ಮಂಗಳೂರು: ನಿರಪರಾಧ ಬಾಲ್ಯದಲ್ಲಿ ನಡೆದ ಕ್ಷಣಿಕ ತಪ್ಪು ಜೀವಪಾಯಕ್ಕೆ ಕಾರಣವಾದ ಹೃದಯವಿದ್ರಾವಕ ಘಟನೆ ಉಳ್ಳಾಲದ ಕೊಲ್ಯ ಗ್ರಾಮದಲ್ಲಿ ನಡೆದಿದೆ. ಲೂಡೋ ಆಟ ಆಡುತ್ತಿದ್ದ 8 ವರ್ಷದ ಬಾಲಕಿ ಪ್ಲಾಸ್ಟಿಕ್ ಕಾಯಿನ್ ನುಂಗಿ ಮೃತಪಟ್ಟಿದ್ದಾಳೆ.
ಕೇರಳದ ಕಾಸರಗೋಡು ಜಿಲ್ಲೆಯ ಮಧೂರು ಮೂಲದ ರಾಜೇಶ್ ಗಟ್ಟಿ ಹಾಗೂ ರಾಜೇಶ್ವರಿ ದಂಪತಿಯ ಪುತ್ರಿ ತನುಷ್ಕ ದುರ್ಮರಣಕ್ಕೀಡಾದ ಬಾಲಕಿ. ಸಹೋದರ ಸಹೋದರಿಯೊಂದಿಗೆ ಆಟವಾಡುತ್ತಿದ್ದ ವೇಳೆ ಶಂಕು ಆಕಾರದ ಕಾಯಿನ್ನ್ನು ನುಂಗಿದ್ದು, ಗಂಟಲಲ್ಲಿ ಸಿಲುಕಿಕೊಂಡ ಕಾರಣ ಉಸಿರಾಟ ಸ್ಥಗಿತಗೊಂಡಿತ್ತು.
ಸ್ಥಿತಿ ಗಂಭೀರವಾಗುತ್ತಿದ್ದಂತೆ ತಕ್ಷಣ ಆಸ್ಪತ್ರೆಗೆ ಕರೆದೊಯ್ಯಲಾಯಿತಾದರೂ, ವೈದ್ಯರು ಬಾಲಕಿಯನ್ನು ಉಳಿಸಲು ಸಾಧ್ಯವಾಗಲಿಲ್ಲ.
ಈ ದುರ್ಘಟನೆ ಮಕ್ಕಳ ಆಟಿಕೆಗಳ ಬಳಕೆಯಲ್ಲಿ ಪೋಷಕರು ಹೆಚ್ಚುವರಿ ಎಚ್ಚರಿಕೆ ವಹಿಸುವ ಅಗತ್ಯವನ್ನು ಮತ್ತೊಮ್ಮೆ ನೆನಪಿಸುತ್ತದೆ.
