ಬೇಸಿಗೆಯಲ್ಲಿ ಉಷ್ಣತೆ ಹೆಚ್ಚಾಗುವುದರಿಂದ ದೇಹದಲ್ಲಿ ಬೆವರು ಹೆಚ್ಚಾಗಿ ಬರುತ್ತದೆ. ಇದರ ಪರಿಣಾಮವಾಗಿ ಕೆಲವರಿಗೆ ಮೈತುರಿಕೆ, ಬೆವರು ಸಾಲೆ ಮತ್ತು ದುರ್ವಾಸನೆ ಸಮಸ್ಯೆಗಳು ಕಾಣಿಸಿಕೊಳ್ಳುತ್ತವೆ.

ಈ ಬೆವರಿನ ವಾಸನೆಯಿಂದ ಅನೇಕರು ಮುಜುಗರಕ್ಕೊಳಗಾಗುವ ಸಂದರ್ಭವೂ ಉಂಟಾಗುತ್ತದೆ. ಪರ್‌ಫ್ಯೂಮ್‌ ಬಳಸಿದರೂ ಸಹ ಕೆಲವೊಮ್ಮೆ ಈ ಸಮಸ್ಯೆ ನಿವಾರಣೆಯಾಗದೇ ಇರುವುದು ಸಾಮಾನ್ಯವಾಗಿದೆ. ಆದರೆ ಕೆಲವು ಸರಳ ಆಹಾರ ಪದ್ಧತಿ ಮತ್ತು ಜೀವನಶೈಲಿಯನ್ನು ಅನುಸರಿಸುವ ಮೂಲಕ ಬೇಸಿಗೆಯಲ್ಲಿ ಬೆವರಿನ ದುರ್ವಾಸನೆಯನ್ನು ಕಡಿಮೆ ಮಾಡಿಕೊಳ್ಳಬಹುದು ಎಂದು ತಜ್ಞರು ಸಲಹೆ ನೀಡುತ್ತಾರೆ.

ಮೆಂತ್ಯ ಬೀಜಗಳನ್ನು ಕೆಲವು ಗಂಟೆಗಳ ಕಾಲ ನೀರಿನಲ್ಲಿ ನೆನೆಸಿ ಆ ನೀರನ್ನು ಕುಡಿಯುವುದರಿಂದ ದೇಹ ನಿರ್ವಿಷೀಕರಣಗೊಳ್ಳುತ್ತದೆ ಹಾಗೂ ಬೆವರಿನ ವಾಸನೆ ಕಡಿಮೆಯಾಗಲು ಸಹಾಯವಾಗುತ್ತದೆ. ಅಲ್ಲದೆ ನೀರಿನಾಂಶ ಹೆಚ್ಚಿರುವ ಕಲ್ಲಂಗಡಿ ಮತ್ತು ಸೌತೆಕಾಯಿ ಸೇವನೆಯು ದೇಹದಲ್ಲಿನ ಅನಗತ್ಯ ತ್ಯಾಜ್ಯಗಳನ್ನು ಹೊರಹಾಕಿ ಬೆವರು ವಾಸನೆ ಕಡಿಮೆ ಮಾಡಲು ನೆರವಾಗುತ್ತದೆ. ಕಿತ್ತಳೆ, ನಿಂಬೆಹಣ್ಣುಗಳಂತಹ ಸಿಟ್ರಿಕ್‌ ಆಮ್ಲವುಳ್ಳ ಹಣ್ಣುಗಳು ಹಾಗೂ ಕ್ಲೋರೊಫಿಲ್‌ ಸಮೃದ್ಧ ಹಸಿರು ತರಕಾರಿಗಳನ್ನು ಸೇವಿಸುವುದೂ ದೇಹವನ್ನು ದಿನವಿಡೀ ಫ್ರೆಶ್‌ ಆಗಿಡಲು ಸಹಕಾರಿಯಾಗಿದೆ.

ಇದೇ ವೇಳೆ ಬೇಸಿಗೆಯಲ್ಲಿ ಕೆಂಪು ಮಾಂಸ, ಈರುಳ್ಳಿ, ಬೆಳ್ಳುಳ್ಳಿ ಮತ್ತು ಆಲ್ಕೋಹಾಲ್‌ ಸೇವನೆಯನ್ನು ಸಾಧ್ಯವಾದಷ್ಟು ಕಡಿಮೆ ಮಾಡುವುದು ಉತ್ತಮ. ಇವುಗಳಲ್ಲಿ ಇರುವ ಸಲ್ಫರ್ ಅಂಶವು ಬೆವರಿನ ದುರ್ವಾಸನೆಯನ್ನು ಹೆಚ್ಚಿಸಬಹುದು. ಧೂಮಪಾನವೂ ದೇಹದ ದುರ್ವಾಸನೆಗೆ ಕಾರಣವಾಗುತ್ತದೆ ಎಂದು ತಜ್ಞರು ಎಚ್ಚರಿಕೆ ನೀಡುತ್ತಾರೆ. ಬಿಗಿಯಾದ ಸಿಂಥೆಟಿಕ್‌ ಬಟ್ಟೆಗಳ ಬದಲು ಸಡಿಲವಾದ ಹತ್ತಿ ಬಟ್ಟೆಗಳನ್ನು ಧರಿಸುವುದರಿಂದ ಬೆವರು ಕಡಿಮೆಯಾಗುತ್ತದೆ ಮತ್ತು ದೇಹಕ್ಕೆ ಗಾಳಿಯ ಹರಿವು ಸುಲಭವಾಗುತ್ತದೆ.

ಕಂಕುಳ, ಪಾದಗಳು ಹಾಗೂ ಕುತ್ತಿಗೆಯ ಭಾಗದಲ್ಲಿ ಹೆಚ್ಚು ಬೆವರುವುದರಿಂದ ಈ ಪ್ರದೇಶಗಳನ್ನು ನಿಯಮಿತವಾಗಿ ಸ್ವಚ್ಛಗೊಳಿಸುವುದು ಅಗತ್ಯ. ದಿನಕ್ಕೆ ಎರಡು ಬಾರಿ ಸ್ನಾನ ಮಾಡುವುದು, ಸಾಕಷ್ಟು ನೀರು ಕುಡಿಯುವುದು ಹಾಗೂ ಮಸಾಲೆಯುಕ್ತ ಮತ್ತು ಎಣ್ಣೆಯುಕ್ತ ಆಹಾರಗಳನ್ನು ಕಡಿಮೆ ಸೇವಿಸುವುದು ಕೂಡ ಬೇಸಿಗೆಯಲ್ಲಿ ಬೆವರಿನ ದುರ್ವಾಸನೆಯನ್ನು ತಡೆಯಲು ಸಹಾಯಕವಾಗುತ್ತದೆ ಎಂದು ಆರೋಗ್ಯ ತಜ್ಞರು ತಿಳಿಸಿದ್ದಾರೆ.