ವಿಜಯಸಾಕ್ಷಿ ಸುದ್ದಿ, ಗದಗ: ಕರ್ನಾಟಕ ರಾಜ್ಯ ವಕ್ಫ್ ಮಂಡಳಿಯ ಚುನಾವಣಾ ಪ್ರಚಾರಾರ್ಥವಾಗಿ ಹುಬ್ಬಳ್ಳಿಯ ಮಾಜಿ ಸಚಿವರಾದ ಎ.ಎಂ. ಹಿಂಡಸಗೇರಿ ಹಾಗೂ ಗದಗಿನ ಮಾಜಿ ಶಾಸಕ ಡಿ.ಆರ್. ಪಾಟೀಲ್ ಅವರ ನೇತೃತ್ವದಲ್ಲಿ ಸಭೆ ಸೇರಿ, ಗದಗ ಜಿಲ್ಲೆಯ ಎಲ್ಲಾ 17 ಜಮಾತಿನ ಮುತ್ವವಲ್ಲಿಗಳ ಸಭೆ ಸೇರಿ ರಾಜ್ಯ ವಕ್ಫ್ ಮಂಡಳಿಯ ಚುನಾವಣೆಗೆ ಸ್ಪರ್ಧಿಸಿದ ಅನ್ವರ್ ಬಾಷಾ ಹಾಗೂ ಸರ್ವರ್ ಬೇಗ್ ಇವರಿಗೆ ಮತ ಚಲಾಯಿಸಬೇಕೆಂದು ಎಲ್ಲಾ ಮತದಾರ ಬಾಂಧವರಲ್ಲಿ ವಿನಂತಿಸಿದರು.

ನ. 19ರಂದು ಬೆಳಗಾವಿಯ ಜಿಲ್ಲಾಧಿಕಾರಿ ಆವರಣದಲ್ಲಿ ಬೆಳಿಗ್ಗೆ 8 ಗಂಟೆಯಿಂದ ಸಂಜೆ 4 ಗಂಟೆವರೆಗೆ ನಡೆಯುವ ಚುನಾವಣೆಗೆ ಎಲ್ಲರೂ ಒಗ್ಗಟ್ಟಿನಿಂದ ಮತ ಚಲಾಯಿಸಬೇಕೆಂದು ವಿನಂತಿ ಮಾಡಿಕೊಂಡರು.

ಅದರಂತೆ ಗದಗ ಜಿಲ್ಲಾ ವಕ್ಫ್ ಅಡೈಜರಿ ಕಮಿಟಿ ಚೇರಮನ್ ಜಿ.ಎಂ. ದಂಡಿನವರು ಸಹ ನಮ್ಮ ಗದಗ ಜಿಲ್ಲೆಯ ಅಭಿವೃದ್ಧಿಗಾಗಿ ಅನ್ವರ್ ಬಾಷಾ ಹಾಗೂ ಸರ್ವರ್ ಬೇಗ್ ಅವರಿಗೆ ಮತ ಚಲಾಯಿಸಿವಂತೆ ಕೇಳಿಕೊಂಡರು. ಡಿ.ಆರ್ ಪಾಟೀಲರು ಸಹ ಎಲ್ಲರೂ ಒಗ್ಗಟ್ಟಾಗಿ ಮತ ಚಲಾಯಿಸಬೇಕೆಂದು ಕೇಳಿಕೊಂಡರು.

ಸಚಿವ ಡಾ. ಹೆಚ್.ಕೆ. ಪಾಟೀಲರ ಆದೇಶದಂತೆ ನಾವೆಲ್ಲರೂ ಒಗ್ಗಟ್ಟಾಗಿ ಮತ ಚಲಾಯಿಸುತ್ತೇವೆಂದು ಎಲ್ಲ ಮುತುವಲ್ಲಿಗಳು ಭರವಸೆ ನೀಡಿದರು. ಕೊನೆಗೆ ಎಂ.ಸಿ. ಶೇಖ ವಂದಿಸಿದರು.

ವಿಜಯಸಾಕ್ಷಿ ಸುದ್ದಿ, ನರೇಗಲ್ಲ: ವೀರಶೈವ ಪರಂಪರೆಯಲ್ಲಿ ಪುರಾಣಗಳಿಗೆ ಮಹತ್ವವಿದೆ. ಈ ಪುರಾಣಗಳು ಮನುಷ್ಯನ ಬದುಕನ್ನು ಹಸನು ಮಾಡುವುದರ ಜೊತೆಗೆ ಅಂದಿನ ಕಾಲಘಟ್ಟದ ಸಾಮಾಜಿಕ, ಆರ್ಥಿಕ, ರಾಜಕೀಯ ಸ್ಥಿತಿಗತಿಗಳನ್ನು ತಿಳಿಸುತ್ತವೆ. ಅಷ್ಟು ವರ್ಷಗಳ ಹಿಂದಿನ ದಿನಮಾನಗಳಿಗೆ ನಮ್ಮನ್ನು ಕೊಂಡೊಯ್ದು ಆ ದಿನಗಳನ್ನು ನಮಗೆ ಪರಿಚಯಿಸುತ್ತವೆ ಎಂದು ಹಿರೇಮಠದ ಶ್ರೀ ಮಲ್ಲಿಕಾರ್ಜುನ ಶಿವಾಚಾರ್ಯರು ಹೇಳಿದರು.

ಪಟ್ಟಣದ ಹಿರೇಮಠ ಜಾತ್ರಾಮಹೋತ್ಸವದ ಎರಡನೇ ದಿನದ ಕಾರ್ಯಕ್ರಮದಲ್ಲಿ ಅವರು ಆಶೀರ್ವಚನ ನೀಡಿದರು.

ತೆಲುಗಿನಲ್ಲಿ ಪಾಲ್ಕುರಿಕೆ ಸೋಮನಾಥ ಬರೆದ ಬಸವ ಪುರಾಣ ವೀರಶೈವ ಪರಂಪರೆಯ ಮೊದಲ ಪುರಾಣವಾಗಿದ್ದು, ಕನ್ನಡದಲ್ಲಿ ವೀರಶೈವ ಪರಂಪರೆಯ ಪುರಾಣವನ್ನು ಬರೆದವರು ಭೀಮ ಕವಿ. ಅವರು ಬರೆದ ಬಸವ ಪುರಾಣವೇ ಕನ್ನಡದ ಮೊದಲ ಪುರಾಣವಾಗಿದೆ. ಪುರಾಣವನ್ನು ಆಲಿಸುವ ಮೂಲಕ ಇಂದಿನ ನಮ್ಮ ಜೀವನ ಶೈಲಿಯನ್ನು ತಿದ್ದಿಕೊಳ್ಳಲು ಅನುಕೂಲವಾಗುತ್ತದೆ. ಅಂದಿನವರ ಚರಿತ್ರೆ ನಮಗೆ ಇಂದಿಗೂ ಮಾರ್ಗದರ್ಶಕ ಎಂದರು.

ನಾವೀಗ ನಿತ್ಯವೂ ಕೇಳುತ್ತಿರುವ ಹಾನಗಲ್ಲ ಶ್ರೀ ಕುಮಾರೇಶ್ವರ ಪುರಾಣದಲ್ಲಿ ಬರುವ ಶ್ರೀ ಕುಮಾರೇಶ್ವರರು ಸಿದ್ಧಾಂತ ಶಿಖಾಮಣಿಯಲ್ಲಿನ ಅನೇಕ ಸಂಗತಿಗಳಿಗೆ ಪೂರಕವಾಗಿ ತಮ್ಮ ಜೀವನವನ್ನು ಸಾಗಿಸಿದರು. ಅದಕ್ಕಾಗಿ ಎಲ್ಲರೂ ಯೋಗ ಜೀವನದ ಬಗ್ಗೆ ಸಾರುವ ಸಿದ್ಧಾಂತ ಶಿಖಾಮಣಿ ಗ್ರಂಥದ ಅಧ್ಯಯನವನ್ನು ಮಾಡಬೇಕೆಂದು ಶ್ರೀಗಳು ತಿಳಿಸಿದರು.

ಕುಮಾರೇಶ್ವರರ ಪುರಾಣ ಪ್ರಾರಂಭಿಸಿದ ಪಂ. ಅನ್ನದಾನ ಶಾಸ್ತಿçಗಳು ಮಾತನಾಡಿ, ಮನಸ್ಸಿಗೆ ಆಗಿರುವ ನೋವುಗಳನ್ನು ಮಠಗಳು ಶಮನ ಮಾಡುತ್ತವೆ. ಹಾನಗಲ್ಲ ಗುರು ಕುಮಾರೇಶ್ವರರು ಮಠಗಳನ್ನು ಕಟ್ಟದಿದ್ದರೂ, ಮಠಗಳಿಗೆ ಯೋಗ್ಯರಾದ ಪೀಠಾಧೀಶರನ್ನು ತಯಾರು ಮಾಡುವ ಶಿವಯೋಗಮಂದಿರವನ್ನು ನಿರ್ಮಿಸಿ ನಾಡಿನ ಹಿತವನ್ನು ಬಯಸಿದರು. ನಮ್ಮ ಮನದಲ್ಲಿಯೆ ಮಹಾದೇವನಿದ್ದಾನೆ. ಮನಸ್ಸಿನಲ್ಲಿರುವ ವಿಷಯ ಎಂಬ ಧೂಳನ್ನು ಅತ್ತ ಸರಿಸಿದರೆ ಮಹಾದೇವ ನಮ್ಮ ಅಂತರAಗಕ್ಕೆ ನಿಚ್ಚಳವಾಗಿ ಕಾಣುತ್ತಾನೆ. ಶ್ರೀ ಕುಮಾರೇಶ್ವರರು ಅಂತಹ ವ್ಯಕ್ತಿತ್ವವನ್ನು ಹೊಂದಿದವರಾಗಿದ್ದು, ಸಮಾಜ ಸೇವೆ ಮತ್ತು ಸಂಘಟನೆಯ ಮೂಲಕವೆ ಈ ಸಮಾಜಕ್ಕೆ ಬೆಳಕಾದರು ಎಂದರು. ಈಶ್ವರ ಬೆಟಗೇರಿ ನಿರ್ವಹಿಸಿದರು.

ವಿಜಯಸಾಕ್ಷಿ ಸುದ್ದಿ, ಗದಗ: ನಗರದ ಹುಲಕೋಟಿ ಸಹಕಾರಿ ಶಿಕ್ಷಣ ಸಂಸ್ಥೆಯ ಮಾಧ್ಯಮಿಕ ಶಾಲೆಯ ೧೯೯೬-೯೭ನೇ ಸಾಲಿನ ಎಸ್‌ಎಸ್‌ಎಲ್‌ಸಿ ವಿದ್ಯಾರ್ಥಿಗಳ ಸ್ನೇಹ ಸಮ್ಮಿಲನ ಹಾಗೂ ಗುರುವಂದನಾ ಕಾರ್ಯಕ್ರಮ ಸಡಗರ ಸಂಭ್ರಮದಿಂದ ಜರುಗಿತು.

ಮುಖ್ಯ ಅತಿಥಿಗಳಾಗಿ ಗುರುಗಳಾದ ವಿ.ವಿ. ಮರಡ್ಡಿಯವರು ಪಾಲ್ಗೊಂಡು ಮಾತನಾಡಿ, ತಾವು ಎಲ್ಲರೂ 27 ವರ್ಷದ ನಂತರ ಕೂಡಿ ಗುರುವಂದನಾ ಕಾರ್ಯಕ್ರಮ ಮಾಡುತ್ತಿರುವುದು ಸಂತಸದ ವಿಚಾರ. ತಮ್ಮಲ್ಲೆರ ಬಾಳು ಬೆಳಗಲಿ ಎಂದು ಹಾರೈಸಿದರು.

ಗುರುಗಳಾದ ಜಿ.ಪಿ. ದೇಶಪಾಂಡೆ ಮಾತನಾಡಿ, ನೀವು ಮಾಡುತ್ತಿರುವ ಗುರುವಂದನಾ ಕಾರ್ಯಕ್ರಮಕ್ಕೆ ಸಾರ್ಥಕತೆ ಬರಬೇಕಾದರೆ ಸಂಸ್ಥೆಯ ಸಂಸ್ಥಾಪಕರನ್ನು ಹಾಗೂ ಗುರುಗಳನ್ನು ಸ್ಮರಿಸುವುದು ಸೂಕ್ತ. ನೀವು ನನಗೆ ಮಾಡಿದ ಸನ್ಮಾನವನ್ನು ನನಗೆ ಕಲಿಸಿದ ಗುರುವಿಗೆ ಅರ್ಪಿಸುತ್ತೇನೆೆ ಎಂದರು.

ಪಾಪಳೆ ಗುರುಗಳು ಮಾತನಾಡಿ, 27 ವರ್ಷಗಳ ನಂತರ ನಮ್ಮನ್ನೆಲ್ಲಾ ನೆನಪು ಮಾಡಿಕೊಂಡು ಗುರು ನಮನ ಸಲ್ಲಿಸುತ್ತಿರುವುದು ಗುರು-ಶಿಷ್ಯರ ಪರಂಪರೆಯಾಗಿದೆ. ತಾವೆಲ್ಲರೂ ಜವಾಬ್ದಾರಿಯುತ ಸ್ಥಾನದಲ್ಲಿರುವುದು ಸಂತಸದ ವಿಚಾರ ಎಂದರು.

ಗುರುಮಾತೆಯರಾದ ಅಸುಂಡಿ ಹಾಗೂ ಅಳಗುಂಡಿ ಮಾತನಾಡಿದರು. ಈ ಸಂದರ್ಭದಲ್ಲಿ ಗುರುಗಳಾದ ಆರ್.ಎಸ್. ಬಂಡಿ, ರಾಂಪೂರ, ಡಿ ದರ್ಜೆ ನೌಕರರಾದ ರಾಮಣ್ಣ ಚೌಡಕಿ, ದಾಸರ ಉಪಸ್ಥಿತರಿದ್ದರು.

ವಿಜಯಸಾಕ್ಷಿ ಸುದ್ದಿ, ಲಕ್ಮೇಶ್ವರ: ವಿಶಿಷ್ಟ ಪ್ರಾಚೀನ ಶಿಲ್ಪಕಲೆ, ಪರಂಪರೆ, ಧಾರ್ಮಿಕ, ಸಾಂಸ್ಕೃತಿಕ ವೈಭವಗಳ ಇತಿಹಾಸ ಹೊಂದಿರುವ ಪುಲಿಗೆರೆ ಶ್ರೀ ಸೋಮೇಶ್ವರ ದೇವಸ್ಥಾನದ ಅಭಿವೃದ್ಧಿಗೆ ಅನುದಾನ ಕಲ್ಪಿಸುವ ಪ್ರಾಮಾಣಿಕ ಪ್ರಯತ್ನ ಮಾಡುತ್ತೇನೆ ಎಂದು ಪ್ರವಾಸೋದ್ಯಮ ಇಲಾಖೆ ಸಚಿವ ಹೆಚ್.ಕೆ. ಪಾಟೀಲ ಹೇಳಿದರು.

ಅವರು ಸೋಮವಾರ ಪಟ್ಟಣದ ಶ್ರೀ ಸೋಮೇಶ್ವರ ದೇವಸ್ಥಾನದಲ್ಲಿ ಹಮ್ಮಿಕೊಳ್ಳಲಾಗಿದ್ದ ಲಕ್ಷ ದೀಪೋತ್ಸವ ಸಮಾರಂಭದ ನಿಮಿತ್ತ ದೇವಸ್ಥಾನಕ್ಕೆ ಭೇಟಿ ನೀಡಿದ ಸಂದರ್ಭದಲ್ಲಿ ಮಾತನಾಡುತ್ತಿದ್ದರು.

ದೇವಸ್ಥಾನಗಳು ನಮ್ಮ ನಾಡಿನ ಸಂಸ್ಕೃತಿ, ಶ್ರೀಮಂತ ಪರಂಪರೆಯ ಪ್ರತೀಕವಾಗಿವೆ. ಸೋಮೇಶ್ವರ ದೇವಸ್ಥಾನದ ಮೂಲಭೂತ ಸೌಲಭ್ಯ ಕಲ್ಪಿಸುವ ಬಗ್ಗೆ ಈಗಾಗಲೇ ಒಂದಷ್ಟು ಅನುದಾನ ಕಲ್ಪಿಸಲಾಗಿದೆ. ಮುಖ್ಯವಾಗಿ ಉತ್ತರ ದ್ವಾರ ಅಭಿವೃದ್ಧಿಗಾಗಿ ಕ್ರಿಯಾಯೋಜನೆ ಸಿದ್ಧಪಡಿಸಿ ಅನುದಾನ ಮಂಜೂರಾತಿಗೆ ಪ್ರಸ್ತಾವನೆ ಸಲ್ಲಿಸಲು ಇಲಾಖೆಯ ಅಧಿಕಾರಿಗಳಿಗೆ ಸೂಚಿಸಲಾಗಿದೆ. ಆದಷ್ಟು ಬೇಗ ದೇವಸ್ಥಾನದ ಅಭಿವೃದ್ಧಿ ಕಾರ್ಯಗಳು ನಡೆಯಲಿವೆ ಎಂದರು.

ರಾಜ್ಯದಲ್ಲಿ ನಮ್ಮ ನಾಡಿನ ಇತಿಹಾಸ, ಪರಂಪರೆ ಬಿಂಬಿಸುವ ೨೫ ಸಾವಿರಕ್ಕೂ ಹೆಚ್ಚು ಪುರಾತನ ದೇವಸ್ಥಾನ, ಶಿಲಾಶಾಸನಗಳು ಪ್ರಾಚ್ಯವಸ್ತು ಇಲಾಖೆ ವ್ಯಾಪ್ತಿಯಿಂದ ಹೊರಗುಳಿದಿವೆ. ಕೇವಲ ೮೫೧ ಸಂರಕ್ಷಿತ ತಾಣವೆಂದು ಗುರುತಿಸಲಾಗಿದೆ. ಕಾಂಗ್ರೆಸ್ ಸರ್ಕಾರ ಈ ನಿಟ್ಟಿನಲ್ಲಿ ಇಚ್ಛಾಶಕ್ತಿ ತೋರಿದ್ದು, ಇದೇ ವರ್ಷ ೨೫೦ ಪ್ರಾಚೀನ ದೇವಸ್ಥಾನಗಳನ್ನು ಪ್ರಾಚ್ಯವಸ್ತು ಇಲಾಖೆಗೊಳಿಸಲಾಗುವುದು ಎಂದರು.

ಸೋಮೇಶ್ವರ ದೇವಸ್ಥಾನ ದರ್ಶನ ಪಡೆದು ದೇವಸ್ಥಾನ ವೀಕ್ಷಿಸಿ ಮಾಹಿತಿ ಪಡೆದ ಸಚಿವರನ್ನು ದೇವಸ್ಥಾನ ಭಕ್ತರ ಕಮಿಟಿ ಮತ್ತು ಹಿರಿಯರು ಸನ್ಮಾನಿಸಿದರು. ಈ ವೇಳೆ ಚಂಬಣ್ಣ ಬಾಳಿಕಾಯಿ, ವಿ.ಎಲ್. ಪೂಜಾರ, ಚನ್ನಪ್ಪ ಜಗಲಿ, ಸುಜಾತಾ ದೊಡ್ಡಮನಿ, ಬಸವೇಶ ಮಹಾಂತಶೆಟ್ಟರ, ಗುರಣ್ಣ ಪಾಟೀಲ ಕುಲಕರ್ಣಿ, ಆನಂದ ಮೆಕ್ಕಿ, ಅಶೋಕ ಬಟಗುರ್ಕಿ, ಪೂರ್ಣಾಜಿ ಖರಾಟೆ, ಶಂಕರ ಬಾಳಿಕಾಯಿ, ಶಿವಯೋಗಿ ಅಂಕಲಕೋಟಿ, ಸುಭಾ ಸಓದುನವರ, ಸೋಮೇಶ ಉಪನಾಳ, ಫಕ್ಕೀರೇಶ ಮ್ಯಾಟಣ್ಣವರ, ವಿರೂಪಾಕ್ಷ ಆದಿ, ಸುರೇಶ ರಾಚನಾಯ್ಕರ, ಫಕ್ಕಿರೇಶ ನಂದೆಣ್ಣವರ, ಬಸವರಾಜ ಮೆಣಸಿನಕಾಯಿ ಪ್ರಾಚ್ಯವಸ್ತು ಇಲಾಖೆಯ ಸಹಾಯಕ ನಿರ್ದೇಶಕ ಕೊಟ್ರೇಶ ವಿಭೂತಿ, ಲಕ್ಕುಂಡಿ ಪ್ರಾಧಿಕಾರದ ಆಯುಕ್ತ ಶರಣು ಗೋಗೇರಿ, ತಹಸೀಲ್ದಾರ ವಾಸುದೇವ ಸ್ವಾಮಿ, ಮುಖ್ಯಾಧಿಕಾರಿ ಮಹೇಶ ಹಡಪದ ಸೇರಿ ಅನೇಕರಿದ್ದರು.