ಇತ್ತೀಚಿನ ದಿನಗಳಲ್ಲಿ ಡೆನಿಮ್ ಜೀನ್ಸ್ ಯುವಜನತೆ ಸೇರಿದಂತೆ ಎಲ್ಲ ವಯೋಮಾನದವರ ನೆಚ್ಚಿನ ಉಡುಪಾಗಿದೆ.
ಆರಾಮದಾಯಕವಾಗಿರುವುದರ ಜೊತೆಗೆ ಸ್ಟೈಲಿಶ್ ಲುಕ್ ನೀಡುವ ಜೀನ್ಸ್ಗಳನ್ನು ಹೆಚ್ಚಿನವರು ದೈನಂದಿನ ಬಳಕೆಯಲ್ಲಿ ಧರಿಸುತ್ತಾರೆ. ಆದರೆ ಕೆಲವೇ ದಿನಗಳಲ್ಲಿ ಜೀನ್ಸ್ ಬಣ್ಣ ಮಾಸಿ ಹಳೆಯದಾಗಿ ಕಾಣಿಸಿಕೊಳ್ಳುವುದು ಸಾಮಾನ್ಯ ಸಮಸ್ಯೆಯಾಗಿದೆ.
ತಜ್ಞರ ಪ್ರಕಾರ, ಜೀನ್ಸ್ನ ಗುಣಮಟ್ಟ ಮಾತ್ರವಲ್ಲದೆ ಅದನ್ನು ತೊಳೆಯುವ ಮತ್ತು ಆರೈಕೆ ಮಾಡುವ ವಿಧಾನವೂ ಅದರ ಬಾಳಿಕೆ ಹಾಗೂ ಬಣ್ಣದ ಮೇಲೆ ಪರಿಣಾಮ ಬೀರುತ್ತದೆ. ಸರಿಯಾದ ವಿಧಾನ ಅನುಸರಿಸಿದರೆ ಜೀನ್ಸ್ ದೀರ್ಘಕಾಲ ಹೊಸದರಂತೆ ಕಾಣುತ್ತದೆ.
ಜೀನ್ಸ್ಗಳನ್ನು ತೊಳೆಯುವಾಗ ಯಾವಾಗಲೂ ಒಳಭಾಗವನ್ನು ಹೊರಗೆ ತಿರುಗಿಸಿ ಒಗೆಯಬೇಕು. ಇದರಿಂದ ಹೊರಭಾಗದ ಬಣ್ಣ ಮಾಸುವುದು ಮತ್ತು ಸವೆತ ಉಂಟಾಗುವುದನ್ನು ತಡೆಯಬಹುದು. ಅಲ್ಲದೆ, ಬಿಸಿ ನೀರಿನ ಬದಲಿಗೆ ತಣ್ಣನೆಯ ನೀರನ್ನು ಬಳಸುವುದು ಉತ್ತಮ. ಬಿಸಿ ನೀರು ಜೀನ್ಸ್ನ ಬಣ್ಣವನ್ನು ಬೇಗನೆ ಮಸುಕಾಗಿಸುವ ಸಾಧ್ಯತೆ ಇದೆ.
ಜೀನ್ಸ್ ಅನ್ನು ಹೆಚ್ಚು ಉಜ್ಜುವುದು ಅಥವಾ ಬಲವಾಗಿ ಹಿಂಡುವುದನ್ನು ತಪ್ಪಿಸಬೇಕು. ಇಂತಹ ಕ್ರಮಗಳು ಬಟ್ಟೆಯ ಗುಣಮಟ್ಟಕ್ಕೆ ಹಾನಿ ಉಂಟುಮಾಡುವುದರ ಜೊತೆಗೆ ಬಣ್ಣ ಮಾಸುವಿಕೆಯನ್ನು ಹೆಚ್ಚಿಸುತ್ತವೆ. ಸೌಮ್ಯವಾದ ಡಿಟರ್ಜೆಂಟ್ ಬಳಸುವುದು ಸಹ ಅಗತ್ಯವಾಗಿದೆ. ಕಠಿಣ ರಾಸಾಯನಿಕಗಳಿರುವ ಡಿಟರ್ಜೆಂಟ್ಗಳು ಡೆನಿಮ್ ಬಟ್ಟೆಗೆ ಹಾನಿ ಮಾಡಬಹುದು ಎಂದು ತಜ್ಞರು ಎಚ್ಚರಿಸಿದ್ದಾರೆ.
ಜೀನ್ಸ್ ಒಣಗಿಸುವ ವಿಧಾನವೂ ಅಷ್ಟೇ ಮುಖ್ಯವಾಗಿದೆ. ನೇರ ಸೂರ್ಯನ ಬೆಳಕಿನಲ್ಲಿ ಒಣಗಿಸುವ ಬದಲು ನೆರಳಿನ ಸ್ಥಳದಲ್ಲಿ ಒಣಗಿಸಿದರೆ ಬಣ್ಣ ದೀರ್ಘಕಾಲ ಉಳಿಯುತ್ತದೆ.
ಇನ್ನು ಪ್ರತಿ ಬಾರಿ ಧರಿಸಿದ ಬಳಿಕ ಜೀನ್ಸ್ ತೊಳೆಯುವ ಅಗತ್ಯವಿಲ್ಲ ಎಂದು ಫ್ಯಾಷನ್ ತಜ್ಞರು ಸಲಹೆ ನೀಡಿದ್ದಾರೆ. ಸಾಮಾನ್ಯವಾಗಿ 4ರಿಂದ 5 ಬಾರಿ ಧರಿಸಿದ ನಂತರ ತೊಳೆಯುವುದು ಸೂಕ್ತ. ಬಳಕೆಯ ನಂತರ ಗಾಳಿ ಚೆನ್ನಾಗಿ ಬರುವ ಸ್ಥಳದಲ್ಲಿ ಜೀನ್ಸ್ ಅನ್ನು ಇಟ್ಟರೆ ದುರ್ವಾಸನೆ ದೂರವಾಗಿ ಪದೇಪದೇ ತೊಳೆಯುವ ಅವಶ್ಯಕತೆಯೂ ಕಡಿಮೆಯಾಗುತ್ತದೆ.
ಸರಿಯಾದ ಆರೈಕೆ ಮತ್ತು ತೊಳೆಯುವ ವಿಧಾನ ಅನುಸರಿಸಿದರೆ ಡೆನಿಮ್ ಜೀನ್ಸ್ಗಳು ಹೆಚ್ಚು ಕಾಲ ಹೊಸದರಂತೆ ಕಾಣುವುದರ ಜೊತೆಗೆ ಬಾಳಿಕೆಯೂ ಹೆಚ್ಚುತ್ತದೆ ಎಂದು ತಜ್ಞರು ತಿಳಿಸಿದ್ದಾರೆ.
