ವಾಷಿಂಗ್ಟನ್: ಇರಾನ್ ಹಡಗುಗಳನ್ನು ವಶಪಡಿಸಿಕೊಂಡು ಬಳಸುವುದಕ್ಕಿಂತ ಅವುಗಳನ್ನು ಮುಳುಗಿಸುವುದೇ ಹೆಚ್ಚು ಮಜಾ ನೀಡುತ್ತದೆ ಎಂದು ಅಮೆರಿಕ ಸೇನೆಯ ಅಧಿಕಾರಿಗಳು ಹೇಳಿರುವುದಾಗಿ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ತಿಳಿಸಿದ್ದಾರೆ.
ಡೋರಲ್‌ನಲ್ಲಿ ನಡೆದ ನ್ಯಾಷನಲ್ ರಿಪಬ್ಲಿಕನ್ ಸಭೆಯಲ್ಲಿ ಮಾತನಾಡಿದ ಟ್ರಂಪ್, ಅಮೆರಿಕ ಮತ್ತು ಇಸ್ರೇಲ್ ನಡೆಸುತ್ತಿರುವ ‘ಆಪರೇಷನ್ ಎಪಿಕ್ ಫ್ಯೂರಿ’ ಕಾರ್ಯಾಚರಣೆಯಲ್ಲಿ ಇರಾನ್ ನೌಕಾಪಡೆಗೆ ಭಾರಿ ಹೊಡೆತ ಬಿದ್ದಿದೆ ಎಂದು ಹೇಳಿದರು.
ಅಮೆರಿಕ ನೌಕಾಪಡೆಯು ಕೇವಲ ಮೂರುವರೆ ದಿನಗಳಲ್ಲಿ ಇರಾನ್ ನೌಕಾಪಡೆಯ 46 ಹಡಗುಗಳನ್ನು ಮುಳುಗಿಸಿದೆ ಎಂದು ಅವರು ಮಾಹಿತಿ ಹಂಚಿಕೊಂಡರು.
ಈ ವೇಳೆ ಸೇನೆಯ ಅಧಿಕಾರಿಗಳೊಂದಿಗೆ ನಡೆದ ಸಂಭಾಷಣೆಯನ್ನೂ ಟ್ರಂಪ್ ವಿವರಿಸಿದರು. ಇರಾನ್ ಹಡಗುಗಳು ಉತ್ತಮ ಗುಣಮಟ್ಟದವು. ಅವುಗಳನ್ನು ವಶಪಡಿಸಿಕೊಂಡು ಬಳಸಬಹುದಿತ್ತು. ಏಕೆ ಮುಳುಗಿಸಿದ್ದೀರಿ ಎಂದು ನಾನು ಕೇಳಿದೆ ಎಂದು ಟ್ರಂಪ್ ಹೇಳಿದರು.
ಅದಕ್ಕೆ ಸೈನಿಕರು, ಅವುಗಳನ್ನು ಮುಳುಗಿಸುವುದೇ ಹೆಚ್ಚು ಮಜಾ ಕೊಡುತ್ತದೆ ಎಂದು ಉತ್ತರಿಸಿದ್ದಾರೆ ಎಂದು ಟ್ರಂಪ್ ತಿಳಿಸಿದ್ದಾರೆ. ಈ ಹೇಳಿಕೆ ಇದೀಗ ಚರ್ಚೆಗೆ ಕಾರಣವಾಗಿದೆ.
