ಮದುವೆ ಮುಗಿಸಿಕೊಂಡು ಬರುವಾಗ ಬೈಕ್ ಅಪಘಾತ; ಸವಾರ ಸ್ಥಳದಲ್ಲೇ ಸಾವು

ರಾಷ್ಟ್ರೀಯ ಹೆದ್ದಾರಿಯಲ್ಲಿ ಘಟನೆ…..

ವಿಜಯಸಾಕ್ಷಿ ಸುದ್ದಿ, ಗದಗ

ಸಂಬಂಧಿಕರ ಮದುವೆ ಮುಗಿಸಿಕೊಂಡು ಬೈಕ್ ನಲ್ಲಿ ವಾಪಾಸು ತನ್ನ ಊರಿಗೆ ಬರುವಾಗ ರಸ್ತೆಗೆ ಅಡ್ಡಲಾಗಿ ಇಟ್ಟಿದ್ದ ಶೈನ್ ಬೋರ್ಡ್ ಹಾಗೂ ರಿಪ್ಲೇಕ್ಟರ್ ಇರುವ ತಗಡಿಗೆ ಡಿಕ್ಕಿ ಹೊಡೆದ ಪರಿಣಾಮವಾಗಿ ಸವಾರ ಸ್ಥಳದಲ್ಲೇ ಮೃತಪಟ್ಟ ದಾರುಣ ಘಟನೆ ಜರುಗಿದೆ.

ಗದಗ ಜಿಲ್ಲೆಯ ಕೊಪ್ಪಳ ರಸ್ತೆಯ ಹಳ್ಳಿಕೇರಿ ಬಳಿಯ ರಾಷ್ಟ್ರೀಯ ಹೆದ್ದಾರಿ 67 ರಲ್ಲಿ ಈ ಘಟನೆ ನಡೆದಿದ್ದು, ಘಟನೆಯಲ್ಲಿ ಗದಗ ತಾಲೂಕಿನ ಅಡವಿಸೋಮಾಪೂರತಾಂಡಾದ ನಿವಾಸಿ ಪಾಂಡುರಂಗ ತಂದೆ ಲಚ್ಚಪ್ಪ ಲಮಾಣಿ (35) ಎಂಬಾತ ಮೃತಪಟ್ಟ ದುರ್ಧೈವಿ.

ಮೃತ ಪಾಂಡುರಂಗ ಹಾಗೂ ಕುಟುಂಬ ಸದಸ್ಯರು ಕೊಪ್ಪಳ ಜಿಲ್ಲೆಯ ಇರಕಲ್ ಗಡಾದಲ್ಲಿ ಸಂಬಂಧಿಕರ ಮದುವೆಗೆ ಹೋಗಿದ್ದರು. ಆದರೆ ಮದುವೆ ಮುಗಿದ ನಂತರ ಪಾಂಡುರಂಗ ತಾನೊಬ್ಬನೆ ಬೈಕ್ ನಲ್ಲಿ ವಾಪಾಸು ತನ್ನ ತಾಂಡಾಕ್ಕೆ ಬರುತ್ತಿದ್ದ ಎಂದು ಪೊಲೀಸರು ತಿಳಿಸಿದ್ದಾರೆ.

ಹಳ್ಳಿಕೇರಿ ಸಮೀಪ ರಸ್ತೆ ದುರಸ್ತಿಯಲ್ಲಿದೆ. ಆ ಕಾರಣಕ್ಕಾಗಿ ಅಲ್ಲಿ ಶೈನ್ ಬೋರ್ಡ್ ಹಾಗೂ ರಿಪ್ಲೇಕ್ಟರ್ ತಗಡು ಇಟ್ಟಿದ್ದರು ಎನ್ನಲಾಗಿದೆ.

ಈ ಕುರಿತು ಮುಂಡರಗಿ ಪೊಲೀಸ್ ಠಾಣೆಯಲ್ಲಿ 0142/2023 IPC 1860(U/s-279,304(A)) ಅಡಿಯಲ್ಲಿ ಪ್ರಕರಣ ದಾಖಲಾಗಿದೆ.