Locked House Monitoring System…….
ವಿಜಯಸಾಕ್ಷಿ ಸುದ್ದಿ, ಗದಗ
ಇತ್ತೀಚಿನ ದಿನಗಳಲ್ಲಿ ಕೀಲಿ ಹಾಕಿದ ಮನೆಗಳನ್ನು ಗುರಿಯಾಗಿಸಿಕೊಂಡು ಕಳ್ಳತನ ನಡೆಸುವ ಪ್ರಕರಣಗಳು ಹೆಚ್ಚುತ್ತಿದ್ದು, ಅಂತಹ ಮನೆಗಳ ಮೇಲೆ ಪೊಲೀಸರು ನಿಗಾವಹಿಸಲು ಅನುಕೂಲವಾಗಲೆಂದು ಹೊಸ ತಂತ್ರಾಂಶವನ್ನು ಅಭಿವೃದ್ಧಿಪಡಿಸಲಾಗಿದೆ.
ಪೊಲೀಸ್‌ ಇಲಾಖೆಯ ಹಾಗೂ ಸಾರ್ವಜನಿಕರ ಸಂಪರ್ಕ ಕೊಂಡಿಯಾಗಿ ಈ ತಂತ್ರಾಂಶ ಕಾರ್ಯನಿರ್ವಹಿಸಲಿದ್ದು, ಅತೀ ಶೀಘ್ರವಾಗಿ ಪೊಲೀಸರಿಗೆ ಕೀಲಿ ಹಾಕಿದ ಮನೆಗಳ ವಿವರ ದೊರಕುವಂತೆ ಮಾಡುವಲ್ಲಿ ಗದಗ ಜಿಲ್ಲಾ ಪೊಲೀಸ್‌ ಇಲಾಖೆ ಹೆಜ್ಜೆಯಿಟ್ಟಿದೆ.
ಸಾರ್ವಜನಿಕರು ಮನೆಗೆ ಬೀಗ ಹಾಕಿ ಬೇರೆ ಸ್ಥಳಗಳಿಗೆ ತೆರಳುವ ಸಂದರ್ಭದಲ್ಲಿ Locked House Monitoring System ಎಂಬ ತಂತ್ರಾಂಶದಲ್ಲಿ ವಿವರಗಳನ್ನು ಹಾಕಬಹುದಾಗಿದೆ.
ಇದರಿಂದ ಪೊಲೀಸರಿಗೆ ಕೀಲಿ ಹಾಕಿದ ಮನೆಗಳ ವಿವರ ಸರಳವಾಗಿ ಲಭ್ಯವಾಗಲಿದ್ದು, ಅಂಥ ಮನೆಗಳ ಮೇಲೆ ನಿಗಾವಹಿಸಲು ಅನುಕೂಲವಾಗಲಿದೆ. Locked House Monitoring System ಉಪಯೋಗಿಸಲು 9480021100 ಸಂಖ್ಯೆಗೆ ವಾಟ್ಸಪ್‌ನಲ್ಲಿ ʻHelpʼ ಎಂದು ಸಂದೇಶ ಕಳುಹಿಸಿದಾಗ Locked House Monitoring Systemನ ಲಿಂಕ್‌ ಬರುತ್ತದೆ.
ಅದರಲ್ಲಿ ಕೀಲಿ ಹಾಕಿದ ಮನೆಯ ವಿವರಗಳನ್ನು ಸಲ್ಲಿಸಬಹುದು. ಈ ಹೊಸ ಸೌಲಭ್ಯದ ಪ್ರಯೋಜನವನ್ನು ಸಾರ್ವಜನಿಕರು ಪಡೆದುಕೊಳ್ಳುವಂತೆ ಗದಗ ಜಿಲ್ಲಾ ಪೊಲೀಸ್‌ ಕಾರ್ಯಾಲಯದ ಪ್ರಕಟಣೆ ತಿಳಿಸಿದೆ.
ಅಂತೆಯೇ ಸಿಇಐಆರ್‌ ಪೋರ್ಟಲ್‌ ಸಹಾಯದಿಂದ ವಿವಿಧ ಕಂಪನಿಗಳ 2,02,196 ರೂ ಮೌಲ್ಯದ ಒಟ್ಟೂ 14 ಮೊಬೈಲ್‌ ಫೋನ್‌ಗಳನ್ನು ಜಪ್ತ ಮಾಡಿ, ಮೊಬೈಲ್‌ ಮಾಲಕರಿಗೆ ಮರಳಿ ನೀಡಲಾಗಿದೆ ಎಂದು ಪ್ರಕಟಣೆ ತಿಳಿಸಿದೆ.
