ನವದೆಹಲಿ: ರಾಷ್ಟ್ರ ರಾಜಧಾನಿ ದೆಹಲಿಯಲ್ಲಿ ವಾಯುಮಾಲಿನ್ಯ ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿದ್ದು, ಜನರು ವಿಷಕಾರಿ ಗಾಳಿಯನ್ನು ಉಸಿರಾಡುವ ಪರಿಸ್ಥಿತಿ ನಿರ್ಮಾಣವಾಗಿದೆ.
ದೀಪಾವಳಿ ಹಬ್ಬಕ್ಕೂ ಮುನ್ನವೇ ನಗರದ ಗಾಳಿಯ ಗುಣಮಟ್ಟ ಅತ್ಯಂತ ಕಳಪೆ ಮಟ್ಟಕ್ಕೆ ತಲುಪಿದೆ. ಸದ್ಯ ದೆಹಲಿಯ ಸರಾಸರಿ ವಾಯು ಗುಣಮಟ್ಟ ಸೂಚ್ಯಂಕ (AQI) 366 ದಾಖಲಾಗಿದ್ದು, ಆರೋಗ್ಯದ ಬಗ್ಗೆ ಆತಂಕ ಹೆಚ್ಚಾಗಿದೆ.
22 ಪ್ರದೇಶಗಳಲ್ಲಿ AQI 400ರ ಗಡಿ ದಾಟಿದೆ!
ದೆಹಲಿಯಾದ್ಯಂತ ವಾಯುಮಾಲಿನ್ಯದ ಪರಿಸ್ಥಿತಿ ಕಳವಳಕಾರಿಯಾಗಿದೆ. ನಗರದ 22 ಮೇಲ್ವಿಚಾರಣಾ ಕೇಂದ್ರಗಳಲ್ಲಿ AQI ಪ್ರಮಾಣ 400ರ ಗಡಿ ದಾಟಿದೆ. ಐಐಟಿ ಪ್ರದೇಶದಲ್ಲಿ ಗರಿಷ್ಠ 442 AQI ದಾಖಲಾಗಿದ್ದರೆ, ಪಂಜಾಬಿ ಬಾಗ್‌ನಲ್ಲಿ 433 ಹಾಗೂ ವಿವೇಕ್ ವಿಹಾರ್‌ನಲ್ಲಿ 427 ದಾಖಲಾಗಿದೆ.
ಇನ್ನು ಜಹಾಂಗೀರ್‌ಪುರಿಯಲ್ಲಿ 421, ರೋಹಿಣಿಯಲ್ಲಿ 418, ಬವಾನಾದಲ್ಲಿ 411, ಡಿಟಿಯುನಲ್ಲಿ 408, ನರೇಲಾದಲ್ಲಿ 408 ಹಾಗೂ ಅಲಿಪುರದಲ್ಲಿ 402 AQI ದಾಖಲಾಗಿದೆ.
NCR ನಗರಗಳಲ್ಲೂ ಕಳಪೆ ಗಾಳಿ!
ದೆಹಲಿಯ ನೆರೆಯ ನಗರಗಳಲ್ಲಿಯೂ ವಾಯುಮಾಲಿನ್ಯ ಹೆಚ್ಚಾಗಿದೆ. ನೋಯ್ಡಾದಲ್ಲಿ 284, ಗಾಜಿಯಾಬಾದ್‌ನಲ್ಲಿ 286, ಗುರುಗ್ರಾಮದಲ್ಲಿ 355 ಹಾಗೂ ಫರಿದಾಬಾದ್‌ನಲ್ಲಿ 347 AQI ದಾಖಲಾಗಿದೆ.
GRAP-III ನಿರ್ಬಂಧ ಜಾರಿ:
ವಾಯುಮಾಲಿನ್ಯ ನಿಯಂತ್ರಿಸುವ ಉದ್ದೇಶದಿಂದ ಗ್ರೇಡೆಡ್ ರೆಸ್ಪಾನ್ಸ್ ಆಕ್ಷನ್ ಪ್ಲಾನ್‌ನ ಮೂರನೇ ಹಂತದ ನಿರ್ಬಂಧಗಳನ್ನು ಜಾರಿಗೊಳಿಸಲಾಗಿದೆ. ಇದರ ಅಡಿಯಲ್ಲಿ ಅಗತ್ಯವಲ್ಲದ ಕಟ್ಟಡ ನಿರ್ಮಾಣ ಮತ್ತು ಕೆಡವುವ ಕಾಮಗಾರಿಗಳಿಗೆ ನಿಷೇಧ ಹೇರಲಾಗಿದೆ.
ಅಲ್ಲದೆ ಹಳೆಯ BS-III ಪೆಟ್ರೋಲ್ ಹಾಗೂ BS-IV ಡೀಸೆಲ್ ವಾಹನಗಳ ಸಂಚಾರಕ್ಕೆ ನಿರ್ಬಂಧ ವಿಧಿಸಲಾಗಿದೆ. ಕಲ್ಲು ಕ್ರಷರ್‌ಗಳನ್ನು ಮುಚ್ಚುವುದು ಮತ್ತು ಗಣಿಗಾರಿಕೆ ಚಟುವಟಿಕೆಗಳನ್ನು ಸ್ಥಗಿತಗೊಳಿಸುವ ಕ್ರಮಗಳನ್ನೂ ಕೈಗೊಳ್ಳಲಾಗಿದೆ.
ಆದರೆ ಇಷ್ಟೆಲ್ಲ ನಿರ್ಬಂಧಗಳ ನಡುವೆಯೂ ಮಾಲಿನ್ಯ ಮಟ್ಟದಲ್ಲಿ ಗಣನೀಯ ಸುಧಾರಣೆ ಕಂಡುಬಂದಿಲ್ಲ. ದೀಪಾವಳಿ ಹಬ್ಬದ ಹೊಸ್ತಿಲಲ್ಲೇ ದೆಹಲಿಯ ಗಾಳಿ ವಿಷವಾಗುತ್ತಿರುವುದು ಜನರಲ್ಲಿ ಆತಂಕ ಮೂಡಿಸಿದೆ.
