2016ರಲ್ಲಿ ನಡೆದಿದ್ದ ಪ್ರಕರಣ
ವಿಜಯಸಾಕ್ಷಿ ಸುದ್ದಿ, ಗದಗ
ವೈಯಕ್ತಿಕ ಸಿಟ್ಟಿನಿಂದ ವ್ಯಕ್ತಿಯೊಬ್ಬರ ಮೇಲೆ ಟ್ರಾಕ್ಟರ್ ಹಾಯಿಸಿ ಕೊಲೆ ಮಾಡಲು ಯತ್ನಿಸಿದ್ದ ಆರೋಪಿಗಳಿಗೆ ನ್ಯಾಯಾಲಯವು ಶಿಕ್ಷೆ ಜಾರಿಗೊಳಿಸಿದೆ.
ಪ್ರಕರಣದ ಆರೋಪಿತರಾದ ಕೊಟ್ರಯ್ಯ ಶಿವಯ್ಯ ಹೇಮಗಿರಿಮಠ & ಇನ್ನೊಬ್ಬ ಶಿರಹಟ್ಟಿ ಪೋಲೀಸ್ ಠಾಣಾ ಹದ್ದಿ ಪೈಕಿ, ಹೊಳೆಇಟಗಿ ಗ್ರಾಮದಲ್ಲಿ ದಿ.25-5-2016ರಂದು ಮುಂಜಾನೆ 7 ಗಂಟೆಯ ಸುಮಾರಿಗೆ ಇದರಲ್ಲಿಯ ಪಿರ‍್ಯಾದಿ ಹೊಲದಿಂದ ಮನೆಗೆ ತೆಂಗಿನಕಾಯಿ ತೆಗೆದುಕೊಂಡು ಬರುತ್ತಿದ್ದಾಗ ತನ್ನ ಹಿಸ್ಸೆಗೆ ಬಂದ ಹಿತ್ತಲದಲ್ಲಿ ಆರೋಪಿ ಕೊಟ್ರಯ್ಯ ಮತ್ತು 2ನೆಯವರು ಕಟ್ಟಿಗೆ ಒಡೆಯುತ್ತಿದ್ದಾಗ,
ಪಿರ‍್ಯಾದಿಯು ನಮ್ಮ ಹಿತ್ತಿಲಿನಿಂದ ಏಕೆ ಹಾದು ಹೋದಿರಿ ಎಂದು ಕೇಳಿದಾಗ ಸಿಟ್ಟಿನಿಂದ ಹಾಗೂ ಆಸ್ತಿ ಹಂಚಿಕೆಯ ವಿಷಯವಾಗಿ ನ್ಯಾಯಾಲಯದ ಡಿಕ್ರಿ ಆದೇಶವಾಗಿದ್ದರ ಸಿಟ್ಟಿನಿಂದ ಪರ‍್ಯಾದಿಗೆ ಕೊಲೆ ಮಾಡಿದರೆ ಆಸ್ತಿ ನಮಗೆ ಸಿಗುತ್ತದೆ ಎಂಬ ದುರುದ್ದೇಶದಿಂದ ಪರ‍್ಯಾದಿಗೆ ಅವಾಚ್ಯವಾಗಿ ಬೈದಿದ್ದಲ್ಲದೇ ಆರೋಪಿ ಕೊಟ್ರಯ್ಯ ಪಿರ‍್ಯಾದಿಯ ಮೇಲೆ ಟ್ರಾಕ್ಟರ್ ಇಂಜಿನನ್ನು ಹಾಯಿಸಿ,
ಪಿರ‍್ಯಾದಿಯ ಎದೆಗೆ ಮಾರಣಾಂತಿಕ ಒಳಪೆಟ್ಟು ಪಡಿಸಿದ್ದಲ್ಲದೇ ಎಡಗಾಲಿಗೆ ಗಾಯಪಡಿಸಿ ಕೊಲೆ ಮಾಡಲು ಪ್ರಯತ್ನ ಮಾಡಿದ ಅಪರಾಧ ಕುರಿತು ಆರೋಪಿತರ ವಿರುದ್ಧ ಶಿರಹಟ್ಟಿ ಪೊಲೀಸ್ ಠಾಣೆಯ ಆರಕ್ಷಕ ಉಪ ನಿರೀಕ್ಷಕ ಗುರುಶಾಂತ ದಾಶ್ಯಾಳ, ಇವರು ತನಿಖೆಯನ್ನು ಪೂರೈಸಿ ದೋಷಾರೋಪಣ ಪಟ್ಟಿಯನ್ನು ನ್ಯಾಯಾಲಯಕ್ಕೆ ಸಲ್ಲಿಸಿದ್ದರು.
ಸಾಕ್ಷಿ ವಿಚಾರಣೆ ನಡೆಸಿದ ಗದಗಿನ ಪ್ರಧಾನ ಜಿಲ್ಲಾ ಮತ್ತು ಸತ್ರ ನ್ಯಾಯಾಧೀಶರಾದ ಬಸವರಾಜ ಇವರು ಸದರ ಪ್ರಕರಣದಲ್ಲಿ ಆರೋಪ ರುಜುವಾತಾಗಿದ್ದರಿಂದ ಆರೋಪಿತರಾದ ಕೊಟ್ರಯ್ಯ ಶಿವಯ್ಯ ಹೇಮಗಿರಿಮಠ & ಇನ್ನೊಬ್ಬ ಇವರಿಗೆ ಜ.4, 2023ರಂದು ಕಲಂ:307 ಭಾದಂಸಂ ರಡಿ 10 ವರ್ಷ ಸಾದಾ ಕಾರವಾಸ ಶಿಕ್ಷೆ ಹಾಗೂ ತಲಾ ರೂ.12ಸಾವಿರ ರೂಪಾಯಿ ದಂಡ ವಿಧಿಸಿ ತೀರ್ಪು ನೀಡಿದ್ದಾರೆ.
ಸದರಿ ಪ್ರಕರಣದಲ್ಲಿ ಸರ್ಕಾರದ ಪರವಾಗಿ ಸವಿತಾ.ಎಂ. ಶಿಗ್ಲಿ ಸರಕಾರಿ ಅಭಿಯೋಜಕರು, ಗದಗ ಇವರು ವಾದವನ್ನು ಮಂಡಿಸಿದ್ದರು.