ಗಾಂಜಾ ಸಮೇತ ಆರೋಪಿಗಳ ಬಂಧನ
ವಿಜಯಸಾಕ್ಷಿ ಸುದ್ದಿ, ಬೆಟಗೇರಿ
ಗಾಂಜಾ ಮಾರಾಟದಲ್ಲಿ ತೊಡಗಿದ್ದ ಇಬ್ಬರು ಯುವಕರನ್ನು ಬೆಟಗೇರಿ ಪೊಲೀಸರು ಗಾಂಜಾ ಸಮೇತ ಬಂಧಿಸಿದ್ದಾರೆ.
ಬೆಟಗೇರಿ ಕುರಹಟ್ಟಿಪೇಟೆಯಲ್ಲಿರುವ ಸಾರ್ವಜನಿಕ ಶೌಚಾಲಯದ ಹಿಂಭಾಗದಲ್ಲಿ ಗಾಂಜಾ ಮಾರಾಟದಲ್ಲಿ ತೊಡಗಿದ್ದಾರೆ ಎಂಬ ಖಚಿತ ಮಾಹಿತಿಯನ್ನಾಧರಿಸಿ, ಹಿರಿಯ ಪೊಲೀಸ್ ಅಧಿಕಾರಿಗಳ ಮಾರ್ಗದರ್ಶನದಲ್ಲಿ ಕಾರ್ಯಾಚರಣೆಗಿಳಿದ ಬೆಟಗೇರಿ ಪೊಲೀಸ್ ಠಾಣೆಯ ಪಿಎಸ್ಐ ವಿಠ್ಠಲ್ ಎಲ್. ಹಾವನ್ನವರ ಹಾಗೂ ಸಿಬ್ಬಂದಿ, ದಾಳಿ ಮಾಡಿ ಇಬ್ಬರನ್ನು ಬಂಧಿಸಿದ್ದಾರೆ.
ಬಂಧಿತರನ್ನು ಬೆಟಗೇರಿ ಸೆಟ್ಲಿಮೆಂಟ್ನ ಡೋಮಿನಿಕ್ ಥಾಮಸ್ ಮಾಣಿಕ್ಯಂ(23) ಹಾಗೂ ಮಹ್ಮದ ಅಲಿ ಚಾಂದಸಾಬ್ ಅಂಗಡಿಗೇರಿ(22) ಎಂದು ಗುರುತಿಸಲಾಗಿದೆ.
ಈ ಇಬ್ಬರು ಆರೋಪಿಗಳು ಎಲ್ಲಿಂದಲೋ ಗಾಂಜಾ ತಂದು ಸಂಗ್ರಹಿಸಿ, 1215 ಗ್ರಾಂ. ತೂಕದ ಅಂದಾಜು 1,21,500 ರೂ. ಬೆಲೆಯ ಗಾಂಜಾವನ್ನು ಸಾರ್ವಜನಿಕರಿಗೆ ಮಾರಾಟ ಮಾಡಲು ಯತ್ನಿಸುತ್ತಿರುವಾಗ ವಶಕ್ಕೆ ಪಡೆಯಲಾಗಿದೆ.
20(ಬಿ)(2), ಎನ್ಡಿಪಿಎಸ್ ಕಾಯ್ದೆ-1989ರ ಪ್ರಕಾರ 0022/23 ಪ್ರಕರಣ ದಾಖಲಿಸಿಕೊಂಡಿರುವ ಬೆಟಗೇರಿ ಪೊಲೀಸರು ತನಿಖೆ ಕೈಗೊಂಡಿದ್ದಾರೆ.