ಸುಡು ಬೇಸಿಗೆಯಲ್ಲಿ ತಂಪಾಗಿರಲು ಜನರು ಹೆಚ್ಚಾಗಿ ಆಯ್ಕೆ ಮಾಡುವ ಹಣ್ಣು ಕಲ್ಲಂಗಡಿ.
ದೇಹವನ್ನು ತಂಪಾಗಿಡುವುದರ ಜೊತೆಗೆ ಆರೋಗ್ಯಕ್ಕೂ ಉಪಕಾರಿ ಆಗಿರುವ ಈ ಹಣ್ಣು ಬೇಸಿಗೆ ವೇಳೆ ಮಾರುಕಟ್ಟೆಯಲ್ಲಿ ಹೇರಳವಾಗಿ ಲಭ್ಯವಾಗುತ್ತದೆ.
ಆದರೆ, ಕಲ್ಲಂಗಡಿ ಹಣ್ಣನ್ನು ತಿಂದ ನಂತರ ಅದರ ಸಿಪ್ಪೆಯನ್ನು ಬಹುತೇಕರು ಕಸದ ಬುಟ್ಟಿಗೆ ಎಸೆಯುತ್ತಾರೆ. ವಾಸ್ತವವಾಗಿ, ಈ ಸಿಪ್ಪೆಯಿಂದಲೇ ಹಲವು ರುಚಿಕರ ಹಾಗೂ ಆರೋಗ್ಯಕರ ರೆಸಿಪಿಗಳನ್ನು ತಯಾರಿಸಬಹುದು ಎಂಬುದು ಅನೇಕರಿಗೆ ತಿಳಿದಿಲ್ಲ.
ಜಾಮ್ ತಯಾರಿ ಸುಲಭ
ಕಲ್ಲಂಗಡಿ ಸಿಪ್ಪೆಯಿಂದ ರುಚಿಯಾದ ಜಾಮ್ ಮಾಡಬಹುದು. ಮೊದಲು ಸಿಪ್ಪೆಯ ಹಸಿರು ಪದರ ತೆಗೆದು ಒಳಗಿನ ಭಾಗವನ್ನು ಸಣ್ಣ ತುಂಡುಗಳಾಗಿ ಕತ್ತರಿಸಬೇಕು. ಇದಕ್ಕೆ ಸಕ್ಕರೆ, ನಿಂಬೆ ರಸ ಮತ್ತು ವೆನಿಲ್ಲಾ ಎಸೆನ್ಸ್ ಸೇರಿಸಿ ಜೆಲ್ಲಿ ಹದಕ್ಕೆ ಬರುವವರೆಗೆ ಕುದಿಸಿದರೆ ಸವಿಯಾದ ಜಾಮ್ ಸಿದ್ಧ. ದಾಲ್ಚಿನ್ನಿ ಸೇರಿಸಿದರೆ ಸುವಾಸನೆ ಹೆಚ್ಚುತ್ತದೆ.
ಉಪ್ಪಿನಕಾಯಿ ಹೊಸ ರುಚಿ
ಮಾವು, ನಿಂಬೆ ಮಾದರಿಯಲ್ಲೇ ಕಲ್ಲಂಗಡಿ ಸಿಪ್ಪೆಯಿಂದಲೂ ಉಪ್ಪಿನಕಾಯಿ ಮಾಡಬಹುದು. ಸಿಪ್ಪೆಯನ್ನು ತುಂಡುಗಳಾಗಿ ಕತ್ತರಿಸಿ ಸಾಂಪ್ರದಾಯಿಕ ವಿಧಾನದಲ್ಲಿ ಮಸಾಲೆ ಸೇರಿಸಿ ತಯಾರಿಸಿದರೆ ವಿಶಿಷ್ಟ ರುಚಿ ಸಿಗುತ್ತದೆ.
ಚಟ್ನಿ ಕೂಡ ಸವಿಯಬಹುದು
ಕಲ್ಲಂಗಡಿ ಸಿಪ್ಪೆಯಿಂದ ಚಟ್ನಿ ಕೂಡ ತಯಾರಿಸಬಹುದು. ಸಣ್ಣ ತುಂಡುಗಳಾಗಿ ಕತ್ತರಿಸಿದ ಸಿಪ್ಪೆಗೆ ಉಪ್ಪು, ಮೆಣಸಿನಕಾಯಿ, ಶುಂಠಿ ಹಾಗೂ ಇಷ್ಟದ ಮಸಾಲೆಗಳನ್ನು ಸೇರಿಸಿ ರುಬ್ಬಿದರೆ ರುಚಿಕರ ಚಟ್ನಿ ಸಿದ್ಧವಾಗುತ್ತದೆ.
ಇದರ ಜೊತೆಗೆ ಕಲ್ಲಂಗಡಿ ಸಿಪ್ಪೆಯಿಂದ ಪಲ್ಯ, ಹಲ್ವಾ, ಟುಟ್ಟಿ ಫ್ರೂಟಿ ಮುಂತಾದ ಹಲವು ಪದಾರ್ಥಗಳನ್ನು ತಯಾರಿಸಬಹುದು.
ಒಟ್ಟಿನಲ್ಲಿ, ಕಸದ ಬುಟ್ಟಿಗೆ ಹೋಗುವ ಕಲ್ಲಂಗಡಿ ಸಿಪ್ಪೆಯನ್ನು ಬಳಸಿ ರುಚಿಕರ ಪದಾರ್ಥಗಳನ್ನು ತಯಾರಿಸುವ ಮೂಲಕ ಆಹಾರ ವ್ಯರ್ಥತೆಯನ್ನು ಕಡಿಮೆ ಮಾಡಬಹುದು ಎಂಬುದು ತಜ್ಞರ ಅಭಿಪ್ರಾಯವಾಗಿದೆ.
