಿಗೆ ವಿರುದ್ಧವಾಗಿ ದೆಹಲಿ ಹೈಕೋರ್ಟ್ ಮಧ್ಯಂತರ ತಡೆಯಾಜ್ಞೆ ನೀಡಿದೆ.
ಸರಿಗಮ ಸಲ್ಲಿಸಿದ್ದ ಅರ್ಜಿಯಲ್ಲಿ, 1976 ರಿಂದ 2001ರ ನಡುವೆ ಇಳಯರಾಜಾ ಸಂಗೀತ ನೀಡಿದ ಸುಮಾರು 134 ಚಲನಚಿತ್ರಗಳ ಸಂಗೀತ ಹಾಗೂ ಧ್ವನಿ ಮುದ್ರಣ ಹಕ್ಕುಗಳು ತಮ್ಮ ವಶದಲ್ಲಿವೆ ಎಂದು ವಾದಿಸಿತ್ತು. ಚಿತ್ರ ನಿರ್ಮಾಪಕರೊಂದಿಗೆ ಮಾಡಿಕೊಂಡ ಔಪಚಾರಿಕ ಒಪ್ಪಂದಗಳ ಮೂಲಕ ವಿಶ್ವಾದ್ಯಂತ ಮತ್ತು ಶಾಶ್ವತ ಹಕ್ಕುಸ್ವಾಮ್ಯ ಪಡೆದಿದ್ದೇವೆ ಎಂದು ಸಂಸ್ಥೆ ನ್ಯಾಯಾಲಯಕ್ಕೆ ತಿಳಿಸಿತು.
ಆದರೆ ಇಳಯರಾಜಾ ಈ ಹಾಡುಗಳನ್ನು Amazon Music, iTunes ಹಾಗೂ JioSaavn ಮೊದಲಾದ ಡಿಜಿಟಲ್ ವೇದಿಕೆಗಳಲ್ಲಿ ಅಪ್ಲೋಡ್ ಮಾಡಿ ತಮ್ಮದೇ ಎಂದು ಹೇಳಿಕೊಳ್ಳುತ್ತಿರುವುದು ಕಾನೂನುಬಾಹಿರ ಎಂದು ಸರಿಗಮ ವಾದಿಸಿತು.
1957ರ ಹಕ್ಕುಸ್ವಾಮ್ಯ ಕಾಯಿದೆಯ ಪ್ರಕಾರ, ಚಿತ್ರಕ್ಕಾಗಿ ರಚಿಸಲಾದ ಸಂಗೀತದ ಮೊದಲ ಮಾಲೀಕರು ನಿರ್ಮಾಪಕರೇ ಎಂಬುದನ್ನು ಸರಿಗಮ ವಕೀಲರು ನ್ಯಾಯಾಲಯಕ್ಕೆ ತಿಳಿಸಿದರು. ವಿಚಾರಣೆ ನಡೆಸಿದ ನ್ಯಾಯಮೂರ್ತಿ ತುಷಾರ್ ರಾವ್ ಕೆಟೇಲಾ ಸರಿಗಮದ ವಾದ ಒಪ್ಪಿಕೊಂಡು ಮಧ್ಯಂತರ ತಡೆಯಾಜ್ಞೆ ನೀಡಿದರು.
ಈ ಆದೇಶದ ಪ್ರಕಾರ, ಇಳಯರಾಜಾ ಅಥವಾ ಅವರ ಪ್ರತಿನಿಧಿಗಳು ಸರಿಗಮ ವಶದಲ್ಲಿರುವ 134 ಚಿತ್ರಗಳ ಹಾಡುಗಳನ್ನು ಬಳಸಬಾರದು, ಹಕ್ಕು ಸಾಧಿಸಬಾರದು ಅಥವಾ ಪರವಾನಗಿ ನೀಡಬಾರದು. ತಡೆಯಾಜ್ಞೆ ವಿಧಿಸದಿದ್ದರೆ ಸರಿಗಮಕ್ಕೆ ತುಂಬಲಾಗದ ನಷ್ಟವಾಗುತ್ತದೆ ಎಂದು ನ್ಯಾಯಾಲಯ ಸ್ಪಷ್ಟಪಡಿಸಿದೆ.
