ಸಣ್ಣ ಅಂಗಡಿಯಿಂದ ಉದ್ಯಮ ಸಾಮ್ರಾಜ್ಯದವರೆಗೆ…!

ಒಂದು ಸಣ್ಣ ಅಂಗಡಿ… ಅಲ್ಪ ಬಂಡವಾಳ… ಆದರೆ ದೊಡ್ಡ ಕನಸು. ಅಲ್ಲಿಂದ ಆರಂಭವಾದ ವ್ಯಾಪಾರ ಇಂದು ಸಂಸ್ಕರಣಾ ಘಟಕ, ಬೃಹತ್ ಮಳಿಗೆ, ಉತ್ಪಾದನಾ ಘಟಕ ಹಾಗೂ ನೂರಾರು ಜನರಿಗೆ ಉದ್ಯೋಗ ನೀಡುವ ಉದ್ಯಮವಾಗಿ ಬೆಳೆದಿದೆ. ಮತ್ತೊಂದೆಡೆ ಪಾರಂಪರಿಕ ವೃತ್ತಿಯನ್ನು ಉದ್ಯಮವನ್ನಾಗಿ ಬೆಳೆಸಿದವರು, ಉದ್ಯೋಗದಿಂದ ಉದ್ಯಮದತ್ತ ಹೆಜ್ಜೆ ಹಾಕಿದವರು, ವ್ಯಾಪಾರದ ಜತೆಗೆ ಸಮಾಜ ಸೇವೆಯನ್ನೂ ತಮ್ಮ ಕರ್ತವ್ಯವೆಂದು ಪರಿಗಣಿಸಿದವರು…

ಇಂತಹ ಪರಿಶ್ರಮ, ಪ್ರಾಮಾಣಿಕತೆ, ಉದ್ಯಮಶೀಲತೆ ಹಾಗೂ ಸಾಮಾಜಿಕ ಕಾಳಜಿಯ ಮೂಲಕ ಸಾಧನೆ ಮಾಡಿದ ಮಹನೀಯರಿಗೆ ಗದಗ ಉತ್ಸವ–೨೦೨೬ ಗೌರವದ ವೇದಿಕೆಯಾಗುತ್ತಿದೆ.

ಗದಗ ಜಿಲ್ಲಾ ವಾಣಿಜ್ಯೋದ್ಯಮ ಸಂಸ್ಥೆಯ ವತಿಯಿಂದ ಆಗಸ್ಟ್ ೧೬ರಂದು ಶ್ರೇಷ್ಠ ಉದ್ಯಮಿ, ಶ್ರೇಷ್ಠ ವರ್ತಕ ಸೇರಿದಂತೆ ವಿವಿಧ ಕ್ಷೇತ್ರಗಳಲ್ಲಿ ಸಾಧನೆ ಮಾಡಿದವರನ್ನು ಸನ್ಮಾನಿಸಲಾಗುತ್ತಿದೆ. ಈ ಸಾಧಕರ ಯಶೋಗಾಥೆ ಕೇವಲ ವ್ಯಾಪಾರದ ಕಥೆಯಲ್ಲ, ಇದು ಗದಗದ ಉದ್ಯಮಶೀಲತೆಯ ಬೆಳವಣಿಗೆಯ ಕಥೆಯೂ ಹೌದು.

*೨೦ನೇ ವಯಸ್ಸಿನಲ್ಲಿ ಆರಂಭವಾದ ಉದ್ಯಮದ ಪಯಣ*

ಕುಮಾರ ವಿ. ಘಟ್ಟದ ಅವರು ೧೯೮೧ರಲ್ಲಿ ತಮ್ಮ ೨೦ನೇ ವಯಸ್ಸಿನಲ್ಲಿ ಅಲ್ಪ ಬಂಡವಾಳದೊಂದಿಗೆ ಆರಂಭಿಸಿದ ಜಿ.ವಿ. ಘಟ್ಟದ ಟ್ರೇಡರ್ಸ್ ಇಂದು ಗದುಗಿನ ಹೆಮ್ಮೆಯ ಸಂಸ್ಥೆಯಾಗಿ ಬೆಳೆದಿದೆ. ರಸ್ತೆ ಬದಿಯ ಸಣ್ಣ ಅಂಗಡಿಯಿಂದ ಆರಂಭವಾದ ವ್ಯಾಪಾರ, ಇಂದು ಸ್ವಂತ ಸಂಸ್ಕರಣಾ ಘಟಕ ಹೊಂದುವ ಮಟ್ಟಕ್ಕೆ ಬೆಳೆದಿದೆ.

ವ್ಯಾಪಾರದಿಂದ ಸಂಸ್ಕರಣೆಯತ್ತ ಹೆಜ್ಜೆ ಇಟ್ಟು, ರೈತರಿಂದ ನೇರವಾಗಿ ಉತ್ಪನ್ನ ಖರೀದಿಸಿ ಮೌಲ್ಯವರ್ಧನೆ ಮಾಡುತ್ತಿರುವುದು ಸಂಸ್ಥೆಯ ಪ್ರಮುಖ ಸಾಧನೆ. ಪ್ರಾಮಾಣಿಕತೆ, ನೈತಿಕತೆ ಮತ್ತು ‘ಕಾಯಕವೇ ಕೈಲಾಸ’ ಎಂಬ ದೃಢ ನಂಬಿಕೆಯೊಂದಿಗೆ ಲಾಭದ ಜತೆಗೆ ಸಂಬಂಧಗಳಿಗೂ ಬೆಲೆ ನೀಡಿರುವ ಅವರು ಸಮಾಜ ಸೇವೆಯಲ್ಲೂ ತೊಡಗಿಸಿಕೊಂಡಿದ್ದಾರೆ.

*ತಂದೆಯ ಅಂಗಡಿಯಿಂದ ವಿಶ್ವಾಸದ ಮಳಿಗೆಯವರೆಗೆ*

ಸುರೇಶಕುಮಾರ ರಾಜಮಲ್ ಓಸ್ವಾಲ್ ಅವರು ೪೫ ವರ್ಷಕ್ಕೂ ಹೆಚ್ಚು ಕಾಲ ಬಟ್ಟೆ ವ್ಯಾಪಾರದಲ್ಲಿ ಅನುಭವ ಹೊಂದಿದ್ದಾರೆ. ತಂದೆ ಆರಂಭಿಸಿದ ಓಸ್ವಾಲ್ ಸೀರೆ ಅಂಗಡಿಯ ಜವಾಬ್ದಾರಿ ಹೊತ್ತು, ಅದನ್ನು ಇಂದು ‘ಓಸ್ವಾಲ್ ಕಲೆಕ್ಷನ್’ ಎಂಬ ವಿಶ್ವಾಸಾರ್ಹ ಬಟ್ಟೆ ಮಳಿಗೆಯಾಗಿ ಬೆಳೆಸಿದ್ದಾರೆ.

ಮಹಿಳೆಯರು, ಪುರುಷರು ಮತ್ತು ಮಕ್ಕಳ ಎಥ್ನಿಕ್ ವೇರ್ ಹಾಗೂ ಪ್ರೀಮಿಯಂ ಬ್ರಾಂಡ್‌ಗಳಿಗೆ ಒಂದೇ ಸೂರಿನಡಿ ತಾಣವಾಗಿರುವ ಸಂಸ್ಥೆ ೫೦ಕ್ಕೂ ಹೆಚ್ಚು ಜನರಿಗೆ ಉದ್ಯೋಗ ನೀಡುತ್ತಿದೆ. ೨೦೨೪ರಲ್ಲಿ ಎರಡನೇ ಶಾಖೆಯನ್ನೂ ಆರಂಭಿಸಿದ್ದಾರೆ. ರಕ್ತದಾನ ಶಿಬಿರ, ಬಡ ಮಕ್ಕಳ ಶಿಕ್ಷಣಕ್ಕೆ ನೆರವು ಹಾಗೂ ವಿಧವಾ ಮಹಿಳೆಯರ ಸ್ವಾವಲಂಬನೆಗೆ ಆರ್ಥಿಕ ಸಹಾಯದ ಮೂಲಕ ಸಮಾಜ ಸೇವೆಯಲ್ಲೂ ಗುರುತಿಸಿಕೊಂಡಿದ್ದಾರೆ.

*ಹತ್ತಿ ವ್ಯಾಪಾರದಿಂದ ಉದ್ಯಮದ ಗುರುತು*

ಬಸಪ್ಪ ಸಿದ್ದಪ್ಪ ಶೆಟ್ಟಿಕೇರಿ ಅವರು ಉದ್ಯೋಗದಿಂದ ಉದ್ಯಮದತ್ತ ಹೆಜ್ಜೆ ಹಾಕಿದವರು. ಭಾರತೀಯ ಹತ್ತಿ ನಿಗಮದಲ್ಲಿ ಐದು ವರ್ಷ ಸೇವೆ ಸಲ್ಲಿಸಿದ ಬಳಿಕ, ಮಾರ್ಗದರ್ಶನ ಪಡೆದು ೧೯೮೪ರಲ್ಲಿ ಎಸ್. ಶೆಟ್ಟಿಕೇರಿ ಅಂಡ್ ಕಂಪನಿ ಸ್ಥಾಪಿಸಿ ಹತ್ತಿ ಅರಳಿ ವ್ಯಾಪಾರ ಆರಂಭಿಸಿದರು. ನಂತರದ ವರ್ಷಗಳಲ್ಲಿ ಹತ್ತಿ ಉದ್ಯಮದಲ್ಲಿ ತಮ್ಮದೇ ಆದ ಸ್ಥಾನ ಗಳಿಸಿದ್ದಾರೆ.

ಸಂಗಮೇಶ ಕೆ. ಗೌರಿಮಠ ಅವರು ದ್ವಿತೀಯ ಪಿಯುಸಿವರೆಗೆ ಶಿಕ್ಷಣ ಪಡೆದರೂ ಸ್ವಂತ ಪರಿಶ್ರಮದಿಂದ ಉದ್ಯಮ ಕ್ಷೇತ್ರದಲ್ಲಿ ಗಮನಾರ್ಹ ಸಾಧನೆ ಮಾಡಿದ್ದಾರೆ. ಹೊಳೆಆಲೂರು ಹಾಗೂ ಶಿರೋಳದಲ್ಲಿ ಏಳು ಸಂಸ್ಥೆಗಳನ್ನು ನಡೆಸುತ್ತಿದ್ದು, ಆಟೋಮೊಬೈಲ್ಸ್, ಮೋಟಾರ್ಸ್, ಟ್ರೇಡರ್ಸ್ ಹಾಗೂ ಅರ್ಥ್ ಮೂವರ್ಸ್ ಕ್ಷೇತ್ರಗಳಲ್ಲಿ ಉದ್ಯಮ ವಿಸ್ತರಿಸಿದ್ದಾರೆ. ಈ ಸಂಸ್ಥೆಗಳ ಮೂಲಕ ನೂರಾರು ಜನರಿಗೆ ಉದ್ಯೋಗ ದೊರೆತಿದೆ.

*ಪಾರಂಪರಿಕ ನೇಕಾರಿಕೆಯಿಂದ ಉದ್ಯಮದತ್ತ*

ವೀರಣ್ಣ ಹಾಲಪ್ಪ ಪವಾಡದ ಅವರು ಶಿಗ್ಲಿ ಗ್ರಾಮದ ಪಾರಂಪರಿಕ ನೇಕಾರ ಕುಟುಂಬದ ಹಿನ್ನೆಲೆಯಿಂದ ಬಂದವರು. ನೇಕಾರಿಕೆ ವೃತ್ತಿಯನ್ನು ಮುಂದುವರಿಸಿಕೊಂಡು ಶ್ರೀ ರಂಭಾಪುರಿ ಟೆಕ್ಸ್ಟೈಲ್ಸ್ ಮೂಲಕ ನೇಕಾರ ಸಮುದಾಯಕ್ಕೆ ಉದ್ಯೋಗ ಕಲ್ಪಿಸಿದ್ದಾರೆ. ಶ್ರೀ ಅನ್ನದಾನೇಶ್ವರ ಆಗ್ರೋ ಟ್ರೇಡರ್ಸ್ ಮೂಲಕ ರೈತಪರ ಸೇವೆಯಲ್ಲೂ ತೊಡಗಿಸಿಕೊಂಡಿದ್ದಾರೆ.

ಈರಣ್ಣ ಸಂಗಪ್ಪ ಸೊನ್ನದ ಅವರು ಗಜೇಂದ್ರಗಡದಲ್ಲಿ ವ್ಯಾಪಾರ ಕ್ಷೇತ್ರದಲ್ಲಿ ತಮ್ಮದೇ ಛಾಪು ಮೂಡಿಸಿದ್ದಾರೆ. ೧೯೭೬ರಲ್ಲಿ ಎಂ.ವಿ. ಸೊನ್ನದ್ & ಕಂಪನಿ ಹೆಸರಿನಲ್ಲಿ ದಲಾಲಿ ಅಂಗಡಿ ಆರಂಭಿಸಿ, ೧೯೯೨ರಲ್ಲಿ ವಿಜಯ ಆಯಿಲ್ ಮಿಲ್ ಸ್ಥಾಪಿಸುವ ಮೂಲಕ ಉದ್ಯಮ ವಿಸ್ತರಿಸಿದ್ದಾರೆ. ಕುಟುಂಬದ ಸದಸ್ಯರ ಸಹಕಾರದೊಂದಿಗೆ ಉದ್ಯಮವನ್ನು ಮುಂದುವರಿಸಿಕೊಂಡು ಬಂದಿದ್ದಾರೆ.

*ಮುಂಡರಗಿಯಲ್ಲಿ ವ್ಯಾಪಾರದ ವಿಶ್ವಾಸದ ಹೆಸರು*

ರಾಜಸ್ಥಾನದ ಜಾಲೋರ್ ಜಿಲ್ಲೆಯ ಬಾದರಾಜೋನ್ ಗ್ರಾಮದವರಾದ ಗೌತಮ್‌ಚಂದ್ ಮೇಘರಾಜ್ ಚೋಪ್ರಾ ಅವರು ೧೯೮೦ರಲ್ಲಿ ಸಹೋದರ ರೂಪಚಂದ್ ಜೈನ್ ಅವರೊಂದಿಗೆ ಮುಂಡರಗಿಗೆ ಬಂದು ‘ಗೌತಮ್ ಕಿರಾಣಿ ಸ್ಟೋರ್’ ಮೂಲಕ ವ್ಯಾಪಾರ ಆರಂಭಿಸಿದರು.

೧೯೯೦ರಲ್ಲಿ ರಾಮದೇವ ಕಿರಾಣಿ ಸ್ಟೋರ್, ೧೯೯೭ರಲ್ಲಿ ಎಪಿಎಂಸಿಯಲ್ಲಿ ರಾಮದೇವ ಟ್ರೇಡಿಂಗ್ ಕಂಪನಿ ಹಾಗೂ ೨೦೨೧ರಲ್ಲಿ ಗೌತಮ್ ಟ್ರೇಡಿಂಗ್ ಕಂಪನಿ ಸ್ಥಾಪಿಸಿ ಯಶಸ್ವಿ ವರ್ತಕರಾಗಿ ಬೆಳೆದಿದ್ದಾರೆ. ಎಪಿಎಂಸಿ ವರ್ತಕರ ಸಂಘದ ಉಪಾಧ್ಯಕ್ಷರಾಗಿಯೂ ಸೇವೆ ಸಲ್ಲಿಸುತ್ತಿದ್ದಾರೆ. ರಾಜಸ್ಥಾನ ಮೂಲದವರಾದರೂ ಕನ್ನಡದಲ್ಲೇ ವ್ಯವಹರಿಸುವ ಅವರ ಕನ್ನಡಪರ ನಿಲುವಿಗೆ ವಿವಿಧ ಕನ್ನಡಪರ ಸಂಘಟನೆಗಳಿಂದ ಗೌರವ ದೊರೆತಿದೆ.

*ಉದ್ಯಮದ ಜತೆಗೆ ಮಹಿಳಾ ಸೇವೆ*

ನಿರ್ಮಲಾ ದಶರಥರಾಜ ಕೊಳ್ಳಿ ಅವರು ವಾಣಿಜ್ಯೋದ್ಯಮ ಹಾಗೂ ಸಮಾಜ ಸೇವೆಯಲ್ಲಿ ಗುರುತಿಸಿಕೊಂಡಿದ್ದಾರೆ. ರಾಷ್ಟ್ರ ಸೇವಿಕಾ ಸಮಿತಿಯ ಸದಸ್ಯೆಯಾಗಿ ಹಾಗೂ ಗದಗ ಜಿಲ್ಲಾ ವಾಣಿಜ್ಯ ಮತ್ತು ಕೈಗಾರಿಕಾ ಸಂಘದ ಮಹಿಳಾ ವಿಭಾಗದಲ್ಲಿ ಕಳೆದ ನಾಲ್ಕು ವರ್ಷಗಳಿಂದ ಸೇವೆ ಸಲ್ಲಿಸುತ್ತಿದ್ದಾರೆ.

*ಯುವ ಉದ್ಯಮಿಗಳಿಗೂ ವಿಶೇಷ ಗೌರವ*

ಈ ಬಾರಿ ಅನುಭವಿಗಳ ಜತೆಗೆ ಹೊಸ ತಲೆಮಾರಿನ ಉದ್ಯಮಶೀಲತೆಗೂ ಗೌರವ ನೀಡಲಾಗುತ್ತಿದೆ.

ವಿಜಯಕುಮಾರ ಮೇಗೂರು ಅವರು ಧಾನ್ಯ ಸಂಸ್ಕರಣಾ ಯಂತ್ರೋಪಕರಣಗಳ ತಯಾರಿಕೆ ಹಾಗೂ ತಂತ್ರಜ್ಞಾನ ಕ್ಷೇತ್ರದಲ್ಲಿ ಗಮನಾರ್ಹ ಸಾಧನೆ ಮಾಡಿದ್ದಾರೆ. ೨೦೧೧ರಲ್ಲಿ ಕಾರಟಗಿಯಲ್ಲಿ ಸಣ್ಣ ಮಟ್ಟದಲ್ಲಿ ವ್ಯಾಪಾರ ಆರಂಭಿಸಿ, ೨೦೧೬ರಲ್ಲಿ ಬೆಂಗಳೂರಿನಲ್ಲಿ ಉತ್ಪಾದನಾ ಉದ್ಯಮ ಸ್ಥಾಪಿಸಿದರು. ೨೦೨೫ರಲ್ಲಿ ಕಾರಟಗಿಯಲ್ಲೇ ಅತ್ಯಾಧುನಿಕ ತಂತ್ರಜ್ಞಾನವುಳ್ಳ ಬೃಹತ್ ಉತ್ಪಾದನಾ ಘಟಕ ಆರಂಭಿಸಿದ್ದಾರೆ. ಸ್ಥಳೀಯ ಯುವಕರಿಗೆ ಉದ್ಯೋಗ ಕಲ್ಪಿಸುವ ಜತೆಗೆ ‘ಮೇಕ್ ಇನ್ ಇಂಡಿಯಾ’ ಪರಿಕಲ್ಪನೆಗೆ ಬಲ ತುಂಬುತ್ತಿದ್ದಾರೆ.

ಹರ್ಷದ್ ಅಯೂಬ್ ಖಾಜಿ ಅವರು ಮೆಕ್ಯಾನಿಕಲ್ ಡಿಸೈನ್ ಇಂಜಿನಿಯರ್ ಆಗಿ ಸುಮಾರು ಆರು ವರ್ಷ ಅನುಭವ ಪಡೆದ ಬಳಿಕ ೨೦೨೨ರಲ್ಲಿ ಸ್ವಂತ ಕಂಪನಿ ಆರಂಭಿಸಿದರು. ಅಲ್ಪಾವಧಿಯಲ್ಲೇ ದೇಶ-ವಿದೇಶಗಳಲ್ಲಿ ಗುರುತಿಸಿಕೊಂಡಿರುವ ಸಂಸ್ಥೆ, ಏರೋಸ್ಪೇಸ್ ಹಾಗೂ ರಕ್ಷಣಾ ಕೈಗಾರಿಕೆಗಳಿಗೆ ಕಾಂಟ್ರ್ಯಾಕ್ಟ್ ಮ್ಯಾನುಫ್ಯಾಕ್ಚರರ್ ಆಗಿ ಬಿಡಿಭಾಗಗಳನ್ನು ತಯಾರಿಸಿ ಪೂರೈಸುತ್ತಿದೆ. ಗದಗದಿಂದ ರಾಷ್ಟ್ರೀಯ ಹಾಗೂ ಅಂತರರಾಷ್ಟ್ರೀಯ ಮಟ್ಟದಲ್ಲಿ ಗುರುತಿಸಿಕೊಂಡಿರುವ ಅವರ ಸಾಧನೆ ಯುವ ಇಂಜಿನಿಯರ್‌ಗಳಿಗೆ ಸ್ಫೂರ್ತಿಯಾಗಿದೆ.

ಸುವರ್ಣ ಮದರಿಮಠ ಅವರು ‘ನಾರಿ ಸಮ್ಮಾನ’ ಪ್ರಶಸ್ತಿಗೆ ಪುರಸ್ಕೃತರಾಗಿದ್ದು, ಇದೇ ಸಂದರ್ಭದಲ್ಲಿ ಅವರನ್ನು ಸಹ ಸನ್ಮಾನಿಸಲಾಗುತ್ತಿದೆ.

ಗದಗ ಉತ್ಸವ–೨೦೨೬ರ ಗೌರವದ ವೇದಿಕೆಯಲ್ಲಿ

ಶ್ರೇಷ್ಠ ಉದ್ಯಮಿ: ಕುಮಾರ ವಿ. ಘಟ್ಟದ
ಶ್ರೇಷ್ಠ ವರ್ತಕ: ಸುರೇಶಕುಮಾರ ರಾಜಮಲ್ ಓಸ್ವಾಲ್
ಗೌರವ ಪುರಸ್ಕೃತರು: ಬಸಪ್ಪ ಶೆಟ್ಟಿಕೇರಿ, ಸಂಗಮೇಶ ಗೌರಿಮಠ, ಈರಣ್ಣ ಸೊನ್ನದ, ವೀರಣ್ಣ ಪವಾಡದ, ಗೌತಮ್ ಚೋಪ್ರಾ, ನಿರ್ಮಲಾ ಕೊಳ್ಳಿ
ವಿಶೇಷ ಸನ್ಮಾನ: ವಿಜಯಕುಮಾರ ಮೇಗೂರು, ಹರ್ಷದ್ ಖಾಜಿ, ಸುವರ್ಣ ಮದರಿಮಠ»

*ಸಾಧನೆಯ ಹಿಂದೆ ಸಮಾಜದ ನಂಟು*

ಈ ಸಾಧಕರ ಯಶೋಗಾಥೆಗಳನ್ನು ಗಮನಿಸಿದರೆ ಪ್ರತಿಯೊಬ್ಬರ ಹಾದಿಯೂ ವಿಭಿನ್ನ. ಆದರೆ ಎಲ್ಲರಲ್ಲೂ ಒಂದು ಸಾಮಾನ್ಯ ಗುಣವಿದೆ—ಪರಿಶ್ರಮದ ಜತೆಗೆ ಸಮಾಜದ ಮೇಲಿನ ಕಾಳಜಿ.

ರೈತರ ಉತ್ಪನ್ನಕ್ಕೆ ಮೌಲ್ಯವರ್ಧನೆ ಮಾಡುವ ಉದ್ಯಮಿ, ನೂರಾರು ಮಂದಿಗೆ ಉದ್ಯೋಗ ನೀಡಿದ ವರ್ತಕ, ಬಡ ಮಕ್ಕಳ ಶಿಕ್ಷಣಕ್ಕೆ ನೆರವಾಗುವ ಸಮಾಜ ಸೇವಕ, ಪಾರಂಪರಿಕ ವೃತ್ತಿಗೆ ಹೊಸ ಆಯಾಮ ನೀಡಿದ ಉದ್ಯಮಿ, ಅತ್ಯಾಧುನಿಕ ತಂತ್ರಜ್ಞಾನವನ್ನು ಅಳವಡಿಸಿಕೊಂಡ ಯುವ ಉದ್ಯಮಿ—ಹೀಗೆ ಗದಗದ ಉದ್ಯಮ ಲೋಕದ ವಿವಿಧ ಮುಖಗಳು ಈ ಸಾಧಕರ ಮೂಲಕ ಕಾಣಿಸುತ್ತವೆ.

ಹೀಗಾಗಿ, ಗದಗ ಉತ್ಸವ–೨೦೨೬ರ ಈ ಸನ್ಮಾನ ಕೇವಲ ಪ್ರಶಸ್ತಿ ಪ್ರದಾನವಲ್ಲ. ಗದಗದ ಉದ್ಯಮಶೀಲತೆ, ಪರಿಶ್ರಮ, ಪ್ರಾಮಾಣಿಕತೆ ಮತ್ತು ಸಮಾಜಮುಖಿ ಚಿಂತನೆಗೆ ಸಲ್ಲಿಸುವ ಗೌರವ.

ಸಣ್ಣ ಅಂಗಡಿಯಿಂದ ಆರಂಭಿಸಿ ದೊಡ್ಡ ಉದ್ಯಮ ಕಟ್ಟಿದವರಿಂದ ಹಿಡಿದು ಜಾಗತಿಕ ಮಟ್ಟದಲ್ಲಿ ಗುರುತಿಸಿಕೊಳ್ಳುತ್ತಿರುವ ಯುವ ಉದ್ಯಮಿಗಳವರೆಗೆ—ಈ ಸಾಧಕರ ಯಶೋಗಾಥೆಗಳು ಮುಂದಿನ ಪೀಳಿಗೆಗೆ ಒಂದೇ ಸಂದೇಶ ನೀಡುತ್ತವೆ.

“ಕನಸು ದೊಡ್ಡದಿರಲಿ, ಹೆಜ್ಜೆ ಸಣ್ಣದಾದರೂ ಪರವಾಗಿಲ್ಲ. ನಿರಂತರ ಪರಿಶ್ರಮವಿದ್ದರೆ ಯಶಸ್ಸು ದೂರವಲ್ಲ.”

-ಈರಣ್ಣ ಮುದಗಲ್ಲ – ನಾಗರಾಜ ನರಗುಂದ, ಗದಗ
ಉತ್ಸವ, ಪ್ರಚಾರ ಸಮಿತಿ