‘ಮೊಟ್ಟ ರಾಜೇಂದ್ರನ್’ ಎಂದರೆ ತಕ್ಷಣ ನೆನಪಾಗುವುದು ಬೋಳು ತಲೆ, ವಿಶಿಷ್ಟ ಮುಖಭಾವ ಮತ್ತು ನಿರಂತರ ನಗು. ಹೆಸರು ಗೊತ್ತಿಲ್ಲದವರಿಗೆಲೂ ಅವರ ಮುಖ ಮಾತ್ರ ನೋಡಿದರೆ ಸಾಕು — “ಅಯ್ಯೋ, ಈ ನಟನೇ!” ಎಂದು ಹೇಳುತ್ತಾರೆ. ತಮಿಳು ನಟ ರಾಜೇಂದ್ರನ್ ಇಂದು ತಮಿಳು, ತೆಲುಗು ಮತ್ತು ಮಲಯಾಳಂ ಚಿತ್ರರಂಗಗಳಲ್ಲಿ ಜನಪ್ರಿಯ ಹಾಸ್ಯನಟ. ಕನ್ನಡದಲ್ಲಿ ಎರಡು ಸಿನಿಮಾಗಳಲ್ಲಿ ಮಾತ್ರ ನಟಿಸಿದ್ದರೂ, ಪರಭಾಷೆ ಪ್ರೇಕ್ಷಕರಿಗೆ ಅವರು ತುಂಬಾ ಪರಿಚಿತ.
ಆದರೆ ಈ ಬೋಳುತನ ಅವರ ಸ್ಟೈಲ್ ಅಲ್ಲ… ಅದು ವಿಧಿಯ ಬರೆಹ. ಒಂದು ಕಾಲದಲ್ಲಿ ದಪ್ಪ ಕೂದಲಿನೊಂದಿಗೆ ನಾಯಕನಾಗಿ ಕಾಣಿಸಿಕೊಂಡ ರಾಜೇಂದ್ರನ್, ಒಂದು ಅಪಘಾತದಿಂದ ಸಂಪೂರ್ಣ ಬದಲಾಗಬೇಕಾಯಿತು.
ಸಿನಿಮಾ ಜೀವನವನ್ನು ಅವರು ಸ್ಟಂಟ್ ಮ್ಯಾನ್ ಆಗಿ ಆರಂಭಿಸಿದ್ದರು. ಅನೇಕ ದೊಡ್ಡ ನಟರಿಗೆ ಸ್ಟಂಟ್ ಡಬಲ್ ಆಗಿ ಕೆಲಸ ಮಾಡಿ, 500ಕ್ಕೂ ಹೆಚ್ಚು ಸಿನಿಮಾಗಳಲ್ಲಿ ಫೈಟರ್ ಆಗಿ ಹೆಸರು ಮಾಡಿದ್ದರು. ಹಲವು ಪ್ರಶಸ್ತಿಗಳನ್ನೂ ಪಡೆದಿದ್ದರು.
ಆದರೆ ಮಲಯಾಳಂ ಚಿತ್ರದ ಚಿತ್ರೀಕರಣದ ವೇಳೆ 15 ಅಡಿ ಎತ್ತರದಿಂದ ನೀರಿಗೆ ಜಿಗಿಯಬೇಕಾದ ದೃಶ್ಯ ಅವರ ಜೀವನವನ್ನೇ ತಿರುವು ಮಾಡಿತು. “ನಾನು ಜಿಗಿದ ನೀರು ಕಾರ್ಖಾನೆಗಳಿಂದ ಹರಿದುಬರುವ ರಾಸಾಯನಿಕ ನೀರು ಎಂದು ನಂತರ ತಿಳಿಯಿತು” ಎಂದು ರಾಜೇಂದ್ರನ್ ಹೇಳಿಕೊಂಡಿದ್ದಾರೆ. ಆ ದಿನದಿಂದಲೇ ಕೂದಲು ಉದುರಲು ಆರಂಭವಾಗಿ, ಸ್ವಲ್ಪ ದಿನಗಳಲ್ಲಿ ಸಂಪೂರ್ಣ ಬೋಳಾದರು. ಹುಬ್ಬುಗಳೂ ಮಾಯವಾದವು. ಜೊತೆಗೆ ದೇಹದಲ್ಲಿ ಹಲವು ಆರೋಗ್ಯ ಸಮಸ್ಯೆಗಳು ಉಂಟಾದವು.
ಆದರೂ ಅವರು ಕುಗ್ಗಲಿಲ್ಲ. ಹೋರಾಟ ಮುಂದುವರಿಸಿದರು. ನಟನಾಗಿ ಹೊಸ ರೂಪದಲ್ಲಿ ಪ್ರೇಕ್ಷಕರ ಮುಂದೆ ಬಂದರು. ಖಳನಾಯಕ ಪಾತ್ರಗಳು ಕೈ ತಪ್ಪಿದರೂ, ಹಾಸ್ಯ ಪಾತ್ರಗಳು ಅವರಿಗೆ ಹೊಸ ಜೀವನ ಕೊಟ್ಟವು. ನಿರ್ದೇಶಕರು ವಿಗ್ ಕೂಡ ಹಾಕಿಸದೇ ಅವರ ಸಹಜ ರೂಪದಲ್ಲೇ ನಟಿಸಲು ಅವಕಾಶ ನೀಡಿದರು.
“ನಾನು ಮೈನಸ್ ಎಂದುಕೊಂಡಿದ್ದೇ, ಇಂದು ನನ್ನ ಪ್ಲಸ್ ಆಗಿದೆ” ಎಂದು ರಾಜೇಂದ್ರನ್ ಹೇಳುತ್ತಾರೆ. ಇಂದು ಅವರು ಕೇವಲ ಹಾಸ್ಯನಟ ಅಲ್ಲ — ಲಕ್ಷಾಂತರ ಜನರಿಗೆ ಪ್ರೇರಣೆಯ ಸಂಕೇತ.
