ಅಸ್ಸಾಂ ಜನರ ಹೃದಯದ ಧ್ವನಿಯಾಗಿದ್ದ ಜುಬೀನ್ ಗರ್ಗ್ ನಿಧನ, ಕೇವಲ ಸೆಲೆಬ್ರಿಟಿ ಸಾವಲ್ಲ – ಅದು ಅಸ್ಸಾಂ ರಾಜ್ಯವನ್ನೇ ಶೋಕದಲ್ಲಿ ಮುಳುಗಿಸಿದ ಘಟನೆ. ಪುನೀತ್ ರಾಜ್‌ಕುಮಾರ್ ಅಗಲಿಕೆಯ ಬಳಿಕ ಕರ್ನಾಟಕದಲ್ಲಿ ಹೇಗೆ ಶೋಕಮಯ ವಾತಾವರಣ ನಿರ್ಮಾಣವಾಗಿತ್ತೋ, ಅದೇ ರೀತಿಯ ಭಾವನಾತ್ಮಕ ನಿರ್ವಾತ ಪರಿಸ್ಥಿತಿ ಜುಬೀನ್ ನಿಧನದ ನಂತರ ಅಸ್ಸಾಂನಲ್ಲಿ ನಿರ್ಮಾಣವಾಗಿತ್ತು.

ಆದರೆ ಜುಬೀನ್ ಸಾವು ಮೊದಲ ದಿನದಿಂದಲೇ ಅನುಮಾನಗಳಿಂದ ಆವರಿಸಿಕೊಂಡಿತ್ತು. ರಹಸ್ಯ, ಪ್ರಶ್ನೆಗಳು, ಸಂಶಯಗಳು – ಎಲ್ಲವೂ ಒಂದೊಂದಾಗಿ ಹೊರಬರುತ್ತಿದ್ದವು. ಇದೀಗ ಸಿಂಗಪುರ ಪೊಲೀಸ್ ತನಿಖೆಯ ಮೂಲಕ ಹಲವು ಅಂಶಗಳು ಬಹಿರಂಗಗೊಂಡಿವೆ.

ಘಟನೆ ನಡೆದಿದ್ದು ಸಿಂಗಪುರದ ಲಾಜುರಾಸ್ ದ್ವೀಪದ ಬಳಿ. ಜುಬೀನ್ ತಮ್ಮ ಮ್ಯಾನೇಜರ್ ಜೊತೆ ಬೋಟಿನಲ್ಲಿ ಪ್ರಯಾಣಿಸುತ್ತಿದ್ದರು. ನೀರಿಗೆ ಇಳಿಯುವ ಮೊದಲು ಅವರು ಲೈಫ್ ಜಾಕೆಟ್ ಹಾಕಿದ್ದರು. ಆದರೆ ಅದು ಅಸೌಕರ್ಯವಾಗಿದೆ ಎಂದು ಅದನ್ನು ತೆಗೆದರು. ಮತ್ತೊಂದು ಲೈಫ್ ಜಾಕೆಟ್ ಹಾಕುವಂತೆ ಹೇಳಿದರೂ ಅವರು ನಿರಾಕರಿಸಿದರು. ನಂತರ ನೀರಿಗೆ ಧುಮುಕಿ ಈಜಲು ಆರಂಭಿಸಿದರು.

ಆದರೆ ಕೆಲವೇ ನಿಮಿಷಗಳಲ್ಲಿ ಅವರ ದೇಹ ನೀರಿನ ಮೇಲೆ ಬೆನ್ನಿನ ಭಾಗ ಮೇಲಕ್ಕೆ ತೇಲಲು ಆರಂಭಿಸಿತು. ಗಾಬರಿಗೊಂಡ ಬೋಟಿನ ಸಿಬ್ಬಂದಿ ತಕ್ಷಣ ಅವರನ್ನು ಮೇಲಕ್ಕೆತ್ತಿ ಸಿಪಿಆರ್ ನೀಡಿದರು. ನಂತರ ಆಸ್ಪತ್ರೆಗೆ ದಾಖಲಿಸಿದರೂ, ಜೀವ ಉಳಿಸಲಾಗಲಿಲ್ಲ.

ಇಲ್ಲಿ ಬರುವ ದೊಡ್ಡ ಶಾಕ್ ಏನೆಂದರೆ – ಸಿಂಗಪುರ ಪೊಲೀಸರು ನೀಡಿದ ವರದಿ ಪ್ರಕಾರ, ಜುಬೀನ್ ನೀರಿಗೆ ಇಳಿಯುವ ಮುನ್ನ ಮದ್ಯ ಸೇವಿಸಿದ್ದರು. ರಕ್ತ ಪರೀಕ್ಷೆಯಲ್ಲಿ ಹೆಚ್ಚಿನ ಪ್ರಮಾಣದ ಆಲ್ಕೊಹಾಲ್ ಪತ್ತೆಯಾಗಿದೆ. ಜೊತೆಗೆ ಅವರಿಗೆ ಬಿಪಿ ಸಮಸ್ಯೆ ಮತ್ತು ಎಪಿಲೆಪ್ಸಿ ಎಂಬ ಆರೋಗ್ಯ ತೊಂದರೆ ಇದ್ದು, ಇವುಗಳ ಸಂಯೋಜನೆಯಿಂದಲೇ ಅವರು ಅಚಾನಕ ಸಾವನ್ನಪ್ಪಿರುವ ಸಾಧ್ಯತೆ ಹೆಚ್ಚು ಎಂದು ಪೊಲೀಸರು ಹೇಳಿದ್ದಾರೆ.

ಆದರೆ ಈ ವರದಿಯನ್ನು ಅಸ್ಸಾಂ ಸರ್ಕಾರ ಒಪ್ಪಿಕೊಳ್ಳಲು ಸಿದ್ಧವಿಲ್ಲ. ಪ್ರಕರಣ ಈಗ ರಾಜಕೀಯ ತಿರುವು ಪಡೆದುಕೊಂಡಿದೆ. ಮುಖ್ಯಮಂತ್ರಿ ಹಿಮಂತ್ ಬಿಸ್ವ ಶರ್ಮಾ, “ಇದು ಅಪಘಾತವಲ್ಲ, ಕೊಲೆ. ಸತ್ಯ ಹೊರತೆಗೆದೇ ತರುತ್ತೇವೆ” ಎಂದು ಬಹಿರಂಗವಾಗಿ ಹೇಳಿದ್ದಾರೆ.

ಇದರಿಂದಾಗಿ ಜನರಲ್ಲಿ ಮತ್ತಷ್ಟು ಅನುಮಾನ ಗಾಢವಾಗಿದೆ. ಸುಶಾಂತ್ ಸಿಂಗ್ ರಾಜ್‌ಪುತ್ ಸಾವನ್ನು ರಾಜಕೀಯ ಅಸ್ತ್ರವಾಗಿ ಬಳಸಿಕೊಂಡ ಮಾದರಿಯೇ ಈಗ ಜುಬೀನ್ ಗರ್ಗ್ ಪ್ರಕರಣದಲ್ಲೂ ನಡೆಯುತ್ತಿದೆಯೇ ಎಂಬ ಪ್ರಶ್ನೆ ತೀವ್ರವಾಗಿ ಕೇಳಿಬರುತ್ತಿದೆ.

ದಳಪತಿ ವಿಜಯ್ ಅಭಿಮಾನಿಗಳು ಕಾದು ಕುಳಿತಿದ್ದ ‘ಜನ ನಾಯಗನ್’ ಸಿನಿಮಾ ಸದ್ಯಕ್ಕೆ ಬಿಡುಗಡೆಯ ಕನಸೇ ದೂರವಾಗುತ್ತಿದೆ. ಜನವರಿ 09ರಂದು ಬಿಡುಗಡೆಯಾಗಬೇಕಿದ್ದ ಸಿನಿಮಾ, ಸೆನ್ಸಾರ್ ಮಂಡಳಿ ಪ್ರಮಾಣ ಪತ್ರ ನೀಡದೇ ಇರುವ ಕಾರಣದಿಂದಾಗಿ ಥಿಯೇಟರ್‌ಗಳಿಗೆ ಬರಲೇ ಇಲ್ಲ.

ಈ ವಿಚಾರದಿಂದ ಕೋಪಗೊಂಡ ನಿರ್ಮಾಪಕರು ನೇರವಾಗಿ ಮದ್ರಾಸ್ ಹೈಕೋರ್ಟ್ ಮೆಟ್ಟಿಲೇರಿದರು. ಹೈಕೋರ್ಟ್ ಆರಂಭದಲ್ಲಿ ಸಿನಿಮಾಕ್ಕೆ ಪ್ರಮಾಣ ಪತ್ರ ನೀಡಬೇಕು ಎಂದು ಆದೇಶ ನೀಡಿದ್ದು ವಿಜಯ್ ಅಭಿಮಾನಿಗಳಿಗೆ ಸ್ವಲ್ಪ ನಿಟ್ಟುಸಿರು ಕೊಟ್ಟಿತ್ತು. ಆದರೆ ಕೆಲವೇ ಗಂಟೆಗಳಲ್ಲಿ ಹೈಕೋರ್ಟ್ ತನ್ನದೇ ಆದೇಶಕ್ಕೆ ತಡೆ ನೀಡಿದ್ದು, ಚಿತ್ರತಂಡಕ್ಕೆ ದೊಡ್ಡ ಶಾಕ್ ನೀಡಿತು.

ಇದರಿಂದ ಬೇಸತ್ತ ತಂಡ ಸುಪ್ರೀಂಕೋರ್ಟ್‌ಗೆ ಅರ್ಜಿ ಸಲ್ಲಿಸಿತು. ಶೀಘ್ರವಾಗಿ ಪ್ರಮಾಣ ಪತ್ರ ಕೊಡಿಸುವಂತೆ ಮನವಿ ಮಾಡಿದರೂ, ಸುಪ್ರೀಂಕೋರ್ಟ್ ಪ್ರಕರಣವನ್ನು ಮದ್ರಾಸ್ ಹೈಕೋರ್ಟ್‌ನಲ್ಲಿಯೇ ಇತ್ಯರ್ಥ ಮಾಡಿಕೊಳ್ಳಿ ಎಂದು ಸೂಚಿಸಿದೆ. ಅಲ್ಲದೆ, ಈ ಅರ್ಜಿಯ ವಿಚಾರಣೆಯ ಬಗ್ಗೆ ನ್ಯಾಯಾಲಯಕ್ಕೆ ಆಸಕ್ತಿ ಇಲ್ಲ ಎಂಬ ಸ್ಪಷ್ಟ ಸಂದೇಶವೂ ನೀಡಲಾಗಿದೆ.

ಇದರಿಂದ ‘ಜನ ನಾಯಗನ್’ ಪ್ರಕರಣ ಮತ್ತೆ ಮದ್ರಾಸ್ ಹೈಕೋರ್ಟ್‌ಗೆ ವಾಪಸ್ ಬಂದು ತಲುಪಿದೆ. ಈಗಾಗಲೇ ಹೈಕೋರ್ಟ್ ಮುಂದಿನ ವಿಚಾರಣೆಯನ್ನು ಜನವರಿ 23ಕ್ಕೆ ನಿಗದಿಪಡಿಸಿದ್ದು, ಆ ದಿನ ಕೂಡ ಸ್ಪಷ್ಟ ಆದೇಶ ಹೊರಬರುವ ಬಗ್ಗೆ ಅನುಮಾನ ಮುಂದುವರಿದಿದೆ.

ಇದಕ್ಕಿಂತ ದೊಡ್ಡ ಆತಂಕ ಎಂದರೆ, ಇನ್ನೇನು ಕೆಲವೇ ತಿಂಗಳಲ್ಲಿ ತಮಿಳುನಾಡಿನಲ್ಲಿ ಚುನಾವಣಾ ಘೋಷಣೆ ಸಾಧ್ಯತೆ ಇದೆ. ಒಂದೊಮ್ಮೆ ಚುನಾವಣೆ ಘೋಷಣೆ ಆದರೆ, ಸ್ವತಃ ಸ್ಪರ್ಧಿ ಆಗಿರುವ ವಿಜಯ್ ಅವರ ಸಿನಿಮಾ ‘ಜನ ನಾಯಗನ್’ ಬಿಡುಗಡೆ ಆಗದೇ ಹೋಗುವ ಸಾಧ್ಯತೆ ಹೆಚ್ಚಿದೆ.

ಈ ಎಲ್ಲಾ ಬೆಳವಣಿಗೆಗಳ ಹಿನ್ನೆಲೆಯಲ್ಲಿ ವಿಜಯ್ ಅಭಿಮಾನಿಗಳಲ್ಲಿ ಅನುಮಾನ ಬಲವಾಗಿ ಕೇಳಿಬರುತ್ತಿದೆ. “ಸಿನಿಮಾ ಬಿಡುಗಡೆ ತಡೆಯಲು ಉದ್ದೇಶಿತ ಪಿತೂರಿ ನಡೆಯುತ್ತಿದೆ” ಎಂಬ ಆರೋಪಗಳು ಈಗಾಗಲೇ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿವೆ.