ಗಜೇಂದ್ರಗಡ: ಕಾಲೇಜು ಶುಲ್ಕ ಮತ್ತು ಪುಸ್ತಕಗಳ ಖರ್ಚು ಭರಿಸಲು ಓದಿನ ಜೊತೆಗೆ ಗೌಂಡಿ ಕೆಲಸ ಮಾಡುತ್ತಿದ್ದ ಯುವಕನೊಬ್ಬ ಇಂದು ಭಾರತೀಯ ಸೇನೆಯಲ್ಲಿ 28 ವರ್ಷಗಳ ಕಾಲ ಸೇವೆ ಸಲ್ಲಿಸಿ ಸುಬೇದಾರ್ ಹುದ್ದೆಯಿಂದ ನಿವೃತ್ತರಾಗುತ್ತಿದ್ದಾರೆ. ಬಡತನವನ್ನು ಮೆಟ್ಟಿ ನಿಂತು ಪರಿಶ್ರಮ, ಛಲ ಮತ್ತು ಆತ್ಮವಿಶ್ವಾಸದಿಂದ ಸಾಧನೆಯ ಶಿಖರವೇರಿದ ಗಜೇಂದ್ರಗಡದ ಶಿವಾಜಿಪೇಟೆಯ ಭೀಮಣ್ಣ ಮಲ್ಲೇಶಪ್ಪ ಮುಧೋಳ ಅವರ ಜೀವನಗಾಥೆ ಯುವಜನತೆಗೆ ಮಾದರಿಯಾಗಿದೆ.
ಬಡತನದ ನಡುವೆ ಅರಳಿದ ದೇಶಸೇವೆಯ ಕನಸು
ಮಲ್ಲೇಶಪ್ಪ ಮತ್ತು ಶ್ಯಾವಮ್ಮ ದಂಪತಿಯ ಮೂರನೇ ಪುತ್ರನಾಗಿ 1979ರ ಜೂನ್‌ 15ರಂದು ಭೀಮಣ್ಣ ಜನಿಸಿದರು. ಬಾಲ್ಯದಿಂದಲೇ ಬಡತನದ ಸಂಕಷ್ಟಗಳನ್ನು ಎದುರಿಸಿದ ಅವರು ಕುಟುಂಬದ ಆರ್ಥಿಕ ಪರಿಸ್ಥಿತಿಗೆ ನೆರವಾಗಲು ಹೊಲದ ಕೆಲಸ ಸೇರಿದಂತೆ ವಿವಿಧ ಕೆಲಸಗಳಲ್ಲಿ ತೊಡಗಿಸಿಕೊಂಡಿದ್ದರು.
ಕಾಲೇಜು ದಿನಗಳಲ್ಲಿಯೇ ವಿದ್ಯಾಭ್ಯಾಸದ ಖರ್ಚನ್ನು ತಾವೇ ಭರಿಸಬೇಕೆಂಬ ಉದ್ದೇಶದಿಂದ ಕಾಲೇಜು ಮುಗಿದ ಬಳಿಕ ಗೌಂಡಿ ಕೆಲಸಕ್ಕೆ ತೆರಳುತ್ತಿದ್ದರು. ಗೌಂಡಿ ಕೆಲಸ ಮಾಡುತ್ತಲೇ ವಿದ್ಯಾಭ್ಯಾಸ ಮುಂದುವರಿಸಿದ ಅವರು, ಕಷ್ಟಗಳಿಗೆ ಎದೆಗುಂದದೆ ಭಾರತೀಯ ಸೇನೆಗೆ ಸೇರ್ಪಡೆಯಾದರು. ಅಂದಿನಿಂದ ಆರಂಭವಾದ ಅವರ ದೇಶಸೇವೆಯ ಪಯಣ ಸತತ 28 ವರ್ಷಗಳ ಕಾಲ ಮುಂದುವರಿದಿದೆ.
ಸಿಯಾಚಿನ್‌ನ ಕೊರೆಯುವ ಚಳಿಯಲ್ಲೂ ದೇಶಸೇವೆ
ಭಾರತೀಯ ಭೂಸೇನೆಯಲ್ಲಿ ಜೂನಿಯರ್‌ ಕಮಿಷನ್ಡ್‌ ಆಫೀಸರ್‌ (ಜೆಸಿಒ) ಆಗಿ ಸೇವೆ ಸಲ್ಲಿಸಿದ ಭೀಮಣ್ಣ ಅವರು ಹಂತ ಹಂತವಾಗಿ ಸುಬೇದಾರ್ ಹುದ್ದೆಗೇರಿದ್ದಾರೆ. ಅರುಣಾಚಲ ಪ್ರದೇಶ, ಪಂಜಾಬ್‌, ಜಮ್ಮು-ಕಾಶ್ಮೀರ, ಹೈದರಾಬಾದ್‌, ಮಣಿಪುರ, ಮಿಜೋರಾಂ, ನಾಗಾಲ್ಯಾಂಡ್‌, ಅಸ್ಸಾಂ, ರಾಜಸ್ಥಾನ, ಉತ್ತರಾಖಂಡ, ತಮಿಳುನಾಡು, ಸಿಕ್ಕಿಂ ಹಾಗೂ ತಿರುವನಂತಪುರ ಸೇರಿದಂತೆ ದೇಶದ ವಿವಿಧ ಭಾಗಗಳಲ್ಲಿ ಕರ್ತವ್ಯ ನಿರ್ವಹಿಸಿದ್ದಾರೆ.
ವಿಶ್ವದ ಅತಿ ಎತ್ತರದ ಯುದ್ಧಭೂಮಿಗಳಲ್ಲಿ ಒಂದಾದ ಸಿಯಾಚಿನ್‌ನ ಹಿಮಪ್ರದೇಶದಲ್ಲಿಯೂ ಕೊರೆಯುವ ಚಳಿ ಹಾಗೂ ಪ್ರತಿಕೂಲ ಹವಾಮಾನದ ನಡುವೆ ದೇಶದ ಗಡಿಯನ್ನು ಕಾಯುವ ಜವಾಬ್ದಾರಿ ನಿರ್ವಹಿಸಿದ್ದಾರೆ. ಕಠಿಣ ಪರಿಸ್ಥಿತಿಗಳಲ್ಲಿಯೂ ಕರ್ತವ್ಯಕ್ಕೆ ಆದ್ಯತೆ ನೀಡಿದ ಅವರ ಸೇವೆ ಸೇನಾ ಬದುಕಿನ ಪ್ರಮುಖ ಹೆಗ್ಗಳಿಕೆಯಾಗಿದೆ.
ಉನ್ನತ ಹುದ್ದೆ ಏರಿದರೂ ಬದಲಾಗದ ಸರಳತೆ
ಗೌಂಡಿ ಕೆಲಸದಿಂದ ಆರಂಭವಾದ ಬದುಕು ಸೇನೆಯ ಸುಬೇದಾರ್ ಹುದ್ದೆಯವರೆಗೆ ಬೆಳೆದರೂ ಭೀಮಣ್ಣ ಅವರ ಸರಳ ವ್ಯಕ್ತಿತ್ವ ಮಾತ್ರ ಬದಲಾಗಿಲ್ಲ. ಊರಿಗೆ ಬಂದಾಗ ಪರಿಚಿತರು, ಅಪರಿಚಿತರು ಎನ್ನದೆ ಎಲ್ಲರೊಂದಿಗೂ ನಗುಮುಖದಿಂದ ಮಾತನಾಡುವ ಗುಣ ಅವರಲ್ಲಿದೆ. ಪರಿಶ್ರಮ, ಶಿಸ್ತು ಮತ್ತು ಆತ್ಮವಿಶ್ವಾಸವಿದ್ದರೆ ಯಾವುದೇ ಹಿನ್ನೆಲೆಯಿಂದ ಬಂದರೂ ಸಾಧನೆ ಮಾಡಬಹುದು ಎಂಬುದನ್ನು ತಮ್ಮ ಬದುಕಿನ ಮೂಲಕ ತೋರಿಸಿಕೊಟ್ಟಿದ್ದಾರೆ.
ಯುವಕರಿಗೆ ಸ್ಫೂರ್ತಿಯಾಗಲಿ ಭೀಮಣ್ಣ ಸಾಧನೆ
28 ವರ್ಷಗಳ ಸುದೀರ್ಘ ದೇಶಸೇವೆಯ ಬಳಿಕ ನಿವೃತ್ತರಾಗುತ್ತಿರುವ ಭೀಮಣ್ಣ ಅವರ ಅನುಭವ ಗ್ರಾಮೀಣ ಭಾಗದ ಯುವಕರಿಗೆ ಮಾರ್ಗದರ್ಶನವಾಗಬೇಕಿದೆ. ಸೇನಾ ನೇಮಕಾತಿ, ದೈಹಿಕ ಸಾಮರ್ಥ್ಯ, ಶಿಸ್ತು ಹಾಗೂ ದೇಶಸೇವೆಯ ಮಹತ್ವದ ಕುರಿತು ಯುವಕರಿಗೆ ಮಾರ್ಗದರ್ಶನ ನೀಡುವ ಮೂಲಕ ತಮ್ಮ ಅನುಭವವನ್ನು ಸಮಾಜದೊಂದಿಗೆ ಹಂಚಿಕೊಳ್ಳಬೇಕಿದೆ.
ಬಡತನವಿದೆ ಎಂದು ಕನಸು ಕಾಣುವುದನ್ನು ನಿಲ್ಲಿಸಬಾರದು, ಕಷ್ಟಗಳಿವೆ ಎಂದು ಗುರಿಯಿಂದ ಹಿಂದೆ ಸರಿಯಬಾರದು ಎಂಬುದಕ್ಕೆ ಭೀಮಣ್ಣ ಅವರ ಬದುಕೇ ಸಾಕ್ಷಿ. ಸೇನೆಯ ಸಮವಸ್ತ್ರಕ್ಕೆ ವಿದಾಯ ಹೇಳಿದರೂ ದೇಶಪ್ರೇಮಕ್ಕೆ ಎಂದಿಗೂ ನಿವೃತ್ತಿಯಿಲ್ಲ. ಅವರ ಸಾಧನೆ ಗಜೇಂದ್ರಗಡದ ಹೆಮ್ಮೆಯಾಗಿದ್ದು, ದೇಶಸೇವೆಯ ಕನಸು ಕಾಣುವ ಯುವಕರಿಗೆ ಸದಾ ಸ್ಫೂರ್ತಿಯಾಗಲಿ ಎಂದು ವಕೀಲರಾದ ದಾವಲಸಾಬ ತಾಳಿಕೋಟಿ ಹೇಳಿದ್ದಾರೆ.
