ಮಂಡ್ಯ: ಜಿಲ್ಲೆಯ ಮಂಡ್ಯ ತಾಲ್ಲೂಕಿನ ದ್ಯಾಪಸಂದ್ರ ಗ್ರಾಮದಲ್ಲಿ ಅಪರೂಪದ ಹಾಗೂ ವಿಚಿತ್ರ ಘಟನೆ ನಡೆದಿದೆ. ಹಂದಿ ಮುಖದಂತಿರುವ ಮೇಕೆ ಮರಿ ಜನನವಾಗಿದ್ದು, ಇದನ್ನು ಕಂಡ ರೈತರು ಹಾಗೂ ಗ್ರಾಮಸ್ಥರು ಅಚ್ಚರಿ ಹಾಗೂ ಭಯಕ್ಕೆ ಒಳಗಾಗಿದ್ದಾರೆ.
ಗ್ರಾಮದ ರೈತ ಹುಚ್ಚಪ್ಪ ಅವರಿಗೆ ಸೇರಿದ ಮೇಕೆಯು ಇಂದು ಬೆಳಿಗ್ಗೆ ಈ ವಿಚಿತ್ರ ಮರಿಗೆ ಜನನ ನೀಡಿದೆ. ಮೇಕೆ ಮರಿಯ ಮುಖ ಹಂದಿಯ ಮುಖವನ್ನು ಹೋಲುವ ರೀತಿಯಲ್ಲಿ ಕಂಡುಬಂದಿದ್ದು, ಜನನವಾಗುತ್ತಿದ್ದಂತೆ ಇದನ್ನು ಕಂಡ ರೈತ ಹುಚ್ಚಪ್ಪ ಗಾಬರಿಗೊಂಡಿದ್ದಾರೆ. ಆದರೆ ದುರ್ಬಾಗ್ಯವಶಾತ್, ಜನನವಾದ ಕೆಲವೇ ಹೊತ್ತಿನಲ್ಲಿ ಮೇಕೆ ಮರಿ ಸಾವನ್ನಪ್ಪಿದೆ. ವಿಷಯ ತಿಳಿಯುತ್ತಿದ್ದಂತೆ ರೈತ ಹುಚ್ಚಪ್ಪ ಅವರು ಊರಿನ ಜನರಿಗೆ ಮಾಹಿತಿ ನೀಡಿದ್ದಾರೆ. ಸುದ್ದಿ ಹರಡುತ್ತಿದ್ದಂತೆ ದ್ಯಾಪಸಂದ್ರ ಗ್ರಾಮದ ಜನರು ವಿಚಿತ್ರ ಮೇಕೆ ಮರಿಯನ್ನು ನೋಡಲು ಸ್ಥಳಕ್ಕೆ ಧಾವಿಸಿದ್ದು, ಅಪರೂಪದ ದೃಶ್ಯ ನೋಡಿ ಅಚ್ಚರಿಗೊಂಡಿದ್ದಾರೆ. ಕೆಲವರು ಭಯ ವ್ಯಕ್ತಪಡಿಸಿದರೆ, ಇನ್ನೂ ಕೆಲವರು ಕುತೂಹಲದಿಂದ ಮರಿ ವೀಕ್ಷಿಸಿದರು.
ವಿಚಿತ್ರ ರೂಪದ ಮೇಕೆ ಮರಿ ಜನನವು ಗ್ರಾಮದಲ್ಲಿ ಚರ್ಚೆಗೆ ಕಾರಣವಾಗಿದ್ದು, ಈ ಕುರಿತು ಹಲವು ಊಹಾಪೋಹಗಳು ಹರಡಿವೆ. ನಂತರ ರೈತ ಹುಚ್ಚಪ್ಪ ಅವರು ಸತ್ತಿರುವ ಮೇಕೆ ಮರಿಯನ್ನು ತಮ್ಮ ಜಮೀನಿನಲ್ಲಿ ಮಣ್ಣುಮಾಡಿದ್ದಾರೆ.
