ಮಡಗಾಸ್ಕರ್: ಭಾನುವಾರ ಮಡಗಾಸ್ಕರ್ ಕರಾವಳಿ ಬಳಿ ವಲಸಿಗರ ಎರಡು ದೋಣಿಗಳು ಮುಳುಗಿ ಕನಿಷ್ಟ 22 ವಲಸಿಗರು ಮೃತಪಟ್ಟಿದ್ದಾರೆ.
ಮುಳುಗಡೆಯಾಗಿರುವ ದೋಣಿಗಳಲ್ಲಿ ಒಟ್ಟು 70 ಸೊಮಾಲಿಯಾ ಪ್ರಜೆಗಳು ಪ್ರಯಾಣಿಸುತ್ತಿದ್ದರು. ಅವರಲ್ಲಿ 22 ಮಂದಿ ಮೃತಪಟ್ಟಿದ್ದು ಉಳಿದವರನ್ನು ರಕ್ಷಣೆ ಮಾಡಲಾಗಿದೆ ಎಂದು ಸೊಮಾಲಿಯಾ ಸರ್ಕಾರ ತಿಳಿಸಿದೆ.
ಮುಳುಗಡೆಯಾಗಿರುವ ದೋಣಿಗಳು ಹಿಂದು ಮಹಾಸಾಗರದ ಮಯೊಟ್ಟೆ ಪ್ರದೇಶಕ್ಕೆ ತೆರಳುತ್ತಿತ್ತು ಎಂದು ಸೊಮಾಲಿಯಾದ ಮಾಹಿತಿ ಸಚಿವ ದೌದ್ ಅವೀಸ್ ಹೇಳಿದ್ದಾರೆ.
ಮಡಗಾಸ್ಕರ್ ಕರಾವಳಿಯ ನೋಸಿ ಇರಾಂಜ ನಗರದ ಬಳಿ ಮೀನುಗಾರಿಕೆಯಲ್ಲಿ ತೊಡಗಿದ್ದವರು ಮುಳುಗುತ್ತಿದ್ದ ದೋಣಿಯನ್ನು ಪತ್ತೆಹಚ್ಚಿದ್ದು 15 ಮಹಿಳೆಯರ ಸಹಿತ 25 ವಲಸಿಗರನ್ನು ರಕ್ಷಿಸಿದ್ದಾರೆ. ಆದರೆ 7 ವಲಸಿಗರು ನೀರಿನಲ್ಲಿ ಮುಳುಗಿ ಮೃತಪಟ್ಟಿದ್ದಾರೆ. ಮಡಗಾಸ್ಕರ್ ನ ಕರಾವಳಿಯಲ್ಲಿ ಮುಳುಗಿದ್ದ ಮತ್ತೊಂದು ದೋಣಿಯನ್ನು ಕರಾವಳಿ ಕಾವಲು ಪಡೆ ಪತ್ತೆಹಚ್ಚಿದ್ದು 23 ವಲಸಿಗರನ್ನು ರಕ್ಷಿಸಲಾಗಿದೆ. ಆದರೆ 15 ವಲಸಿಗರು ಸಾವನ್ನಪ್ಪಿದ್ದಾರೆ ಎಂದು ಬಂದರು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.
ಮುಳುಗಡೆಯಾಗಿರುವ ಎರಡು ದೋಣಿಗಳಲ್ಲಿ ಒಟ್ಟು 70 ಸೊಮಾಲಿಯಾ ಪ್ರಜೆಗಳಿದ್ದರು. ಅವರಲ್ಲಿ 22 ಮಂದಿ ಸಾವನ್ನಪ್ಪಿದ್ದಾರೆ ಎಂದು ಸೊಮಾಲಿಯಾ ಸರಕಾರದ ಮೂಲಗಳು ತಿಳಿಸಿವೆ.
