ವಿಜಯಸಾಕ್ಷಿ ಸುದ್ದಿ, ಗದಗ
Advertisement
ಯಾವುದೇ ಸೂಕ್ತ ದಾಖಲೆಗಳಿಲ್ಲದೇ ವಾಹನವೊಂದರಲ್ಲಿ ಸಾಗಿಸುತ್ತಿದ್ದ 100 ಗ್ಯಾಸ್‌ ಸ್ಟವ್‌ಗಳನ್ನು ಚೆಕ್‌ಪೋಸ್ಟ್‌ ಸಿಬ್ಬಂದಿಗಳು ಸೋಮವಾರ ವಶಪಡಿಸಿಕೊಂಡಿದ್ದಾರೆ.
ಆರೋಪಿತರಾದ ಉತ್ತರಪ್ರದೇಶ ಮೂಲದ, ಹಾಲಿ ಗದುಗಿನ ಮಹೇಂದ್ರಕರ್‌ ಸರ್ಕಲ್‌ ಬಳಿ ವಾಸವಿರುವ ಖುರ್ಶಿದ್‌ ಶರೀಫ್‌ ಶಹಪೂರ ಹಾಗೂ ಹುಬ್ಬಳ್ಳಿ ನಿವಾಸಿ ಬಾಬಜಾನ್‌ ಮಹ್ಮದಗೌಸ್‌ ಮಿಶ್ರಿಕೋಟಿ ಇವರಿಬ್ಬರೂ ಹುಬ್ಬಳ್ಳಿ ಕಡೆಯಿಂದ ಗದಗ ಕಡೆಗೆ ತಮ್ಮ ಅಶೋಕ ಲೈಲ್ಯಾಂಡ್‌ ದೋಸ್ತ್‌ ವಾಹನದಲ್ಲಿ ಬರುತ್ತಿರುವಾಗ ಹುಲಕೋಟಿಯ ದುಂದೂರು ಕ್ರಾಸ್‌ ಚೆಕ್‌ಪೋಸ್ಟ್‌ನಲ್ಲಿ ವಾಹನ ನಿಲ್ಲಿಸಿ ಪರಿಶೀಲಿಸಿದಾಗ, 1,20,000 ಬೆಲೆಬಾಳುವ 100 ಗ್ಯಾಸ್‌ ಸ್ಟವ್‌ಗಳು ಸಿಕ್ಕಿವೆ.
ಈ ಕುರಿತು ದಾಖಲಾತಿಗಳ ಬಗ್ಗೆ ಕೇಳಿದಾಗ ಆರೋಪಿತರು ಸಮರ್ಪಕ ಉತ್ತರ ನೀಡದೇ, ಸೂಕ್ತ ದಾಖಲೆಗಳನ್ನೂ ಒದಗಿಸದೇ ಇರುವುದರಿಂದ ಸದರಿ ವಾಹನದೊಂದಿಗೆ ಗ್ಯಾಸ್‌ ಸ್ಟವ್‌ಗಳನ್ನು ವಶಪಡಿಸಿಕೊಂಡು, ಕೆ.ಪಿ. ಕಾಯ್ದೆ 98ರ ಪ್ರಕಾರ ಗದಗ ಗ್ರಾಮೀಣ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಿಸಿಕೊಳ್ಳಲಾಗಿದೆ.