ವಿಜಯಸಾಕ್ಷಿ ಸುದ್ದಿ, ಹುಬ್ಬಳ್ಳಿ
ಕಳೆದ ಅಗಸ್ಟ್ 15ರಂದು ಕಲಘಟಗಿ-ಅಳ್ನಾವರ ಮತಕ್ಷೇತ್ರದ ವಿಶ್ವದ ಅತಿ ಉದ್ದನೆಯ ತಿರಂಗಾ ರ್ಯಾಲಿಯು ವರ್ಡ್ ಬುಕ್ ಆಫ್ ರೆಕಾರ್ಡ್ನಲ್ಲಿ ಸ್ಥಾನ ಪಡೆದು ದಾಖಲೆ ನಿರ್ಮಿಸಿತ್ತು.
ಇದೀಗ ಮತ್ತೊಮ್ಮೆ ವಿಶ್ವದಾಖಲೆಯ ಕ್ಷಣಕ್ಕೆ ಸಾಕ್ಷಿಯಾಗುವ ಸಮಯ ಬಂದಿದ್ದು, ದೀನ-ದಲಿತರ ಹಾಗೂ ಬಡವರ ಬಂಧು, ಕಾಯಕಯೋಗಿ, ಶಿಕ್ಷಣ ಪ್ರೇಮಿ, ದಣಿವರಿಯದ ನಾಯಕ, ಮಾಜಿ ಸಚಿವ ಸಂತೋಷ್ ಲಾಡ್ರ 48ನೇ ಹುಟ್ಟುಹಬ್ಬದ ಪ್ರಯುಕ್ತ ಸಂತೋಷ್ ಲಾಡ್ ಫೌಂಡೇಶನ್, ಲಾಡ್ ಪರಿವಾರ ಹಾಗೂ ಸಂತೋಷ್ ಲಾಡ್ ಗೆಳೆಯರ ಬಳಗದ ಸಾರಥ್ಯದಲ್ಲಿ, ಕಲಘಟಗಿ ಹಾಗೂ ಅಳ್ನಾವರ ಭಾಗದ ಸಮಸ್ತ ಗುರು-ಹಿರಿಯರ ಸಮ್ಮುಖದಲ್ಲಿ ಬೃಹತ್ ಉಚಿತ ಸರ್ವಧರ್ಮ ಸಾಮೂಹಿಕ ವಿವಾಹ ಕಾರ್ಯಕ್ರಮವನ್ನು ಹಮ್ಮಿಕೊಳ್ಳಲಾಗಿದೆ.
ನಾಲ್ಕು ಸಾವಿರವರೆಗಿನ ಜೋಡಿಗಳ ಈ ಸಾಮೂಹಿಕ ವಿವಾಹ ಕಾರ್ಯಕ್ರಮ ವಿಶ್ವದಾಖಲೆಗೂ ಪಾತ್ರವಾಗುವ ಸಾಧ್ಯತೆಯಿದ್ದು, 2023ರ ಫೆಬ್ರವರಿ 27, ಸೋಮವಾರದಂದು ಕುರುವಿನಕೊಪ್ಪ, ಬೂದನಗುಡ್ಡ ರಸ್ತೆಯಲ್ಲಿ ಈ ಬೃಹತ್ ಕಾರ್ಯಕ್ರಮ ನಡೆಯಲಿದೆ.
ವಧುವಿಗೆ ತಾಳಿ, ಕಾಲುಂಗುರ, ಸೀರೆ, ಬಾಸಿಂಗ ಹಾಗೂ ವರನಿಗೆ ಶರ್ಟ್, ಪಂಚೆ, ಬಾಸಿಂಗವನ್ನು ನೀಡಲಾಗುವುದು. ಈ ಮಹೋನ್ನತ ಕಾರ್ಯಕ್ರಮದಲ್ಲಿ ವಿವಾಹವಾಗಿ ವಿಶ್ವದಾಖಲೆಯ ಭಾಗವಾಗುವವರು 9113084540/ 8123810002 ಸಂಪರ್ಕಿಸುವಂತೆ ಪ್ರಕಟಣೆ ತಿಳಿಸಿದೆ.