ಲಕ್ನೋ ಸೂಪರ್ ಜೈಂಟ್ಸ್ ವಿರುದ್ಧ ನಡೆದ ರೋಚಕ ಪಂದ್ಯದಲ್ಲಿ ಕೋಲ್ಕತ್ತಾ ನೈಟ್ ರೈಡರ್ಸ್ ‘ಸೂಪರ್’ ಜಯ ಸಾಧಿಸಿ ಪ್ಲೇಆಫ್ ರೇಸ್ನಲ್ಲಿ ಜೀವಂತವಾಗಿದೆ.
ಟಾಸ್ ಸೋತು ಮೊದಲು ಬ್ಯಾಟಿಂಗ್ ಮಾಡಿದ ಕೆಕೆಆರ್ 7 ವಿಕೆಟ್ ನಷ್ಟಕ್ಕೆ 155 ರನ್ ಗಳಿಸಿತು. ಗುರಿ ಬೆನ್ನತ್ತಿದ ಲಕ್ನೋ ತಂಡ 8 ವಿಕೆಟ್ ಕಳೆದುಕೊಂಡು ಸಮಬಲ ಸಾಧಿಸಿ ಪಂದ್ಯವನ್ನು ಟೈಗೆ ತಳ್ಳಿತು. ಕೊನೆಯ ಓವರ್ನಲ್ಲಿ 17 ರನ್ ಬೇಕಿದ್ದಾಗ ರೋಚಕ ಕ್ಷಣಗಳು ನಿರ್ಮಾಣವಾದವು. ನಿರ್ಣಾಯಕ ಕ್ಷಣದಲ್ಲಿ ನೋಬಾಲ್ಗಳ ಸಹಾಯದಿಂದ ಸಮೀಕರಣ ಬದಲಾಗಿದ್ದು, ಕೊನೆಯ ಎಸೆತಕ್ಕೆ 7 ರನ್ ಅಗತ್ಯವಿದ್ದಾಗ ಶಮಿ ಸಿಕ್ಸರ್ ಸಿಡಿಸಿ ಪಂದ್ಯವನ್ನು ಡ್ರಾಗೆ ಕೊಂಡೊಯ್ದರು.
ಸೂಪರ್ ಓವರ್ನಲ್ಲಿ ಮೊದಲು ಬ್ಯಾಟ್ ಮಾಡಿದ ಲಕ್ನೋ ತಂಡ ಸಂಪೂರ್ಣ ವೈಫಲ್ಯ ಅನುಭವಿಸಿತು. ನಿಕೊಲಸ್ ಪೂರನ್ ಮೊದಲ ಎಸೆತದಲ್ಲೇ ಔಟಾದರೆ, ನಂತರ ರಿಷಬ್ ಪಂತ್ ಸಿಂಗಲ್ ಮಾತ್ರ ಕಲೆಹಾಕಿದರು. ಐಡೆನ್ ಮಾರ್ಕ್ರಾಮ್ ದೊಡ್ಡ ಶಾಟ್ಗೆ ಮುಂದಾಗಿ ವಿಕೆಟ್ ಒಪ್ಪಿಸಿದರು. ಈ ವೇಳೆ ಸುನಿಲ್ ನರೈನ್ ಅದ್ಭುತ ಬೌಲಿಂಗ್ ಪ್ರದರ್ಶನ ನೀಡಿ ಎರಡು ವಿಕೆಟ್ ಕಬಳಿಸಿ ಲಕ್ನೋ ತಂಡವನ್ನು ಕೇವಲ 1 ರನ್ಗೆ ಸೀಮಿತಗೊಳಿಸಿದರು. ಗೆಲುವಿಗೆ 2 ರನ್ ಗುರಿ ಪಡೆದ ಕೆಕೆಆರ್ ಪರ ರಿಂಕು ಸಿಂಗ್ ಮೊದಲ ಎಸೆತದಲ್ಲೇ ಬೌಂಡರಿ ಬಾರಿಸಿ ತಂಡಕ್ಕೆ ಗೆಲುವು ತಂದುಕೊಟ್ಟರು.
ಪಂದ್ಯದಲ್ಲಿ ಲಕ್ನೋ ತಂಡದ ಬ್ಯಾಟಿಂಗ್ ಮಿಶ್ರ ಪ್ರದರ್ಶನ ಕಂಡಿತು. ಐಡೆನ್ ಮಾರ್ಕ್ರಾಮ್ 31, ನಾಯಕ ರಿಷಬ್ ಪಂತ್ 42, ಆಯುಷ್ ಬದೋನಿ 24, ಹಿಮ್ಮತ್ ಸಿಂಗ್ 19 ರನ್ ಗಳಿಸಿದರೂ, ಇತರ ಆಟಗಾರರ ವೈಫಲ್ಯ ತಂಡಕ್ಕೆ ಹೊಡೆತ ನೀಡಿತು. ಮತ್ತೊಂದೆಡೆ ಕೆಕೆಆರ್ ಆರಂಭದಲ್ಲಿ ಸಂಕಷ್ಟಕ್ಕೆ ಸಿಲುಕಿದರೂ, ಕ್ಯಾಮರೂನ್ ಗ್ರೀನ್ ಮತ್ತು ರಿಂಕು ಸಿಂಗ್ ಜೋಡಿ ತಂಡವನ್ನು ಪುನಶ್ಚೇತನಗೊಳಿಸಿತು. ಗ್ರೀನ್ 34 ರನ್ ಗಳಿಸಿದರೆ, ರಿಂಕು ಸಿಂಗ್ 51 ಎಸೆತಗಳಲ್ಲಿ 83 ರನ್ ಸಿಡಿಸಿ ತಂಡದ ಮೊತ್ತ 150ರ ಗಡಿ ದಾಟಲು ನೆರವಾದರು. ವಿಶೇಷವಾಗಿ ಕೊನೆಯ ಓವರ್ನಲ್ಲಿ ನಾಲ್ಕು ಸಿಕ್ಸರ್ ಸಿಡಿಸಿದ ರಿಂಕು ಅವರ ಸ್ಫೋಟಕ ಆಟವೇ ಪಂದ್ಯದಲ್ಲಿ ತಿರುವು ತಂದಿತು.
