ಮಳೆಗಾಲ ಆರಂಭವಾಗುತ್ತಿದ್ದಂತೆ ಹಾವು, ಸೊಳ್ಳೆ, ಕೀಟಗಳ ಜೊತೆಗೆ ಮನೆಯೊಳಗೆ ಹಲ್ಲಿಗಳ ಹಾವಳಿಯೂ ಹೆಚ್ಚಾಗುತ್ತದೆ.
ಗೋಡೆಗಳ ಮೇಲೆ ಓಡಾಡುವ ಹಲ್ಲಿಗಳನ್ನು ಕಂಡು ಕೆಲವರು ಭಯಪಡುತ್ತಾರೆ. ಇನ್ನು ಕೆಲವರಿಗೆ ಹಲ್ಲಿ ಆಹಾರಕ್ಕೆ ಬಿದ್ದರೆ ಏನು ಮಾಡುವುದು ಎಂಬ ಆತಂಕ ಕಾಡುತ್ತದೆ.
ಹಲ್ಲಿಗಳನ್ನು ಓಡಿಸಲು ಹಲವರು ರಾಸಾಯನಿಕ ಉತ್ಪನ್ನಗಳನ್ನು ಬಳಸುತ್ತಾರೆ. ಆದರೆ ಇಂತಹ ಕೆಮಿಕಲ್ಗಳ ಬದಲು ಮನೆಯಲ್ಲೇ ಕೆಲವು ಗಿಡಗಳನ್ನು ಬೆಳೆಸುವ ಮೂಲಕ ಹಲ್ಲಿಗಳ ಕಾಟವನ್ನು ಕಡಿಮೆ ಮಾಡಬಹುದು.
ಹಲ್ಲಿಗಳನ್ನು ದೂರವಿಡಲು ಸಹಾಯ ಮಾಡುವ ಗಿಡಗಳು:
ಲ್ಯಾವೆಂಡರ್ ಗಿಡ:
ಲ್ಯಾವೆಂಡರ್ ಗಿಡವು ಮನೆಯ ಸೌಂದರ್ಯ ಹೆಚ್ಚಿಸುವುದರ ಜೊತೆಗೆ ಅದರ ಬಲವಾದ ವಾಸನೆಯಿಂದ ಹಲ್ಲಿಗಳು ಹಾಗೂ ಕೆಲವು ಕೀಟಗಳನ್ನು ದೂರವಿಡಲು ಸಹಕಾರಿಯಾಗುತ್ತದೆ. ಮನೆಯ ಕಿಟಕಿ ಅಥವಾ ಬಾಲ್ಕನಿಯಲ್ಲಿ ಈ ಗಿಡವನ್ನು ಬೆಳೆಸಬಹುದು.
ಚೆಂಡು ಹೂವಿನ ಗಿಡ:
ಚೆಂಡು ಹೂವಿನ ಗಿಡದ ಪರಿಮಳವು ಸೊಳ್ಳೆ, ಕೀಟಗಳ ಜೊತೆಗೆ ಹಲ್ಲಿಗಳ ಪ್ರವೇಶವನ್ನು ತಡೆಯಲು ಸಹಾಯ ಮಾಡುತ್ತದೆ. ಮನೆಯ ಮುಖ್ಯ ಬಾಗಿಲು ಅಥವಾ ಕಿಟಕಿಗಳ ಬಳಿ ಈ ಗಿಡಗಳನ್ನು ಇಡುವುದು ಉತ್ತಮ.
ರೋಸ್ಮರಿ ಗಿಡ:
ರೋಸ್ಮರಿ ಎಲೆಗಳ ಸುವಾಸನೆಯನ್ನು ಹಲ್ಲಿಗಳು ಮತ್ತು ಕೆಲವು ಕೀಟಗಳು ಇಷ್ಟಪಡುವುದಿಲ್ಲ. ಮನೆಯಲ್ಲಿ ರೋಸ್ಮರಿ ಗಿಡ ಬೆಳೆಸುವುದರಿಂದ ನೈಸರ್ಗಿಕವಾಗಿ ಹಲ್ಲಿಗಳನ್ನು ದೂರವಿಡಬಹುದು.
ಪುದೀನ ಮತ್ತು ತುಳಸಿ:
ಪುದೀನದ ಪರಿಮಳ ಹಾಗೂ ತುಳಸಿಯ ನೈಸರ್ಗಿಕ ಸುವಾಸನೆ ಮನೆಯೊಳಗೆ ಹಲ್ಲಿ ಹಾಗೂ ಇತರ ಕೀಟಗಳು ಪ್ರವೇಶಿಸುವುದನ್ನು ತಡೆಯಲು ಸಹಾಯ ಮಾಡುತ್ತದೆ. ಲೆಮನ್ಗ್ರಾಸ್ ಗಿಡವೂ ಇದೇ ರೀತಿಯ ಪ್ರಯೋಜನ ನೀಡುತ್ತದೆ.
ಮನೆಯ ಸ್ವಚ್ಛತೆಯೂ ಮುಖ್ಯ:
ಗಿಡಗಳನ್ನು ಬೆಳೆಸುವುದರ ಜೊತೆಗೆ ಮನೆಯ ಸ್ವಚ್ಛತೆಯ ಬಗ್ಗೆಯೂ ಗಮನ ಹರಿಸಬೇಕು. ಮನೆಯ ಸುತ್ತಮುತ್ತ ಕಸ ಸಂಗ್ರಹವಾಗದಂತೆ ನೋಡಿಕೊಳ್ಳಬೇಕು. ಆಹಾರ ಪದಾರ್ಥಗಳನ್ನು ತೆರೆದಿಡಬಾರದು ಹಾಗೂ ಗೋಡೆಗಳಲ್ಲಿನ ಬಿರುಕುಗಳನ್ನು ಮುಚ್ಚಬೇಕು.
ನೈಸರ್ಗಿಕ ವಿಧಾನಗಳನ್ನು ಅನುಸರಿಸುವ ಮೂಲಕ ರಾಸಾಯನಿಕ ಬಳಕೆಯನ್ನು ಕಡಿಮೆ ಮಾಡಿ, ಹಲ್ಲಿಗಳ ಕಾಟದಿಂದ ಮುಕ್ತಿ ಪಡೆಯಬಹುದು.
Join WhatsApp
