ವಿಜಯಸಾಕ್ಷಿ ಸುದ್ದಿ, ಗದಗ : ನಗರದ ಜಿಲ್ಲಾಡಳಿತ ಭವನದ ಮುಖ್ಯ ಸಭಾಂಗಣದಲ್ಲಿ ಲೋಕಾಯುಕ್ತ ಉಪನಿಬಂಧಕ ಅಮರ ನಾರಾಯಣ ಕೆ ಅವರಿಂದ ಸಾರ್ವಜನಿಕ ಅಹವಾಲು ಸ್ವೀಕಾರ, ಕುಂದುಕೊರತೆ, ದೂರು ವಿಚಾರಣೆ ಹಾಗೂ ಪ್ರಕರಣ ವಿಲೇವಾರಿ ಸಭೆ ಜರುಗಿತು.
ಗದಗ ನಗರದ ನಾಗೇಶ ಕುರಡಿಕೇರಿ ತಮ್ಮ ಮನೆಯ ಹತ್ತಿರ ಕೈಮಗ್ಗ ಯಂತ್ರವು ರಾತ್ರಿಯಿಡೀ ಚಾಲ್ತಿಯಲ್ಲಿರುವುದರಿಂದ ರಾತ್ರಿ ನೆಮ್ಮದಿಯಿಂದ ಇರಲಾಗುತ್ತಿಲ್ಲ ಎಂದು ದೂರು ನೀಡಿದರು. ಅದಕ್ಕೆ ಲೋಕಾಯುಕ್ತ ಉಪನಿಬಂಧಕರು ಜವಳಿ ಮತ್ತು ಕೈಮಗ್ಗ ಇಲಾಖೆಯ ಅಧಿಕಾರಿಗಳಿಗೆ ಸರ್ಕಾರದ ನಿಯಮದನ್ವಯ ರಾತ್ರಿ ಎಲ್ಲಿಯವರೆಗೆ ಯಂತ್ರ ಚಾಲಾಯಿಸಲು ಅವಕಾಶವಿದೆಯೋ ಅಲ್ಲಿಯವರಗೆ ಮಾತ್ರ ಅವಕಾಶ ಕಲ್ಪಿಸಿ ಎಂದು ಸೂಚಿಸಿದರು.
ಗದಗ ತಾಲೂಕಿನ ಬಸಾಪೂರ ಗ್ರಾಮದ ಹನುಮಂತ ವಡ್ಡರ ಅವರ ಮನೆ ಸುತ್ತಮುತ್ತ ಕಲ್ಲು ಒಡೆದು ಅಕ್ರಮವಾಗಿ ಗಣಿಗಾರಿಕೆ ಮಾಡುವುದರಿಂದ ಅಲ್ಲಿರುವ ಜನರಿಗೆ ತೊಂದರೆಯಾಗುತ್ತಿದೆ. ಈ ಕುರಿತು ಅನೇಕ ಬಾರಿ ಪೊಲೀಸ್ ಇಲಾಖೆಗೆ ದೂರು ನೀಡಿದರೂ ಕ್ರಮ ಕೈಗೊಂಡಿಲ್ಲ ಎಂದು ದೂರು ನೀಡಿದರು.
ಲೋಕಾಯುಕ್ತ ಉಪನಿಬಂಧಕರು, ಗಣಿ ಮತ್ತು ಭೂ ವಿಜ್ಞಾನ ಅಧಿಕಾರಿಗಳಿಗೆ ತಕ್ಷಣ ಸ್ಥಳ ಪರಿಶೀಲಿಸಿ ಅಂತಹ ಅಕ್ರಮ ಗಣಿಗಾರಿಕೆ ನಡೆಯದಂತೆ ಕ್ರಮ ತೆಗೆದುಕೊಳ್ಳಬೇಕು ಎಂದು ನಿರ್ದೇಶಿಸಿದರು.
ನಂತರ ಚಾಂದಸಾಬ ಕುತುದುದ್ದಿನ ಮುಳಗುಂದ, ಹಲವಾರು ಬಾರಿ ಮಾಹಿತಿ ಹಕ್ಕು ಅರ್ಜಿಯನ್ನು ಶಿರಹಟ್ಟಿಯ ಪಟ್ಟಣ ಪಂಚಾಯತಗೆ ನೀಡಿದ್ದು, ಯಾವುದೇ ರೀತಿಯ ಪ್ರತಿಕ್ರಿಯೆ ನೀಡಿಲ್ಲ ಎಂದು ದೂರು ನೀಡಿದರು. ಅದಕ್ಕೆ ಉಪನಿಬಂಧಕರು, ಈ ವಿಷಯವು ಮಾಹಿತಿ ಹಕ್ಕಿನ ಅಯೋಗಕ್ಕೆ ಸಂಬಂಧಿಸಿದ್ದು, ನಮ್ಮ ವ್ಯಾಪ್ತಿಗೆ ಬರುವುದಿಲ್ಲ. ಸರಿಯಾದ ಮಾಹಿತಿ ದೊರೆಯದಿದ್ದರೆ ಮೇಲ್ಮನವಿ ಹೋಗಲು ದೂರುದಾರನಿಗೆ ತಿಳಿಸಿದರು.
ಗದಗ ನಗರದ 35ನೇ ವಾರ್ಡಿನ ವಿಶ್ವೇಶ್ವರಯ್ಯ ನಗರದ ಕಾಶೀನಾಥ ಬೀಳಗಿಯವರು ತಮ್ಮ ವಾರ್ಡ್ನಲ್ಲಿ ಮೂಲಭೂತ ಸೌಕರ್ಯಗಳನ್ನು ಕಲ್ಪಿಸುವಂತೆ ಹಲವಾರು ಬಾರಿ ನಗರಸಭೆಗೆ ಮನವಿ ನೀಡಿದರೂ ಯಾವುದೇ ಪ್ರಯೋಜನವಾಗಿಲ್ಲ ಎಂದು ದೂರು ನೀಡಿದರು. ನಗರಸಭೆಯ ಪೌರಾಯುಕ್ತರಿಗೆ ದೂರನ್ನು ಗಂಭಿರವಾಗಿ ಪರಿಗಣಿಸಿ, ಆದಷ್ಟು ಬೇಗ ಮೂಲಭೂತ ಸೌಕರ್ಯಗಳನ್ನು ಕಲ್ಪಿಸಬೇಕೆಂದು ಸೂಚಿಸಿದರು.
ಹರ್ಲಾಪುರ ಗ್ರಾಮದ ಶಿವಾನಂದ ಪಟ್ಟೇದ ತಮ್ಮ ಗ್ರಾಮದಲ್ಲಿ ನಿರ್ಮಾಣವಾದ ವಸತಿ ನಿಲಯವು ಕ್ರಿಯಾಯೋಜನೆ ಹಾಗೆ ಕಾಮಗಾರಿ ನಡೆದಿಲ್ಲ ಎಂದು ಆರ್.ಡಿ.ಪಿ.ಆರ್ ಇಲಾಖೆಯ ಮೇಲೆ ದೂರು ನೀಡಿದರು. ಅದಕ್ಕೆ ಉಪನಿಬಂಧಕರು ಕಾಮಗಾರಿಯನ್ನು ಪರೀಶಿಲಿಸಿ ಪ್ರಾಥಮಿಕ ವರದಿ ನೀಡಲು ಸೂಚಿಸಿದರು.
ಗದಗ ನಗರದ ಪ್ರಕಾಶ ಕಲ್ಮನಿ, ಬಾಬು ಜಗಜೀವನರಾವ್ ಅಭಿವೃದ್ಧಿ ನಿಗಮದಿಂದ ಒಂದೇ ಸಮುದಾಯದವರಿಗೆ 250 ಮನೆಗಳನ್ನು ನೀಡಿದ್ದು, ಉಳಿದವರಿಗೆ ನೀಡಿಲ್ಲ ಎಂದು ದೂರು ನೀಡಿದರು.
ದೂರು ಆಲಿಸಿದ ಉಪನಿಬಂಧಕರು, ಬಾಬು ಜಗಜೀವನರಾವ್ ಅಭಿವೃದ್ಧಿ ನಿಗಮದ ವ್ಯವಸ್ಥಾಪಕರಿಗೆ ಪ್ರಕರಣ ಬಗ್ಗೆ ಸರಿಯಾಗಿ ಪರಿಶೀಲಿಸಿ ವರದಿ ನೀಡಲು ಆದೇಶಿಸಿದರು.
ಈ ಸಂದರ್ಭದಲ್ಲಿ ಉಪಲೋಕಾಯುಕ್ತರ ಆಪ್ತಕಾರ್ಯದರ್ಶಿ ಕಿರಣ ಪಿಎಂ ಪಾಟೀಲ, ಉಪವಿಭಾಗಾಧಿಕಾರಿ ವೆಂಕಟೇಶ ನಾಯ್ಕ ಸೇರಿದಂತೆ ಇತರೆ ಅಧಿಕಾರಿಗಳು ಇದ್ದರು.
ಹೀರೆಹಾಳ ಗ್ರಾಮದ ಶಂಕರಗೌಡ ವೀರಣ್ಣಗೌಡ ಅವರು ತಮ್ಮ ಊರಿನ ಸೊಸೈಟಿಯಲ್ಲಿ ರೈತರಿಗೆ ಸಾಲ ನೀಡುವಲ್ಲಿ ಅವ್ಯವಹಾರ ಮಾಡಿದ್ದು, ಯಾವುದೇ ರೀತಿಯ ಖಾತೆಗಳಾಗಲಿ, ಭದ್ರತಾ ಠೇವಣಿಗಳು ಇರುವುದಿಲ್ಲ ಎಂದು ದೂರು ನೀಡಿದರು. ಅದಕ್ಕೆ ಉಪನಿಬಂಧಕರು ಸಂಬಂಧಿಸಿದ ಅಧಿಕಾರಿಗಳಿಗೆ ಕೂಡಲೇ ಪರಿಶೀಲಿಸಿ ವರದಿ ನೀಡಬೇಕೆಂದು ಸೂಚಿಸಿದರು.
