ಮಂಗನ ಕಪಿಚೇಷ್ಟೆ ಕಂಡು ದಂಗಾದ ರೋಗಿಗಳು!

• ಚಿಕ್ಕಮಕ್ಕಳು, ಬಾಣಂತಿಯರು ಇರುವ ವಾರ್ಡ್ ಗೆ ನುಗ್ಗಿದ ಕೋತಿ

ವಿಜಯಸಾಕ್ಷಿ ಸುದ್ದಿ, ಗದಗ

ನಗರದ ಕೆಸಿ ರಾಣಿ ರಸ್ತೆಯಲ್ಲಿರುವ ಮಹಿಳಾ ಮತ್ತು ಮಕ್ಕಳ ಆಸ್ಪತ್ರೆಯೊಳಗೆ ನುಗ್ಗಿದ ಮಂಗ ಬೆಡ್ ಗಳ ಮೇಲೆ ಓಡಾಡಿ ರೋಗಿಗಳಲ್ಲಿ ಭಯ ಹುಟ್ಟಿಸಿದ ಘಟನೆ ಭಾನುವಾರ ನಡೆದಿದೆ.

ಚಿಕ್ಕಮಕ್ಕಳು ಹಾಗೂ ಬಾಣಂತಿಯರಿರುವ ವಾರ್ಡ್ ಗೆ ಕೆಂಪು ಕೋತಿಯೊಂದು ಒಳಬಂದು ಬೆಡ್ ಗಳ ಮೇಲೆ ಓಡಾಡಿದೆ. ಕೋತಿ ಕಂಡು ಮಕ್ಕಳು, ಮಹಿಳೆಯರು ಭಯಗೊಂಡಿದ್ದರು.

ಕೋತಿ ಆಸ್ಪತ್ರೆಯಲ್ಲಿ ಕೆಲವು ಕ್ಷಣ ಭಯದ ವಾತಾವರಣ ನಿರ್ಮಿಸಿತ್ತು. ಇಷ್ಟೆಲ್ಲ ಆದರೂ ಕೋತಿಗಳನ್ನು ಓಡಿಸಲು ಆಸ್ಪತ್ರೆಯ ಭದ್ರತಾ ಸಿಬ್ಬಂದಿ ಇಲ್ಲದಿರುವುದು ರೋಗಿಗಳ ಆಕ್ರೋಶಕ್ಕೆ ಗುರಿಯಾಗಿದೆ.

ಈ ಕೋತಿಗಳ ದಂಡು ಹಲವಾರು ದಿವಸಗಳಿಂದ ಆಸ್ಪತ್ರೆ ಆವರಣದಲ್ಲೇ ಬಿಟ್ಟಿದೆ. ಆಗಾಗ ಆಸ್ಪತ್ರೆ ಒಳಗೆ ನುಗ್ಗಿ ಕೈಗೆ ಸಿಕ್ಕಿದ್ದನ್ನು ಬಾಚಿಕೊಂಡು ಹೋಗುವುದು, ಹಸುಗೂಸುಗಳು ಇದ್ದಲ್ಲಿಗೆ ಬಂದು ಕಪಿಚೇಷ್ಟೆ ಮಾಡುವುದು, ರೋಗಿಗಳ
ಬೆಡ್ ಗಳ ಮೇಲೆ ಓಡಾಟ ನಡೆಸುತ್ತಿವೆ.

ಇಷ್ಟಾದರೂ ಮಂಗಗಳ ಕಪಿಚೇಷ್ಟೆ ತಡೆಯಲು ಆಸ್ಪತ್ರೆ ವೈದ್ಯರು ಯಾವುದೇ ಪ್ರಯತ್ನ ಮಾಡದಿರುವುದಕ್ಕೆ ರೋಗಿಗಳು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಈ ಬಗ್ಗೆ ಸಾಕಷ್ಟು ಬಾರಿ ಅರಣ್ಯ‌ ಇಲಾಖೆಗೆ ದೂರು‌ ನೀಡಿದರೂ ಯಾವುದೇ ಪ್ರಯೋಜನವಾಗಿಲ್ಲ ಎಂದು ಆಸ್ಪತ್ರೆ ಆಡಳಿತ ಮಂಡಳಿ ಸಮುಜಾಯಿಸಿ ನೀಡಿದೆ.