ಮಳೆಗಾಲದಲ್ಲಿ ಸಿಡಿಲು, ಪ್ರವಾಹದಂತಹ ಪ್ರಕೃತಿ ವಿಕೋಪಗಳ ಜತೆಗೆ ಮನೆಗಳಲ್ಲಿ ವಿದ್ಯುತ್ ಶಾಕ್ ಮತ್ತು ಶಾರ್ಟ್ ಸರ್ಕ್ಯೂಟ್ ಘಟನೆಗಳೂ ಹೆಚ್ಚಾಗುತ್ತವೆ.
ಸ್ವಿಚ್ಬೋರ್ಡ್, ಫ್ರಿಡ್ಜ್, ವಾಷಿಂಗ್ ಮಷಿನ್ ಸೇರಿದಂತೆ ವಿದ್ಯುತ್ ಉಪಕರಣಗಳನ್ನು ಬಳಸುವಾಗ ಸ್ವಲ್ಪ ನಿರ್ಲಕ್ಷ್ಯವೂ ಜೀವಕ್ಕೆ ಅಪಾಯ ಉಂಟುಮಾಡುವ ಸಾಧ್ಯತೆ ಇರುವುದರಿಂದ ಸಾರ್ವಜನಿಕರು ಎಚ್ಚರಿಕೆ ವಹಿಸುವಂತೆ ತಜ್ಞರು ಸಲಹೆ ನೀಡಿದ್ದಾರೆ.
ಮಳೆಯ ನೀರು ಗೋಡೆಗಳು ಹಾಗೂ ಸ್ವಿಚ್ಬೋರ್ಡ್ಗಳಿಗೆ ತಾಕುವುದು, ಅರ್ಥಿಂಗ್ ವ್ಯವಸ್ಥೆ ದೋಷಪೂರಿತವಾಗಿರುವುದು ಅಥವಾ ಒದ್ದೆ ಕೈಯಲ್ಲಿ ವಿದ್ಯುತ್ ಉಪಕರಣಗಳನ್ನು ಮುಟ್ಟುವುದು ವಿದ್ಯುತ್ ಶಾಕ್ಗೆ ಪ್ರಮುಖ ಕಾರಣಗಳಾಗಿವೆ. ಇಂತಹ ಸಮಸ್ಯೆಗಳು ಕಂಡುಬಂದರೆ ತಕ್ಷಣವೇ ಅರ್ಹ ಎಲೆಕ್ಟ್ರಿಷಿಯನ್ ಮೂಲಕ ದುರಸ್ತಿ ಮಾಡಿಸಿಕೊಳ್ಳುವುದು ಅಗತ್ಯ.
ಮನೆಯ ಅರ್ಥಿಂಗ್ ವ್ಯವಸ್ಥೆಯನ್ನು ನಿಯಮಿತವಾಗಿ ಪರಿಶೀಲಿಸಿಕೊಳ್ಳುವುದು ಅತ್ಯಂತ ಮುಖ್ಯ. ಅರ್ಥಿಂಗ್ ಸರಿಯಾಗಿದ್ದರೆ ಹೆಚ್ಚುವರಿ ವಿದ್ಯುತ್ ಸುರಕ್ಷಿತವಾಗಿ ನೆಲಕ್ಕೆ ಹರಿದು ಅಪಾಯ ತಪ್ಪುತ್ತದೆ. ಅರ್ಥಿಂಗ್ನಲ್ಲಿ ದೋಷವಿದ್ದರೆ ವಿದ್ಯುತ್ ಉಪಕರಣಗಳಲ್ಲಿ ವಿದ್ಯುತ್ ಸೋರಿಕೆಯಾಗುವ ಸಾಧ್ಯತೆ ಹೆಚ್ಚಾಗುತ್ತದೆ.
ವಿದ್ಯುತ್ ಉಪಕರಣಗಳನ್ನು ಬಳಸುವಾಗ ಒದ್ದೆ ಕೈಗಳಿಂದ ಮುಟ್ಟಬಾರದು. ಐಎಸ್ಐ (ISI) ಗುಣಮಟ್ಟದ ವಿದ್ಯುತ್ ಉಪಕರಣಗಳನ್ನೇ ಬಳಸಬೇಕು. ವೈರ್ ಹಾನಿಗೊಳಗಾದ ಅಥವಾ ದೋಷವಿರುವ ಉಪಕರಣಗಳನ್ನು ಮಳೆಗಾಲದಲ್ಲಿ ಬಳಸುವುದನ್ನು ಸಂಪೂರ್ಣವಾಗಿ ತಪ್ಪಿಸುವುದು ಸುರಕ್ಷಿತ.
ಪ್ಲಗ್ಗಳನ್ನು ಸಾಕೆಟ್ಗೆ ಅಳವಡಿಸುವಾಗ ಮೊದಲು ಪ್ಲಗ್ ಹಾಕಿ ಬಳಿಕ ಸ್ವಿಚ್ ಆನ್ ಮಾಡಬೇಕು. ಪ್ಲಗ್ ತೆಗೆದುಹಾಕುವಾಗ ವೈರ್ ಎಳೆಯದೆ ಪ್ಲಗ್ನನ್ನೇ ಹಿಡಿದು ತೆಗೆಯಬೇಕು. ಮಕ್ಕಳ ಕೈಗೆ ಸಿಗುವ ಸ್ಥಳದಲ್ಲಿರುವ ಸಾಕೆಟ್ಗಳನ್ನು ಸುರಕ್ಷತಾ ಕವರ್ಗಳಿಂದ ಮುಚ್ಚಿಡುವುದು ಉತ್ತಮ.
ಗೀಸರ್, ಫ್ರಿಡ್ಜ್, ವಾಷಿಂಗ್ ಮಷಿನ್ ಸೇರಿದಂತೆ ಹೆಚ್ಚಿನ ವಿದ್ಯುತ್ ಬಳಕೆಯ ಉಪಕರಣಗಳಿಗೆ ಸುರಕ್ಷತಾ ಪ್ಲಗ್ಗಳನ್ನು ಅಳವಡಿಸಬೇಕು. ಯಾವುದೇ ವಿದ್ಯುತ್ ಸಾಧನವನ್ನು ಬಳಸುವಾಗ ರಬ್ಬರ್ ಬೂಟ್ ಅಥವಾ ಒಣ ಚಪ್ಪಲಿ ಧರಿಸುವುದು ಹಾಗೂ ದುರಸ್ತಿ ವೇಳೆ ರಬ್ಬರ್ ಗ್ಲೌಸ್ ಬಳಸುವುದು ಸುರಕ್ಷತೆಗೆ ನೆರವಾಗುತ್ತದೆ.
ಅಲ್ಲದೆ, ನೀರಿನ ನಲ್ಲಿಗಳು ಅಥವಾ ನೀರು ಸೋರಿಕೆಯಿರುವ ಸ್ಥಳಗಳ ಸಮೀಪ ವಿದ್ಯುತ್ ಸಾಧನಗಳನ್ನು ಇಡದಂತೆ ಎಚ್ಚರಿಕೆ ವಹಿಸುವುದು ಅಗತ್ಯ. ಮಳೆಗಾಲದಲ್ಲಿ ವಿದ್ಯುತ್ ಸುರಕ್ಷತಾ ನಿಯಮಗಳನ್ನು ಪಾಲಿಸುವುದರಿಂದ ಅಪಾಯಗಳನ್ನು ಬಹುತೇಕ ತಪ್ಪಿಸಬಹುದು ಎಂದು ತಜ್ಞರು ತಿಳಿಸಿದ್ದಾರೆ.
