ರಿಯಾಲಿಟಿ ಶೋ ಜಗತ್ತಿನಲ್ಲಿ ಸಂಚಲನ ಸೃಷ್ಟಿಸಿದ್ದ ‘ಲಾಕ್ ಅಪ್’ ಇದೀಗ ಸಂಪೂರ್ಣ ಹೊಸ ರೂಪದಲ್ಲಿ ಮರಳುತ್ತಿದೆ. ‘ಲಾಕ್ ಅಪ್: ಸಚ್ ಯಾ ಸಜಾ’ ಹೆಸರಿನ ಎರಡನೇ ಸೀಸನ್ನಲ್ಲಿ ಮೊದಲ ಸೀಸನ್ನ ಮುಖವಾಗಿದ್ದ ಕಂಗನಾ ರಣಾವತ್ ಕಾಣಿಸಿಕೊಳ್ಳುವುದಿಲ್ಲ. ಅವರ ಬದಲಿಗೆ ಫರಾ ಖಾನ್ ಮತ್ತು ರಿತೇಶ್ ದೇಶ್ಮುಖ್ ನಿರೂಪಕರಾಗಿ ಕಾಣಿಸಿಕೊಳ್ಳಲಿದ್ದಾರೆ.
ಈ ಬೆಳವಣಿಗೆ ಬಗ್ಗೆ ಪ್ರತಿಕ್ರಿಯಿಸಿದ ನಿರ್ಮಾಪಕಿ ಏಕ್ತಾ ಕಪೂರ್, “ಈ ಸೀಸನ್ಗಾಗಿ ನಾವು ಸಂಪೂರ್ಣ ಹೊಸ ಫಾರ್ಮ್ಯಾಟ್ ರೂಪಿಸಿದ್ದೇವೆ. ಹಳೆಯ ಶೋನ ಅಂಶಗಳನ್ನು ಮುಂದುವರಿಸುವ ಬದಲು, ಸಂಪೂರ್ಣ ಹೊಸ ಅನುಭವ ನೀಡುವ ಉದ್ದೇಶ ಹೊಂದಿದ್ದೇವೆ. ಹೀಗಾಗಿ ನಿರೂಪಕರಿಂದ ಹಿಡಿದು ಕಾನ್ಸೆಪ್ಟ್ವರೆಗೂ ಎಲ್ಲವೂ ಬದಲಾಗಿದೆ” ಎಂದು ಹೇಳಿದ್ದಾರೆ.
ಮೊದಲ ಸೀಸನ್ನಲ್ಲಿ ಕಂಗನಾ ಅವರ ಖಡಕ್ ನಿರೂಪಣೆ ಶೋಗೆ ವಿಶೇಷ ಗುರುತನ್ನು ತಂದುಕೊಟ್ಟಿತ್ತು. ಆದರೆ ಈ ಬಾರಿ ಶೋವನ್ನು ವಿಭಿನ್ನ ರೀತಿಯಲ್ಲಿ ಪ್ರಸ್ತುತಪಡಿಸಲು ನಿರ್ಮಾಪಕರು ನಿರ್ಧರಿಸಿದ್ದಾರೆ. ಕಂಗನಾ ಅವರ ರಾಜಕೀಯ ಜವಾಬ್ದಾರಿಗಳೂ ಈ ನಿರ್ಧಾರಕ್ಕೆ ಕಾರಣವಾಗಿರಬಹುದು ಎನ್ನಲಾಗುತ್ತಿದೆ.
ಇನ್ನು ಶೋನ ಮತ್ತೊಂದು ದೊಡ್ಡ ಬದಲಾವಣೆ ಎಂದರೆ, ಈ ಬಾರಿ ಪ್ರಸಾರ ವೇದಿಕೆ. ಮೊದಲ ಸೀಸನ್ ALTBalaji ಮತ್ತು MX Player ನಲ್ಲಿ ಪ್ರಸಾರವಾಗಿದ್ದರೆ, ಎರಡನೇ ಸೀಸನ್ ನೇರವಾಗಿ ನೆಟ್ಫ್ಲಿಕ್ಸ್ನಲ್ಲಿ ಬಿಡುಗಡೆಯಾಗುತ್ತಿದೆ.
14 ಜನ ಖ್ಯಾತ ಸೆಲೆಬ್ರಿಟಿಗಳನ್ನು ಜೈಲು ಮಾದರಿಯ ವಾತಾವರಣದಲ್ಲಿ ಆರು ವಾರಗಳ ಕಾಲ ಇರಿಸಲಾಗುತ್ತದೆ. ಯಾವುದೇ ಹೊರಗಿನ ಸಂಪರ್ಕವಿಲ್ಲದೆ ಅವರು ಟಾಸ್ಕ್ಗಳು, ಶಿಕ್ಷೆಗಳು ಮತ್ತು ಮಾನಸಿಕ ಸವಾಲುಗಳನ್ನು ಎದುರಿಸಬೇಕಾಗುತ್ತದೆ. ಬಾಲಾಜಿ ಟೆಲಿಫಿಲ್ಮ್ಸ್ ಮತ್ತು ಕೊಲೊಸಿಯಮ್ ಸಂಸ್ಥೆಗಳು ಜಂಟಿಯಾಗಿ ನಿರ್ಮಿಸಿರುವ ಈ ಶೋ ಜೂನ್ 27ರಿಂದ ನೆಟ್ಫ್ಲಿಕ್ಸ್ನಲ್ಲಿ ಆರಂಭವಾಗಲಿದೆ.
ರಿಯಾಲಿಟಿ ಶೋ ಅಭಿಮಾನಿಗಳಲ್ಲಿ ಈಗಾಗಲೇ ಭಾರೀ ಕುತೂಹಲ ಮೂಡಿಸಿರುವ ‘ಲಾಕ್ ಅಪ್ 2’, ಹೊಸ ನಿರೂಪಕರು ಮತ್ತು ಹೊಸ ಫಾರ್ಮ್ಯಾಟ್ನೊಂದಿಗೆ ಎಷ್ಟರ ಮಟ್ಟಿಗೆ ಯಶಸ್ಸು ಸಾಧಿಸುತ್ತದೆ ಎಂಬುದರ ಮೇಲೆ ಎಲ್ಲರ ಕಣ್ಣು ನೆಟ್ಟಿದೆ.
