ರೈತನ ಬೆನ್ನೆಲುಬು ಎತ್ತುಗಳಿಗೆ ಬೆಂಕಿಯಿಟ್ಟ ದುರುಳರು!

ವಿಜಯನಗರ: ರೈತನ ಬೆನ್ನೆಲುಬು ಎತ್ತುಗಳಿಗೆ ದುರುಳರು ಬೆಂಕಿಯಿಟ್ಟ ಘಟನೆ ವಿಜಯನಗರ ಜಿಲ್ಲೆಯ ಹರಪನಹಳ್ಳಿ ತಾಲೂಕಿನ ತೊಗರಿಕಟ್ಟೆ ಗ್ರಾಮದಲ್ಲಿ ನಡೆದಿದೆ.

ಹೊಲದಲ್ಲಿ ಕಟ್ಟಿಹಾಕಿದ್ದಾಗ ದುಷ್ಕರ್ಮಿಗಳು ಪೆಟ್ರೋಲ್ ಸುರಿದು ಎತ್ತುಗಳಿಗೆ ಬೆಂಕಿ ಹಚ್ಚಿದ್ದಾರೆ. ಎತ್ತುಗಳ ದೇಹಕ್ಕೆ ಬೆಂಕಿ ಹಚ್ಚಿದ್ರಿಂದ ಮಲಗಲು ಆಗದೇ ನರಳುತ್ತಿವೆ.

ರೈತ ಹನುಮಂತಪ್ಪ ಬಣಕಾರ್ ಎಂಬುವವರಿಗೆ ಸೇರಿದ ಜೋಡೆತ್ತುಗಳು ಇವಾಗಿದ್ದು, ಬಿತ್ತನೆ ಕಾರ್ಯ ಮುಗಿದಿದೆ, ಪೈರುಗಳು ಎಡೆ ಕುಂಟೆ ಹೊಡೆಯಲು ಬಂದಿವೆ. ಇಂತಹ ಸಮಯದಲ್ಲಿ ಬೆಂಕಿ ಹಚ್ಚಿದ್ರಿಂದ ಎತ್ತುಗಳು ಹಿಂಸೆ ಪಡುತ್ತಿವೆ.

ಬಾಯಿ ಇಲ್ಲದ ಬಸವಣ್ಣನಿಗೆ ನೋವು ಕೊಟ್ಟವರಿಗೆ ದೇವರು ಶಿಕ್ಷೆ ಕೊಡಬೇಕು, ಎತ್ತುಗಳಿಗೆ ಕೊಟ್ಟ ಹಿಂಸೆ ನೋಡಿ ಊಟ ನೀರು ಸೇರುತ್ತಿಲ್ಲ ಎಂದು ಕೃತ್ಯ ಎಸಗಿದವರನ್ನ ಪತ್ತೆ ಶಿಕ್ಷೆಗೆ ರೈತ ಹನುಮಂತಪ್ಪ ಬಣಕಾರ್ ಆಗ್ರಹಿಸಿದ್ದಾರೆ. ಹರಪನಹಳ್ಳಿ ಠಾಣಾ ವ್ಯಾಪ್ತಿಯಲ್ಲಿ ಈ ಘಟನೆ ನಡೆದಿದೆ.