ಲಕ್ಷ್ಮೇಶ್ವರದಲ್ಲಿ ಸಭೆ ನಡೆಸಿ ಹೈಕಮಾಂಡ್‌ಗೆ ಸಂದೇಶ ರವಾನಿಸಿದ ಮುಖಂಡರು………
ವಿಜಯಸಾಕ್ಷಿ ಸುದ್ದಿ, ಲಕ್ಷ್ಮೇಶ್ವರ
ಕ್ಷೇತ್ರದ ಜನರ ವಿರೋಧದ ನಡುವೆಯೂ ಶಾಸಕ ರಾಮಣ್ಣ ಲಮಾಣಿಗೆ ಬಿಜೆಪಿ ಟಿಕೆಟ್ ಕೊಟ್ಟರೆ ಆಕಾಂಕ್ಷಿಗಳಲ್ಲಿ ಓರ್ವ ಸರ್ವಸಮ್ಮತ ಅಭ್ಯರ್ಥಿಯನ್ನು ಪಕ್ಷೇತರ ಅಭ್ಯರ್ಥಿಯಾಗಿ ಕಣಕ್ಕಿಳಿಸಿ ರಾಮಣ್ಣನನ್ನು ಸೋಲಿಸಿಯೇ ಸಿದ್ಧ ಎಂದು ಮಾಜಿ ಶಾಸಕ ಜಿ.ಎಂ ಮಹಾಂತಶೆಟ್ಟರ ಹೈಕಮಾಂಡ್‌ಗೆ ಸೂಚನೆ ರವಾನಿಸಿದರು.
ಅವರು ಭಾನುವಾರ ಪಟ್ಟಣದ ಜ.ವೀರಗಂಗಾಧರ ಸಮುದಾಯ ಭವನದಲ್ಲಿ ಪಕ್ಷದ ಟಿಕೆಟ್ ಬದಲಾವಣೆಗಾಗಿ ಅಭಿಪ್ರಾಯ ಸಂಗ್ರಹ ಮತ್ತು ಸ್ಪಷ್ಟ ತೀರ್ಮಾನ ಕೈಗೊಳ್ಳಲು ಕರೆದ ಪಕ್ಷದ ಮುಖಂಡರ, ಕಾರ್ಯಕರ್ತರ ಪೂರ್ವಭಾವಿ ಸಭೆಯಲ್ಲಿ ಮಾತನಾಡಿ, ಯಡಿಯೂರಪ್ಪರ ಬಳಿ ಹೋಗಿ ಟಿಕೆಟ್ ಕೊಡಿಸಿ ಗೆಲ್ಲಿಸಿದ ನನ್ನನ್ನೆ ಪಕ್ಷ ವಿರೋಧಿ ಚಟುವಟಿಕೆ ಮಾಡುತ್ತಿದ್ದಾರೆ ಪಕ್ಷದಿಂದ ಹೊರ ಹಾಕುವಂತೆ ಶಾಸಕ ಹೇಳುತ್ತಾರೆ. ಹೊರ ಹಾಕಲಿ ನನ್ನ ಶಕ್ತಿ ಏನೆಂದು ತೋರಿಸುತ್ತೇನೆ ಎಂದ ಅವರು ಶಾಸಕನಿಂದ ಕಾರ್ಯಕರ್ತರ ಕಡೆಗಣನೆಯಾಗಿದ್ದು ಕ್ಷೇತ್ರದ ಅಭಿವೃದ್ಧಿ ಮರೀಚಿಕೆಯಾಗಿದೆ, ಕುಟುಂಬ ರಾಜಕಾರಣದಿಂದ ಜನ ಬೇಸತ್ತಿದ್ದಾರೆ ಎಂದರು.
ಕಳೆದ ಅವಧಿಯಲ್ಲಿ ರಾಮಣ್ಣನ ಮುಖ ನೋಡಿ ಮತ ಹಾಕಿಲ್ಲ ಬದಲಾಗಿ ಮೋದಿ, ಯಡಿಯೂರಪ್ಪರಂತಹ ನಾಯಕರ ಮುಖ ಮತ್ತು ಪಕ್ಷ ನೋಡಿ ಗೆಲ್ಲಿಸಿದ್ದಾರೆ. ಶಿರಹಟ್ಟಿ ಮತಕ್ಷೇತ್ರದ ಜನತೆ ಮೊದಲಿನಿಂದಲೂ ಬಿಜೆಪಿ ಪರವಾಗಿದ್ದಾರೆ. ಕಾಂಗ್ರೆಸ್‌ನಲ್ಲಿಯೂ ಬಂಡಾಯ ಹೊಗೆಯಾಡುತ್ತಿದ್ದು ಕಾಂಗ್ರೆಸ್‌ನ ಒಂದು ಗುಂಪು ನಮ್ಮ ಸಂಪರ್ಕದಲ್ಲಿದ್ದಾರೆ. ಮೋದಿ ಅವರ ಶ್ರೇಷ್ಠವಾದ ಆಡಳಿತದಿಂದ ಪಕ್ಷದ ಪರ ಅಲೆ ಜೋರಾಗಿದ್ದರೂ ಕ್ಷೇತ್ರದ ಶಾಸಕರ ಬಗ್ಗೆ ವಿರೋಧದ ಅಲೆಯಿದೆ. ಆದಾಗ್ಯೂ ಅವರಿಗೆ ಟಿಕೆಟ್ ಕೊಟ್ಟರೆ ಪಕ್ಷದ ಸೋಲು ಶತಸಿದ್ಧ. ಎಲ್ಲರೂ ಒಗ್ಗಟ್ಟಿನಿಂದ ಆಕಾಂಕ್ಷಿಗಳಲ್ಲಿ ಓರ್ವ ಸರ್ವಸಮ್ಮತ ಅಭ್ಯರ್ಥಿ ನಿಲ್ಲಿಸಿ ಗೆಲ್ಲಿಸುತ್ತೇವೆ. ಮತ್ತೇ ಮೋದಿ ಕೈ ಬಲಪಡಿಸುತ್ತೇವೆ ಎಂದರು.
ಜಿಪಂ ಮಾಜಿ ಅಧ್ಯಕ್ಷ ವಿಶ್ವನಾಥ ಕಪ್ಪತ್ತನವರ, ಈಶ್ವರ ಹುಲ್ಲಲ್ಲಿ, ತಿಮ್ಮರಡ್ಡಿ ಅಳವಂಡಿ, ಬಸವರಾಜ ಪಲ್ಲೇದ, ಸೋಮಣ್ಣ ಡಾಣಗಲ್, ನಿಂಗಪ್ಪ ಬನ್ನಿ, ಎಂ.ಆರ್.ಪಾಟೀಲ, ಶಂಕರ ಮರಾಠೆ, ಶಂಕರ ಭಾವಿ ಸೇರಿ ಅನೇಕ ಮುಖಂಡರು ಮಾತನಾಡಿ, ಕಳೆದ ಚುನಾವಣೆಯಲ್ಲಿ ೩೦ ಸಾವಿರ ಮತಗಳ ಅಂತರದ ಗೆಲುವು ಸಾಧಿಸಿರುವುದನ್ನೇ ಪದೇ ಪದೇ ಹೇಳುವ ಇವರ ಮುಖ ನೋಡಿ ಜನ ಮತ ಹಾಕಿಲ್ಲ ಎಂಬುದನ್ನು ಅರಿತುಕೊಳ್ಳಬೇಕು.
ಒಮ್ಮೆಯೂ ವಿಧಾನಸಭೆಯಲ್ಲಿ ಕ್ಷೇತ್ರದ ಅಭಿವೃದ್ಧಿ ಕುರಿತು ಧ್ವನಿ ಎತ್ತಿಲ್ಲ. ಇವರ ನಿಷ್ಕಾಳಜಿಯಿಂದ ಕ್ಷೇತ್ರದ ಪಾಲಿನ ಕೋಟ್ಯಾಂತರ ರೂ ಅಭಿವೃದ್ಧಿ ಅನುದಾನವನ್ನು ಜಿಲ್ಲೆಯ ಉಳಿದ ಬಿಜೆಪಿ ಶಾಸಕರು ಪಡೆಯುತ್ತಿದ್ದಾರೆ. ಕ್ಷೇತ್ರದಲ್ಲಿ ಒಂದು ರಸ್ತೆ ಸರಿಯಿಲ್ಲ. ನೀರಾವರಿ, ವಸತಿ ಯೋಜನೆಗಳು ನೆನೆಗುದಿಗೆ ಬಿದ್ದಿವೆ. ಮೂಲಭೂತ ಸೌಲಭ್ಯಗಳಿಂದ ಜನ ರೋಷಿ ಹೋಗಿದ್ದಾರೆ. ಕಾರ್ಯಕರ್ತರು ಯಾರೆಂಬ ಅರಿವಿಲ್ಲ ಆದರೆ ಕಾಂಟ್ರಾಕ್ಟರ್‌ಗಳ ಬಗ್ಗೆ ಗೊತ್ತು. ಸದ್ಯ ಕ್ಷೇತ್ರದ ಜನತೆ ಬದಲಾವಣೆ ಬಯಸಿದ್ದಾರೆ. ಹೈಕಮಾಂಡ್ ಈ ಸತ್ಯ, ವಾಸ್ತವಾಂಶ ಅರಿತು ಬದಲಾವಣೆಗೆ ದಿಟ್ಟ ನಿರ್ಧಾರ ಕೈಗೊಳ್ಳದಿದ್ದರೆ ಬಂಡಾಯ ಅಭ್ಯರ್ಥಿ ನಿಲ್ಲಿಸಿ ಮತ್ತೆ ೩೦ ಸಾವಿರ ಮತಗಳ ಅಂತರದಿಂದ ಗೆಲ್ಲಿಸುವ ಸಂಕಲ್ಪ ಎಲ್ಲರದ್ದಾಗಿದೆ ಎಂದರು.
ಈ ವೇಳೆ ತಿಪ್ಪಣ್ಣ ಕೊಂಚಿಗೇರಿ, ದಯಾನಂದ ಕಂಠಿಗೌಡ್ರ, ಈಶ್ವರ ಲಮಾಣಿ, ನಿಂಗಪ್ಪ ಬನ್ನಿ, ಶ್ರೀನಿವಾಸ ಅಬ್ಬಿಗೇರಿ, ಶಂಕರ ಮರಾಠೆ, ನೀಲಪ್ಪ ಹತ್ತಿ, ಅಶೋಕ ಬಳ್ಳಾರಿ, ಮಲ್ಲಮ್ಮ ಹಿರೇಹಾಳ, ರಮೇಶ ಹುಳಕಣ್ಣವರ, ರಮೇಶ ಬಾಗೇವಾಡಿ, ಶಿವನಗೌಡ ಪಾಟೀಲ, ಶರೀಪಸಾಬ ಛಬ್ಬಿ, ಪ್ರಕಾಶ ಹಲವಾಗಲಿ, ಮಲ್ಲಮ್ಮ ಆನೆಪ್ಪನವರ, ರೇಣವ್ವ ಲಮಾಣಿ, ಅಪ್ಪಣ್ಣ ಕುಬೇರ, ಗುಡದಯ್ಯ, ಭೀಮಣ್ಣ ಸುಣ್ಣದಮನಿ, ವಿರುಪಾಕ್ಷಪ್ಪ ಮೇಣಿ ಸೇರಿದಂತೆ ಕಾರ್ಯಕರ್ತರು ಪಾಲ್ಗೊಂಡು ರಾಮಣ್ಣ ಲಮಾಣಿಯವರಿಗೆ ಟಿಕೆಟ್ ನೀಡದಂತೆ ಒಕ್ಕೂರಲಿನಿಂದ ಬೇಡಿಕೆ ಮಂಡಿಸಿದರು.
ಚುನಾವಣಾಧಿಕಾರಿಗಳು ಕೊಟ್ಟ ೨ ಗಂಟೆಗಳ ಕಾಲವಾಧಿಯಲ್ಲಿ ಸಭೆ ಮುಕ್ತಾಯಗೊಂಡಿತು.
