ನಿಮ್ಮ ಪಾದಗಳು ಪದೇ ಪದೇ ತಣ್ಣಗಾಗುತ್ತಾ? ಅದಕ್ಕೆ ಕಾರಣ ಏನ್ ಗೊತ್ತಾ?

ಸಾಮಾನ್ಯವಾಗಿ ಪಾದಗಳು ಚಳಿಗಾಲದಲ್ಲಿ ತಣ್ಣಗಾಗುತ್ತವೆ ಎಂದು ಬಹುತೇಕರು ಭಾವಿಸುತ್ತಾರೆ. ಸಾಕ್ಸ್ ಹಾಕಿಕೊಂಡರೂ, ದಪ್ಪ ಹೊದಿಕೆ ಹೊದ್ದರೂ ಪಾದಗಳು ಬೆಚ್ಚಗಾಗದೇ ಇರುವುದನ್ನು ಹವಾಮಾನದ ಪರಿಣಾಮ ಎಂದು ನಿರ್ಲಕ್ಷಿಸುವವರೇ ಹೆಚ್ಚು. ಆದರೆ ಕೆಲವೊಮ್ಮೆ ಇದು ದೇಹದಲ್ಲಿನ ಆಂತರಿಕ ಸಮಸ್ಯೆಯ ಸಂಕೇತವಾಗಿರಬಹುದು ಎಂಬುದು ಹಲವರಿಗೆ ತಿಳಿದಿಲ್ಲ.

ಹೌದು, ಪಾದಗಳು ಪದೇಪದೇ ತಣ್ಣಗಾಗುವುದು (Cold Feet) ಮಧುಮೇಹದ ಲಕ್ಷಣವಾಗಿರಬಹುದು. ಆದರೆ ಇದಕ್ಕೆ ಮಧುಮೇಹ ಮಾತ್ರವೇ ಕಾರಣವಲ್ಲ. ಈ ಸಮಸ್ಯೆ ದೀರ್ಘಕಾಲ ಮುಂದುವರಿದರೆ ಅಥವಾ ಇತರ ದೈಹಿಕ ಬದಲಾವಣೆಗಳೊಂದಿಗೆ ಕಂಡುಬಂದರೆ, ಜಾಗರೂಕರಾಗುವುದು ಅಗತ್ಯ.

ಮಧುಮೇಹ ಮತ್ತು ತಣ್ಣಗಾಗುವ ಪಾದಗಳ ನಡುವಿನ ಸಂಬಂಧ

ಲೇಡಿ ಹಾರ್ಡಿಂಜ್ ಆಸ್ಪತ್ರೆಯ ಡಾ. ಎಲ್.ಎಚ್. ಘೋಟೇಕರ್ ಅವರ ಪ್ರಕಾರ, ಮಧುಮೇಹದಲ್ಲಿ ರಕ್ತದ ಸಕ್ಕರೆ ಮಟ್ಟ ಹೆಚ್ಚಾದಾಗ ನರಗಳು ಮತ್ತು ರಕ್ತನಾಳಗಳಿಗೆ ಹಾನಿಯಾಗುತ್ತದೆ. ಇದರಿಂದ

• ಪಾದಗಳಲ್ಲಿ ಮರಗಟ್ಟುವಿಕೆ

• ಜುಮ್ಮೆನಿಸುವಿಕೆ

• ಸುಡುವ ಭಾವನೆ

• ತಣ್ಣನೆಯ ಅನುಭವ

ಕಾಣಿಸಿಕೊಳ್ಳಬಹುದು. ಜೊತೆಗೆ ಪಾದಗಳಲ್ಲಿ ಪುನರಾವರ್ತಿತ ನೋವು, ಒಣ ಚರ್ಮ, ಗಾಯಗಳು ನಿಧಾನವಾಗಿ ಗುಣವಾಗುವುದು ಹಾಗೂ ಹೆಚ್ಚು ಆಯಾಸವಾಗುವುದೂ ಮಧುಮೇಹದ ಲಕ್ಷಣಗಳಾಗಿರಬಹುದು. ಚಳಿಗಾಲದಲ್ಲಿ ರಕ್ತದ ಹರಿವು ನಿಧಾನವಾಗುವ ಕಾರಣ ಈ ಸಮಸ್ಯೆಗಳು ಹೆಚ್ಚಾಗಿ ಕಂಡುಬರುತ್ತವೆ.

ಆದರೆ ಪಾದಗಳು ತಣ್ಣಗಾದ ಮಾತ್ರಕ್ಕೆ ಮಧುಮೇಹವಿದೆ ಎಂದು ಅರ್ಥವಲ್ಲ. ಆದರೆ ಇದಕ್ಕೆ ಜೊತೆಗೆ ಅತಿಯಾದ ಬಾಯಾರಿಕೆ, ಆಗಾಗ ಮೂತ್ರ ವಿಸರ್ಜನೆ, ತೂಕದಲ್ಲಿ ಬದಲಾವಣೆಗಳಂತಹ ಲಕ್ಷಣಗಳಿದ್ದರೆ, ತಕ್ಷಣ ಪರೀಕ್ಷೆ ಮಾಡಿಸಿಕೊಳ್ಳುವುದು ಅತ್ಯಂತ ಮುಖ್ಯ.

ರಕ್ತ ಪರಿಚಲನೆ ಸರಿಯಾಗಿಲ್ಲದಿದ್ದರೂ ಪಾದಗಳು ತಣ್ಣಗಾಗುತ್ತವೆಯೇ?

ಹೌದು. ಪಾದಗಳಿಗೆ ಸರಿಯಾದ ಪ್ರಮಾಣದಲ್ಲಿ ರಕ್ತ ತಲುಪದಿದ್ದಾಗ ಅವು ತಣ್ಣಗಾಗುತ್ತವೆ. ದೀರ್ಘಕಾಲ ಕುಳಿತುಕೊಳ್ಳುವುದು, ದೈಹಿಕ ಚಟುವಟಿಕೆಯ ಕೊರತೆ, ಧೂಮಪಾನ ಹಾಗೂ ವಯಸ್ಸಾಗುವುದರಿಂದ ಈ ಸಮಸ್ಯೆ ಉಂಟಾಗಬಹುದು.

ಚಳಿಗಾಲದಲ್ಲಿ ರಕ್ತನಾಳಗಳು ಸಂಕುಚಿತಗೊಂಡು ರಕ್ತದ ಹರಿವು ಕಡಿಮೆಯಾಗುತ್ತದೆ. ಇದರಿಂದ ಪಾದಗಳ ಚರ್ಮ ತಣ್ಣಗಾಗುವುದು, ಸ್ವಲ್ಪ ನೀಲಿ ಬಣ್ಣ ಕಾಣಿಸಿಕೊಳ್ಳುವುದು ಹಾಗೂ ಕೆಲವೊಮ್ಮೆ ಸೌಮ್ಯ ನೋವು ಅಥವಾ ಸೆಳೆತ ಉಂಟಾಗಬಹುದು. ಆದರೆ ನಡೆಯಲು ತೊಂದರೆ ಆಗುತ್ತಿದ್ದರೆ ಅದನ್ನು ನಿರ್ಲಕ್ಷಿಸಬಾರದು.

ಪಾದಗಳು ತಣ್ಣಗಾಗುವುದನ್ನು ತಪ್ಪಿಸಲು ಏನು ಮಾಡಬೇಕು?

• ಪಾದಗಳನ್ನು ಸದಾ ಬೆಚ್ಚಗಿಟ್ಟುಕೊಳ್ಳಿ

• ಪ್ರತಿದಿನ ಲಘು ವ್ಯಾಯಾಮ ಅಥವಾ ನಡಿಗೆ ಮಾಡಿ

• ಒಂದೇ ಜಾಗದಲ್ಲಿ ಹೆಚ್ಚು ಹೊತ್ತು ಕುಳಿತುಕೊಳ್ಳಬೇಡಿ

• ರಕ್ತದಲ್ಲಿನ ಸಕ್ಕರೆ ಮಟ್ಟವನ್ನು ನಿಯಮಿತವಾಗಿ ಪರೀಕ್ಷಿಸಿಕೊಳ್ಳಿ

• ಧೂಮಪಾನದಿಂದ ದೂರವಿರಿ

• ಪಾದಗಳನ್ನು ಸ್ವಚ್ಛವಾಗಿ ಮತ್ತು ಒಣವಾಗಿಟ್ಟುಕೊಳ್ಳಿ