ಯಶ್ ‘ಟಾಕ್ಸಿಕ್’ಗೆ ಅಡ್ವಾನ್ಸ್ ಬುಕಿಂಗ್‌ನಲ್ಲೇ ಬಿಗ್ ರೆಸ್ಪಾನ್ಸ್: ಕರ್ನಾಟಕದಲ್ಲಿ ₹5 ಕೋಟಿ ಗಡಿ ಸಮೀಪ!

ರಾಕಿಂಗ್ ಸ್ಟಾರ್ ಯಶ್ ಅಭಿನಯದ ‘ಟಾಕ್ಸಿಕ್: ಎ ಫೇರಿ ಟೇಲ್ ಫಾರ್ ಗ್ರೋನ್-ಅಪ್ಸ್’ ಸಿನಿಮಾ ಬಿಡುಗಡೆಯ ಮುನ್ನವೇ ಬಾಕ್ಸ್ ಆಫೀಸ್‌ನಲ್ಲಿ ಸದ್ದು ಮಾಡಲು ಆರಂಭಿಸಿದೆ. ನಾಲ್ಕೂವರೆ ವರ್ಷಗಳ ಬಳಿಕ ಯಶ್ ಅವರನ್ನು ತೆರೆಮೇಲೆ ಕಾಣಲು ಕಾದಿರುವ ಅಭಿಮಾನಿಗಳ ಕ್ರೇಜ್ ಇದೀಗ ಅಡ್ವಾನ್ಸ್ ಟಿಕೆಟ್ ಬುಕಿಂಗ್‌ನಲ್ಲೇ ಸ್ಪಷ್ಟವಾಗಿ ಗೋಚರಿಸುತ್ತಿದೆ.

ಭಾರತದಲ್ಲಿ ಅಡ್ವಾನ್ಸ್ ಬುಕಿಂಗ್ ಆರಂಭವಾದ ಕೆಲವೇ ಗಂಟೆಗಳಲ್ಲಿ ಬುಕ್‌ಮೈಶೋನಲ್ಲಿ 1 ಲಕ್ಷಕ್ಕೂ ಹೆಚ್ಚು ಟಿಕೆಟ್‌ಗಳು ಮಾರಾಟವಾಗಿವೆ. ಆರಂಭಿಕ ಒಂದು ಗಂಟೆಯಲ್ಲಿ ಸುಮಾರು 3,050 ಟಿಕೆಟ್‌ಗಳು ಮಾರಾಟವಾಗಿದ್ದರೆ, ಬೆಳಗ್ಗೆ 10ರಿಂದ 11ರ ಅವಧಿಯಲ್ಲಿ ಒಂದೇ ಗಂಟೆಯಲ್ಲಿ ಸುಮಾರು 27,000 ಟಿಕೆಟ್‌ಗಳು ಬುಕ್ ಆಗಿವೆ.

ಕರ್ನಾಟಕದಲ್ಲಿ ಚಿತ್ರದ ಕ್ರೇಜ್ ಇನ್ನಷ್ಟು ಜೋರಾಗಿದೆ. ಬಿಡುಗಡೆಗೆ ಐದು ದಿನಗಳ ಮುನ್ನವೇ ರಾಜ್ಯದ ಮುಂಗಡ ಬುಕಿಂಗ್ ₹5 ಕೋಟಿಯ ಗಡಿ ತಲುಪುವ ಹಂತದಲ್ಲಿದೆ. ಶೋ ಹಾಗೂ ಸ್ಕ್ರೀನ್‌ಗಳ ಸಂಖ್ಯೆ ಇನ್ನೂ ಅಂತಿಮಗೊಳ್ಳುತ್ತಿರುವುದರಿಂದ ಬುಕಿಂಗ್ ಮೊತ್ತ ಮತ್ತಷ್ಟು ಹೆಚ್ಚಾಗುವ ಸಾಧ್ಯತೆಯಿದೆ.

ಅಮೆರಿಕದಲ್ಲೂ ‘ಟಾಕ್ಸಿಕ್’ ಮುಂಗಡ ಬುಕಿಂಗ್ ಗಮನ ಸೆಳೆಯುತ್ತಿದೆ. 260 ಸ್ಥಳಗಳಲ್ಲಿ 709 ಪ್ರದರ್ಶನಗಳಿಂದ 7,545 ಟಿಕೆಟ್‌ಗಳು ಮಾರಾಟವಾಗಿದ್ದು, ಒಟ್ಟು $163,150 ವ್ಯವಹಾರ ನಡೆದಿದೆ. ಪ್ರಸ್ತುತ ಆಕ್ಯುಪೆನ್ಸಿ ಶೇ.9ರಷ್ಟಿದೆ.

ಅಮೆರಿಕದಲ್ಲಿ ಬರೋಬ್ಬರಿ 2,000 ಸ್ಕ್ರೀನ್‌ಗಳಲ್ಲಿ ಸಿನಿಮಾ ಬಿಡುಗಡೆ ಮಾಡುವ ಗುರಿ ಹೊಂದಲಾಗಿದೆ. ಸದ್ಯ ಸುಮಾರು 700 ಪ್ರದರ್ಶನಗಳು ಮಾತ್ರ ಬುಕಿಂಗ್‌ಗೆ ತೆರೆದಿದ್ದು, ಎಎಂಸಿ ಸೇರಿದಂತೆ ಪ್ರಮುಖ ಥಿಯೇಟರ್ ಚೈನ್‌ಗಳು ತಮ್ಮ ಸಂಪೂರ್ಣ ಶೆಡ್ಯೂಲ್‌ಗಳನ್ನು ಇನ್ನಷ್ಟೇ ಪ್ರಕಟಿಸಬೇಕಿದೆ.

ಅಮೆರಿಕದ ರಾಜ್ಯವಾರು ಬುಕಿಂಗ್‌ನಲ್ಲಿ ಟೆಕ್ಸಾಸ್ $56,931 ಗಳಿಕೆಯೊಂದಿಗೆ ಮೊದಲ ಸ್ಥಾನದಲ್ಲಿದ್ದರೆ, ಕ್ಯಾಲಿಫೋರ್ನಿಯಾ $25,849 ವ್ಯವಹಾರ ದಾಖಲಿಸಿದೆ.

ಭಾಷಾವಾರು ಬುಕಿಂಗ್ ಗಮನಿಸಿದರೆ ತೆಲುಗು ಆವೃತ್ತಿ ಸದ್ಯ ಮುನ್ನಡೆ ಸಾಧಿಸಿದೆ. 4,359 ಟಿಕೆಟ್‌ಗಳಿಂದ ತೆಲುಗು ಆವೃತ್ತಿ $94,706 ಗಳಿಸಿದ್ದರೆ, ಕನ್ನಡ ಆವೃತ್ತಿ 3,173 ಟಿಕೆಟ್‌ಗಳಿಂದ $68,246 ಗಳಿಸಿದೆ. ಹಿಂದಿ ಆವೃತ್ತಿಯ ಬುಕಿಂಗ್ ಸದ್ಯ ನಿಧಾನಗತಿಯಲ್ಲಿದೆ.

ಗೀತು ಮೋಹನ್‌ದಾಸ್ ನಿರ್ದೇಶನದ ಈ ಸಿನಿಮಾದಲ್ಲಿ ಯಶ್ ಜೊತೆ ನಯನತಾರಾ, ಕಿಯಾರಾ ಅಡ್ವಾಣಿ, ತಾರಾ ಸುತಾರಿಯಾ, ರುಕ್ಮಿಣಿ ವಸಂತ್ ಹಾಗೂ ಹುಮಾ ಖುರೇಷಿ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದಾರೆ. ಯಶ್ ಮತ್ತು ಗೀತು ಮೋಹನ್‌ದಾಸ್ ಚಿತ್ರಕಥೆ ರಚಿಸಿದ್ದಾರೆ.

ಮಾನ್ಸ್ಟರ್ ಮೈಂಡ್ ಕ್ರಿಯೇಷನ್ಸ್ ಮತ್ತು ಕೆವಿಎನ್ ಪ್ರೊಡಕ್ಷನ್ಸ್ ನಿರ್ಮಿಸಿರುವ ಈ ಪ್ಯಾನ್-ಇಂಡಿಯಾ ಸಿನಿಮಾ ಕನ್ನಡ ಮತ್ತು ಇಂಗ್ಲಿಷ್‌ನಲ್ಲಿ ಚಿತ್ರೀಕರಣಗೊಂಡಿದ್ದು, ಹಿಂದಿ, ತಮಿಳು, ತೆಲುಗು ಮತ್ತು ಮಲಯಾಳಂ ಭಾಷೆಗಳಲ್ಲಿ ತೆರೆಕಾಣಲಿದೆ.

ಆಗಸ್ಟ್ 26ರಂದು ವಿಶ್ವಾದ್ಯಂತ ಬಿಡುಗಡೆಯಾಗಲಿರುವ ‘ಟಾಕ್ಸಿಕ್’ಗೆ ಮುಂಗಡ ಬುಕಿಂಗ್‌ನಲ್ಲೇ ಭರ್ಜರಿ ಬೇಡಿಕೆ ಸೃಷ್ಟಿಯಾಗಿರುವುದು ಚಿತ್ರತಂಡದ ಆತ್ಮವಿಶ್ವಾಸ ಹೆಚ್ಚಿಸಿದೆ. ಈಗ ಈ ಆರಂಭಿಕ ಕ್ರೇಜ್ ಥಿಯೇಟರ್ ಕಲೆಕ್ಷನ್‌ಗೆ ಎಷ್ಟರ ಮಟ್ಟಿಗೆ ಪರಿವರ್ತನೆಯಾಗಲಿದೆ ಎಂಬುದೇ ಕುತೂಹಲದ ಕೇಂದ್ರವಾಗಿದೆ.