ಚೆನ್ನೈ: ತಮಿಳುನಾಡು ಚುನಾವಣೆಯ ಕಣದಲ್ಲಿರುವ ನಟ ವಿಜಯ್ ಅವರ ರಾಜಕೀಯ ಭವಿಷ್ಯಕ್ಕೆ ಗಂಭೀರ ಕಾನೂನು ಪ್ರಶ್ನೆಗಳು ಎದುರಾಗಿವೆ. ಪೆರಂಬೂರ್ ಮತ್ತು ತಿರುಚ್ಚಿ ಪೂರ್ವ ಕ್ಷೇತ್ರಗಳಿಗೆ ಸಲ್ಲಿಸಿದ ನಾಮಪತ್ರಗಳ ಆಸ್ತಿ ವಿವರಗಳಲ್ಲಿ ಭಾರಿ ಅಸಂಗತತೆ ಕಂಡುಬಂದಿದೆ.
ಮದ್ರಾಸ್ ಹೈಕೋರ್ಟ್ ಈ ವಿಷಯವನ್ನು ಗಮನಿಸಿ ಪ್ರಾಥಮಿಕವಾಗಿ ವ್ಯತ್ಯಾಸವನ್ನು ಅಕ್ರಮವೆಂದು ಮೌಖಿಕವಾಗಿ ಅಭಿಪ್ರಾಯಪಟ್ಟಿದೆ. ಸುಮಾರು 105 ಕೋಟಿ ರೂಪಾಯಿಗಳ ವ್ಯತ್ಯಾಸದ ಕುರಿತು ಪೆರಂಬೂರ್ ಮತದಾರರೊಬ್ಬರು ಸಲ್ಲಿಸಿದ ಅರ್ಜಿ ವಿಚಾರಣೆಗೆ ಕಾರಣವಾಗಿದೆ.
ಅಫಿಡವಿಟ್ ಪ್ರಕಾರ ತಿರುಚ್ಚಿಯಲ್ಲಿ 220 ಕೋಟಿ ರೂ. ಆದಾಯ ತೋರಿಸಿದರೆ, ಪೆರಂಬೂರ್ ದಾಖಲೆಗಳಲ್ಲಿ 115 ಕೋಟಿ ರೂ. ಮಾತ್ರ ನಮೂದಿಸಲಾಗಿದೆ ಎಂದು ಆರೋಪಿಸಲಾಗಿದೆ. ಈ ಅಸಮಂಜಸತೆ ಕುರಿತು ಚುನಾವಣಾ ಆಯೋಗ ಮತ್ತು ಆದಾಯ ತೆರಿಗೆ ಇಲಾಖೆಗೆ ಹೈಕೋರ್ಟ್ ನೋಟಿಸ್ ನೀಡಿದೆ.
ಇದು ಆರಂಭಿಕ ಹಂತದ ವಿಚಾರಣೆ ಆಗಿದ್ದು, ಯಾವುದೇ ಅಂತಿಮ ಆದೇಶ ಹೊರಬಂದಿಲ್ಲ. ಅಧಿಕಾರಿಗಳ ವರದಿ ಬಂದ ಬಳಿಕ ಮುಂದಿನ ಕಾನೂನು ಕ್ರಮ ನಿರ್ಧಾರವಾಗಲಿದೆ ಎಂದು ನ್ಯಾಯಾಲಯ ಸ್ಪಷ್ಟಪಡಿಸಿದೆ.
