ದೊಡ್ಡ ಮೆಣಸಿನಕಾಯಿ ಅಥವಾ ದಪ್ಪ ಮೆಣಸಿನಕಾಯಿ ಅಂದ ಕೂಡಲೆ ಅನೇಕರ ಬಾಯಲ್ಲಿ ನೀರೂರಲು ಪ್ರಾರಂಭಿಸುತ್ತದೆ. ಥಟ್ಟನೆ ಅವರಿಗೆ ನೆನಪಾಗುವುದು ದೊಡ್ಡ ಮೆಣಸಿನಕಾಯಿಯಿಂದ ತಯಾರಿಸಿದ ಬೊಂಡಾ ಅಥವಾ ಕ್ಯಾಪ್ಸಿಕಂ ಮಸಾಲಾ ಅಥವಾ ಕ್ಯಾಪ್ಸಿಕಂ ಬಾತ್ ಆದರೂ ಆಗಬಹುದು.
ಇದರ ಹೊರತಾಗಿಯೂ ಮಾರುಕಟ್ಟೆಯಲ್ಲಿ ಹೇರಳವಾಗಿ ದೊರೆಯುವ ದೊಡ್ಡ ಮೆಣಸಿನಕಾಯಿಯ ಅನೇಕ ಆರೋಗ್ಯಕರ ಮಹತ್ವವೂ ಇದೆ. ದೊಡ್ಡ ಮೆಣಸಿನಕಾಯಿಗಳು ಆಂಟಿಆಕ್ಸಿಡೆಂಟ್ಗಳನ್ನು ಹೇರಳವಾಗಿ ಹೊಂದಿದ್ದು, ಇವುಗಳು ಕ್ಯಾನ್ಸರ್ ರೋಗವನ್ನು ನಿವಾರಿಸುವ ಪಥ್ಯದ ವಸ್ತುವಾಗಿ ಕೆಲಸ ಮಾಡುತ್ತದೆ.
ದಪ್ಪ ಮೆಣಸಿನಕಾಯಿಯಲ್ಲಿ ಸಿಗುವ ಆರೋಗ್ಯ ಪ್ರಯೋಜನಗಳು ಒಂದೆರಡಲ್ಲ. ಅದನ್ನು ನೋವು ಹೇಳುವ ಬದಲು ನೀವೇ ಈ ಲೇಖನವನ್ನು ಓದಿ ತಿಳಿದುಕೊಳ್ಳಬಹುದು.
ಹೃದಯದ ಆರೋಗ್ಯಕ್ಕೆ ತುಂಬಾ ಸಹಕಾರಿ
- ಕ್ಯಾಪ್ಸಿಕಂ ಮತ್ತು ದಪ್ಪಮೆಣಸಿನಕಾಯಿಯಲ್ಲಿ ರಕ್ತನಾಳಗಳನ್ನು ಮತ್ತು ಅಪಧಮನಿಗಳನ್ನು ಕೊಬ್ಬಿನ ಅಂಶ ಅಥವಾ ಕೊಲೆಸ್ಟಾಲ್ ಅಂಶದಿಂದ ಮುಕ್ತಿಗೊಳಿಸುವ ಗುಣ ಲಕ್ಷಣ ಕಂಡುಬರುತ್ತದೆ.
- ಹಾಗಾಗಿ ದೇಹದಲ್ಲಿ ಇದರಿಂದ ರಕ್ತ ಸಂಚಾರ ಸರಾಗವಾಗಿ ನಡೆಯುತ್ತದೆ. ಕೊಲೆಸ್ಟ್ರಾಲ್ ಅಂಶದಿಂದ ಉಂಟಾಗುವ ಹೃದಯಘಾತ ಸಮಸ್ಯೆ ತಪ್ಪುವಂತೆ ಕ್ಯಾಪ್ಸಿಕಂ ನೋಡಿಕೊಳ್ಳುತ್ತದೆ.
- ಅಧಿಕ ರಕ್ತದ ಒತ್ತಡ ಮತ್ತು ಹೃದಯದ ಅಥವಾ ಹೃದಯರಕ್ತನಾಳದ ಸಮಸ್ಯೆಗಳನ್ನು ಹೊಂದಿರುವವರಿಗೆ ಕ್ಯಾಪ್ಸಿಕಂ ಸೇವನೆ ಯಾವುದಾದರೂ ಒಂದು ರೂಪದಲ್ಲಿ ತುಂಬಾ ಒಳ್ಳೆಯದು ಎಂದು ಹೇಳಬಹುದು.
ಕ್ಯಾಲೋರಿ ಹೆಚ್ಚಾಗುತ್ತದೆ ಎನ್ನುವ ಭಯ ಬೇಡ
- ಸಾಧಾರಣವಾಗಿ ನಾವು ಸೇವನೆ ಮಾಡುವ ಬಹುತೇಕ ತರಕಾರಿಗಳು ಕಡಿಮೆ ಕ್ಯಾಲರಿಗಳನ್ನು ಒಳಗೊಂಡಿರುತ್ತವೆ. ಅಂತಹ ತರಕಾರಿಗಳ ಗುಂಪಿಗೆ ಕ್ಯಾಪ್ಸಿಕಂ ಸಹ ಸೇರುತ್ತದೆ.
- ಈಗಾಗಲೇ ದೇಹದ ತೂಕವನ್ನು ಹೆಚ್ಚಾಗಿ ಹೊಂದಿರುವವರು ಮತ್ತು ತಮ್ಮ ಆಕಾರವನ್ನು ಮತ್ತೆ ಮೊದಲಿನಂತೆ ಮಾಡಿಕೊಳ್ಳಬೇಕು ಎನ್ನುವ ಬಯಕೆ ಹೊಂದಿದವರು ಕ್ಯಾಪ್ಸಿಕಂ ಸೇವನೆಯನ್ನು ತಮ್ಮ ದಿನನಿತ್ಯದ ಆಹಾರ ಪದ್ಧತಿಯಲ್ಲಿ ಸೇರಿಸಿಕೊಳ್ಳಬಹುದು.
- ಇದು ಬಹಳ ಬೇಗನೆ ಅತ್ಯಂತ ತ್ವರಿತವಾಗಿ ನಿಮ್ಮ ದೇಹದಲ್ಲಿ ಕೊಬ್ಬಿನ ಅಂಶವನ್ನು ಕರಗಿಸುವ ಜೊತೆಗೆ ಮೆಟಬೋಲಿಸಂ ಪ್ರಕ್ರಿಯೆಯನ್ನು ಹೆಚ್ಚಿಸಿ ನಿಮ್ಮ ದೇಹದಿಂದ ವಿಷಕಾರಿ ತ್ಯಾಜ್ಯಗಳನ್ನು ಹೊರಹಾಕುವಲ್ಲಿ ಅನುಕೂಲ ಮಾಡಿಕೊಡುತ್ತದೆ.
ಆರ್ಥ್ರೈಟಿಸ್ ಸಮಸ್ಯೆಗೆ ರಾಮಬಾಣ
- ಈಗಾಗಲೇ ಕೀಲುನೋವು ಮತ್ತು ಮಂಡಿ ನೋವಿನ ಜೊತೆಗೆ ಆರ್ಥ್ರೈಟಿಸ್ ಸಮಸ್ಯೆಯನ್ನು ದೀರ್ಘಕಾಲದಿಂದ ಹೊಂದಿರುವ ಜನರು ಇದರಿಂದ ಮುಕ್ತಿ ಪಡೆಯಲು ಕ್ಯಾಪ್ಸಿಕಂ ಸೇವನೆಯನ್ನು ಅನುಸರಿಸಬಹುದು ಎಂದು ದೈಹಿಕ ಸ್ವಾಸ್ಥ್ಯ ತಜ್ಞರು ಹೇಳುತ್ತಾರೆ.
- ಸಿಂಚೋನ ಎನ್ನುವ ಇನ್ನೊಂದು ಗಿಡಮೂಲಿಕೆಯ ಜೊತೆ ಕ್ಯಾಪ್ಸಿಕಂ ಸೇವನೆ ಮಾಡುವುದರಿಂದ ಅತಿ ಹೆಚ್ಚಿನ ನೋವಿನ ಪ್ರಮಾಣದಿಂದ ದೂರಾಗಲು ಸಹಾಯವಾಗುತ್ತದೆ. ದಪ್ಪ ಮೆಣಸಿನಕಾಯಿಯಲ್ಲಿ ನೋವು ನಿವಾರಕ ಗುಣಲಕ್ಷಣಗಳು ಸಾಕಷ್ಟು ಇರುವುದರಿಂದ ಈ ರೀತಿಯ ಅನುಕೂಲ ನಿಮಗೆ ಸಿಗುತ್ತದೆ.
ವಿಟಮಿನ್ ಸಿ ಅಂಶ ಸಿಗುತ್ತದೆ
- ದಪ್ಪಮೆಣಸಿನಕಾಯಿ ಯಲ್ಲಿ ಆಂಟಿಆಕ್ಸಿಡೆಂಟ್ ಅಂಶಗಳು ಸಾಕಷ್ಟು ಕಂಡುಬರುತ್ತದೆ ಮತ್ತು ವಿಟಮಿನ್ ಸಿ ಅಂಶದ ಪ್ರಮಾಣ ಹೆಚ್ಚು ಸಿಗುತ್ತದೆ ಎಂಬುದನ್ನು ಮುಖ್ಯವಾಗಿ ಗಮನಿಸಬೇಕು.
- ಆಂತರಿಕವಾಗಿ ಇದು ನಿಮ್ಮ ದೇಹದ ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸುವ ಜೊತೆಗೆ ನಿಮ್ಮ ರಕ್ತನಾಳದ, ಚರ್ಮದ, ದೇಹದ ಇನ್ನಿತರ ಅಂಗಾಂಗಗಳ ಜೊತೆಗೆ ನಿಮ್ಮ ಮೂಳೆಗಳ ಆರೋಗ್ಯವನ್ನು ಅತ್ಯುತ್ತಮವಾಗಿ ರಕ್ಷಣೆ ಮಾಡುತ್ತದೆ.
- ಕ್ಯಾಪ್ಸಿಕಂನಲ್ಲಿ ಕಂಡುಬರುವ ಆಂಟಿಆಕ್ಸಿಡೆಂಟ್ ಅಂಶಗಳು ನಿಮ್ಮ ದೇಹದ ಫ್ರೀ ರಾಡಿಕಲ್ ಅಂಶಗಳ ವಿರುದ್ಧ ಹೋರಾಡಿ ನಿಮ್ಮನ್ನು ರೋಗ ಮುಕ್ತರನ್ನಾಗಿ ಮಾಡುವಲ್ಲಿ ಹೆಚ್ಚು ಸಹಾಯಕ ಎಂದು ಹೇಳಬಹುದು.
