ಸುಧೀರ್ ಅತ್ತಾವರ್ ನಿರ್ದೇಶನದ ‘ಕೊರಗಜ್ಜ’ ಸಿನಿಮಾ, ತನ್ನ ನಿರ್ಮಾಣ ಹಂತದಿಂದಲೇ ವಿಭಿನ್ನ ಪ್ರಯೋಗಗಳ ಮೂಲಕ ಗಮನ ಸೆಳೆಯುತ್ತಿದ್ದು, ಇದೀಗ ಮತ್ತೊಂದು ಮಹತ್ವದ ತಾಂತ್ರಿಕ ನಿರ್ಧಾರದಿಂದ ಸಿನಿ ವಲಯದಲ್ಲಿ ಚರ್ಚೆಗೆ ಗ್ರಾಸವಾಗಿದೆ.
ಮೂಲತಃ 2ಡಿ ತಂತ್ರಜ್ಞಾನದಲ್ಲಿ ಚಿತ್ರೀಕರಿಸಲ್ಪಟ್ಟ ಈ ಚಿತ್ರವನ್ನು, ಇದೀಗ 3ಡಿ ಫಾರ್ಮ್ಯಾಟ್ಗೆ ಪರಿವರ್ತಿಸುವ ನಿರ್ಧಾರ ಕೈಗೊಳ್ಳಲಾಗಿದೆ. ಸಾಮಾನ್ಯವಾಗಿ 3ಡಿ ಚಿತ್ರಗಳು ಪ್ರಾರಂಭದಿಂದಲೇ ಆ ರೀತಿಯಲ್ಲಿ ಚಿತ್ರೀಕರಿಸಲಾಗುತ್ತದೆ. ಆದರೆ ಪೂರ್ಣಗೊಂಡ 2ಡಿ ದೃಶ್ಯಗಳನ್ನು 3ಡಿಗೆ ಪರಿವರ್ತಿಸುವುದು ದುಬಾರಿ ಮತ್ತು ಸಮಯಬೇಡಿಕೆಯ ಪ್ರಕ್ರಿಯೆಯಾಗಿದ್ದು, ಈ ಹೆಜ್ಜೆ ಚಿತ್ರತಂಡದ ಮಹತ್ವಾಕಾಂಕ್ಷೆಯನ್ನು ತೋರಿಸುತ್ತದೆ.
ಸುಮಾರು 40 ಮಂದಿ ತಂತ್ರಜ್ಞರ ತಂಡ ಈ ಪರಿವರ್ತನೆ ಕಾರ್ಯದಲ್ಲಿ ತೊಡಗಿಕೊಂಡಿದ್ದು, ಪ್ರೇಕ್ಷಕರಿಗೆ ದೃಶ್ಯ ವೈಭವ ಹೆಚ್ಚಿಸುವ ಉದ್ದೇಶದಿಂದ ಈ ನಿರ್ಧಾರ ಕೈಗೊಳ್ಳಲಾಗಿದೆ. ಜೊತೆಗೆ, ವಿವಿಧ ಭಾಷಾ ಪ್ರೇಕ್ಷಕರಿಗೂ ಸಿನಿಮಾ ತಲುಪುವ ಉದ್ದೇಶವಿದೆ.
ಚಿತ್ರದ ಮತ್ತೊಂದು ಪ್ರಮುಖ ಹೈಲೈಟ್ ಅಂದರೆ ಅಂಡರ್ವಾಟರ್ ಚಿತ್ರೀಕರಣ. ಕೇರಳದ ತಿರುವನಂತಪುರಂನ ‘ವಿಸ್ಮಯ’ ಸ್ಟುಡಿಯೋದಲ್ಲಿ ವಿಶೇಷವಾಗಿ ನಿರ್ಮಿಸಲಾದ ನೀರಿನ ಸೆಟ್ನಲ್ಲಿ ಈ ದೃಶ್ಯಗಳನ್ನು ಸೆರೆಹಿಡಿಯಲಾಗಿದೆ. ಖ್ಯಾತ ಸಿನೆಮಾಟೋಗ್ರಾಫರ್ ಮನೋಜ್ ಪಿಳ್ಳೈ ನಾಲ್ಕು ಕ್ಯಾಮೆರಾಗಳ ಮೂಲಕ ಈ ಸನ್ನಿವೇಶಗಳನ್ನು ಚಿತ್ರೀಕರಿಸಿದ್ದಾರೆ.
ನಟಿ ಶ್ರುತಿ ಈ ದೃಶ್ಯಗಳಿಗಾಗಿ ಸುಮಾರು 15 ದಿನಗಳ ತಯಾರಿ ನಡೆಸಿ, ಸ್ಕ್ಯೂಬಾ ತಜ್ಞರ ಮೇಲ್ವಿಚಾರಣೆಯಲ್ಲಿ ಅಪಾಯಕಾರಿ ಸ್ಟಂಟ್ಗಳನ್ನು ನಿರ್ವಹಿಸಿದ್ದಾರೆ. 30 ಅಡಿ ಎತ್ತರದಿಂದ ನೀರಿಗೆ ಜಿಗಿಯುವ ಹಾಗೂ 22 ಸೆಕೆಂಡುಗಳ ಕಾಲ ಉಸಿರಾಟವಿಲ್ಲದೆ ಅಭಿನಯಿಸುವ ಸನ್ನಿವೇಶಗಳು ಚಿತ್ರದಲ್ಲಿ ಪ್ರಮುಖ ಆಕರ್ಷಣೆಯಾಗಿವೆ.
ಸುರಕ್ಷತೆಗಾಗಿ ಸ್ಥಳದಲ್ಲೇ ವೈದ್ಯಕೀಯ ತಂಡ ಹಾಗೂ ಆಂಬ್ಯುಲೆನ್ಸ್ ಸೌಲಭ್ಯವನ್ನು ಒದಗಿಸಲಾಗಿತ್ತು.
ಒಟ್ಟಿನಲ್ಲಿ, ‘ಕೊರಗಜ್ಜ’ ಸಿನಿಮಾ ತಾಂತ್ರಿಕತೆ, ಸಾಹಸ ಮತ್ತು ದೃಶ್ಯ ವೈಭವವನ್ನು ಒಟ್ಟುಗೂಡಿಸಿದ ವಿಭಿನ್ನ ಸಿನೆಮಾಟಿಕ್ ಅನುಭವವಾಗಿ ಮೂಡಿಬರಲು ಸಜ್ಜಾಗಿದೆ.
